• Йеңилиқлар
• 28 Қаңтар, 2013

Һөкүмәт қарарлири имзаланди

Дөләт рәһбириниң тапшуруғиға мувапиқ 15-январь күни Премьер-Министр Серик Ахметов Җамбул вилайитидики боран зәрдаплирини йоқ қилиш ишлирини уюштуруш үчүн мәмликәт Һөкүмитиниң пәвқуладдә фондидин мәбләғ бөлүш вә дөләтлик маддий фондтин маддий ресурсларни брондин чиқириш тоғрилиқ Һөкүмәтниң қарарлирини имзалиди, дәп хәвәрләйду Премьер-Министрниң мәтбуат хизмити.  Имзаланған һөҗҗәткә мувапиқ, Җамбул вилайити һакимийитигә иссиқлиқ, су һәм электр билән тәминләш системилирини әслигә кәлтүрүш, турушлуқ өйләрни җөндәш бойичә биринчи новәтлик ишларни елип бериш үчүн Һөкүмәт фондидин мәхсәтлик еқимдики трансферт түридә 800 миллион тәңгә бөлүниду.   Шуниң билән биллә Җамбул вилайитиниң һакимийитигә тәбиий характердики пәвқуладдә әһвал ақивәтлиридин кәлтүрүлгән чиқимниң орнини толтириш үчүн маддий резервтин (йепиш материаллири, қурулуш яғачлири вә әйнәк) бирқатар маддий ресурслар әвәтилиду.

Боран чиқип…

Җамбул вилайәтлик пәвқуладдә әһваллар бойичә департаментниң хәвиричә, өткән шәнбә күни Җамбул вилайитидә йүз бәргән қаттиқ боранниң нәтиҗисидә региондики инфрақурулумларға 2,5 миллиард тәңгилик зиян йәткүзүлди. «Бирақ бу рәқәм униңдинму көпийиши мүмкин», дәйду мәхсус түзүлгән комиссия әзалири. Һәтта еғир автотранспортларни ағдуруп ташлаш қудритигә егә болған мәзкүр боран пәйтидә 31 адәм һәрхил дәриҗидики җараһәтләрни алған. Уларниң бесим көпчилигигә тиббий ярдәм көрситилип, 8 адәм ағриқханиға ятқузулди. Әң муһими, адәм чиқими болмиди. Вилайәт һакиминиң биринчи орунбасари Кәрим Көкирекбаевниң рәһбәрлиги билән пәвқуладдә әһвалға мунасивәтлик вилайәтлик штаб қурулуп, өз ишини башлавәтти. Вилайәтниң Қаратав шәһиридики барлиқ объектларға иссиқлиқ берилип, мәркизий қазанхана өз графиги бойичә ишләватиду. Алақә системилириму ишқа қошулди. Талас наһийәсиниң мәркизидики зәрдап чәккән 221 объектта 35 әслигә кәлтүргүчи-қурулушчилар бригадиси ишләватиду. Сарысу наһийәси билән униң мәркизи Жаңатас шәһиридә электр қувитини бериш 75 пайиз әслигә кәлтүрүлди. Әнди исситиш системиси турақлиқ ишләватиду. Зәрдап чәккән объектларни әслигә кәлтүрүш иши билән 20 бригада шуғулланмақта. Жуалы наһийәсидики чиқимлар 13 йеза округи бойичә ениқланди. Һазирға қәдәр йәрлик әһмийәткә егә Бауыржан Момышулы — Қошқарата йолида қатнаш әслигә кәлтүрүлди, 5 йеза билән 22 һәрхил мәхсәттики объектларниң территориялири тазиланмақта. Җамбул, Байзақ наһийәлири билән Тараз шәһиридә боран зәрдаплирини йоқ қилиш ишлири уюшчанлиқ билән жүргүзүлүватиду. Алмута, Қарағанда вилайәтлиридин ярдәмгә кәлгән адәмләр билән мәхсус техникилар йәрлик бригадилар билән бирләшкән һалда ишқа киришип кәтти.