- Висал
- 12 Наурыз, 2013
Аниниң гүллири
У қәйәргила бармисун, ихтиярсиз мәхмәлгүлни издәйдиған болди. Немишкиду, униңға кейинки жилларда бу гүл азийип, йоқап кетиватқандәк туюлатти. Бу гүлни учритип қалғидәк болса, у бирдин өзиниң анисини вә балилиқ дәврини әскә алиду.
Ана бу тәвәгә өткән әсирниң әллигинчи жиллирида, Хошна Чемолғандики техникумға оқушқа чүшүш мунасивити билән кәлгән еди. Тәғдир тәқәзаси болғай у мошу йәрдә уйғур жигити билән учришип қалди. Яшлар аилә қуруп, мошу Фабричный мәлисидә өйлүк болди. Бу көп милләтлик, адәмлири инақ, чоң мәлә. Турғунларниң көпчилиги мәзкүр йезидики фабрикида әмгәк қилидекән.
Ана мошу жуттин өз бәхтини тапти. Бәш пәрзәнт сөйди. Қисқиси, йолдиши иккиси мәзкүр мәлидә бәхит-саадәт қучти. Ана гүлләргә бөләкчила амрақ болидиған. Чаққанғинә айвини хилму-хил гүлләргә толған. Болупму мәхмәлгүлниң һәр хил түрлири бу һойлиға бөләкчә һөсүн берип туратти.
Ана мошу жутлуқ болған жили йолда бир һарвукәш бовайға дуч келип қеливеди. Бовай һарвусидики жүкниң аддий жүк әмәслигини, жирақ Украинидин әкелингән мәхмәлгүли екәнлигини ейтқан. Бу гүлләрни мошу йезидики фабрикиниң әтрапини безәндүрүш үчүн әкәлгән екән. Ана бовайдин бизәчә көчәт сориди. Бовай яш аялниң илтимасини рәт қилмиди.
Мәлидә бу гүлниң хилму-хил түрлири көпийишкә башлиди. Амма ана өстүргән мәхмәлгүл башқилардин бөләкчә. Бирдин көз тартип туридиған бу әҗайип гүлниң тоқ қизил япрақлириниң өзи бир гөзәлликниң тимсали еди. Жуттикиләр адәмни бирдин өзигә шәйда қилидиған бу гүлниң әсли намини унтуп, «Розаниң гүллири» дәп атайдиған болди.
Һәр баһарда ана әшу гүлләрниң йилтизини соғдин сақлап қелиш үчүн күздә селип қойған ордин авайлап чиқириду. Андин уни, гоя сәбиләрдәк пәпиләп, яғач угақлири селинған ящиккә олтарғузуп, су қуйиду. Көчәт бих чиқиришқа башлиғанда, әчиқип алдин-ала тәйярлап қойған кәйзиләргә көчириду. Июнь ейиниң башлирида аниниң рәңму-рәң гүлзарлиғи һойлини җәннәткә айландуруветиду. Ана гүл көчәтлирини шундақ таллаттики, һәрбир чечәкниң орни бөләк, худди оркестрниң мәйин навасидәк өзичә бир дуния. Кәчқурун бу чечәкләр мөкүнгәндә болса, намашәм гүллири бәзмә қурушатти.
Оғли анисиға гүлләрни пәрвиш қилишқа дайим ярдәм берәтти. Ана-бала иккиси узақтин-узақ мошу мәнзиригә тоймай қаратти.
Бу гүлләр та кәч күзгичә ечилип, адәмгә шатлиқ һәдийә қилиду. Ана пәқәт гүлләрнила әмәс, мошу қутлуқ өйни, жутни өз меһир-муһәббити билән асрап яшиди. У 80 жил өмүр сүрди. Адаққи тиниғиғичә өзиниң сөйүмлүк гүллириниң әтрапида пәрванә болди. Әнди аниниң гүллири оғлиниң һойлисидики гүлзарлиққа көчти. Атисиниң кәйнидин қалмай чепип жүридиған кичиккинә әлтәк қиз дайим мошу гүлзарлиқни пеқирап кәтмәйду. Уму момиси охшаш бу гүлләргә ашиқ.
Исмайилҗан ИМИНОВ.
557 рет
көрсетілді0
пікір
