• Висал
  • 12 Наурыз, 2013

Уйғур ханим-қизлири арисидин әң паалийәтчан аял дәп кимни ейтқан болар едиңиз?

Мурат ӘХМӘДИЕВ, мәҗлис депутати: — Рәмити Рошәнгүл Илахунова даңлиқ артист болғини үчүнму униң җәмийитимиздики роли наһайити үстүн еди. Уни жуқуридики әмәлдарлар билән аддий хәлиққичә наһайити һөрмәт тутатти. Һазир сизниң соалиңиздин кейин ойлинип қалдим. Бүгүнки күндә биздә әйнә шундақ паалийәтчан аяллар барму? Иш баби билән уйғурлар зич җайлашқан наһийәләрдә көп болушқа тоғра кәлди. Шундақ учришишларда аддий хәлиқ «Ишбиләрмән аяллар» клуби вә униң рәиси Клара Шардинова һәққидә яхши инкасларни ейтиду. Көпчилик мәзкүр клубниң жүргүзүватқан паалийитидин рази екән. Шуңлашқа мән, аддий хәлиқ қоллаватқан мәзкүр клубниң рәиси Клара Турсун қизини паалийәтчан уйғур ханим-қизлириниң қатариға киргүзимән. Рабик ИСМАЙИЛОВ, алим: — Шәхсән мән уйғур ханим-қизлири арисида өзиниң мүҗәз-хулқи, мәрт-мәрданилиғи билән алаһидә пәриқлинидиған тиҗарәтчи Сәнәм Бешировани паалийәтчан аял дегүм келиду. Чүнки у қуруқ гәптин, әмәлий ишни яқтуридиған аял. Җәмшит РОЗАХУНОВ, шаир: — Иҗадийәттә қәләмдишим — шаирә Патигүл Мәхсәтова наһайити паалийәтчанлиқ көрсәтмәктә. Мениңчә, Патигүл Қазақстандики әң паалийәтчан ханимларниң бири. Реһимҗан ТОХТАХУНОВ, Панфилов наһийәлик Уйғур этномәдәнийәт мәркизиниң рәиси: — Жутдишимиз Сүрийәм Һезимова өзиниң ишбиләрмәнлиги билән көзгә чүшүватқан ханим-қизларниң бири. Шундақла у миллий мәдәнийитимизниң җанкөйәри. Шуңлашқа мән Сүрийәмни әң паалийәтчан уйғур аяллириниң бири дәп һесаплаймән. Савутҗан СОНУРОВ, Уйғур театриниң мудири: — Мән адвокат Гүлинур Җаланованиң исмини алаһидә тилға алғум келиду. Униң өзини тутуши, мәдәнийити, силиқ-сипайилиғи мени қайил қилиду. Гүлинур һәдә қолидин кәлсә, һәрқандақ адәмгә ярдәмлишидиған алий хисләткә егә инсан. Рәхмәтҗан ҒОҖӘМБӘРДИЕВ, «Мектеп» нәшрияти Уйғур редакциясиниң башлиғи: — Алди билән өзәм көп жиллардин бери биллә ишләватқан кәсипдашлирим Мәрийәм һәдә Адилова билән Селимәм Балиновани атап өткүм келиду. Иккиси чарәк әсирдин ошуқ вақит мабайнида яш әвлатни дәрисликләр билән тәминләш йолида хизмәт қилип келиватиду. Шундақла мән һәртәрәплимилик қабилийәткә егә шаирә Патигүл Мәхсәтовани паалийәтчан аялларниң қатариға ятқузимән. Дилмурат БАҺАРОВ, нахшичи: — Әлвәттә, ундақ аяллар биздә бар. Шуларниң ичидин мән язғучи вә шаир Дүрнәм Мәшүрованиң исмини алаһидә атап өткүм келиду. У бир нәччә китапниң муәллипи. Көплигән нахша мәтинлирини язди. Шундақла драматургия саһасиниң тәрәққиятиғиму үлүш қошуп кәлмәктә.

205 рет

көрсетілді

0

пікір
Алдыңғы мақала Аниниң гүллири
Келесі мақала МОМАЙЛАР

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *