• Йеңилиқлар
• 26 Сәуір, 2013

Бала шатлиғи — аләм шатлиғи

Йеқинда Панфилов наһийәлик һакимийәтниң мәҗлисләр залида қәнт диабети билән ағрийдиған балиларға ғәмхорлуқ көрситишкә беғишланған акция болуп өтти. Униңға наһийәлик мәслиһәтниң депутатлири, «Нур Отан» ХДПниң Панфилов наһийәлик шөбисиниң җавапкәр хадимлири, бирқатар мәһкимиләрниң рәһбәрлири билән саламәтликни сақлаш вә билим бериш саһасиниң вәкиллири қатнашти. Мәзкүр чарә-тәдбиргә наһийәлик мәслиһәтниң кативи Тилеуберген Оспанов риясәтчилик қилди. Наһийәлик мәслиһәтниң депутати Қурманжан Ахметқалиев, наһийәлик ағриқханиниң врачлири Ақмарал Мурзатаева билән Бейбетгүл Наурызбаева вә башқилар сөзгә чиқип, тәвәдә қәнт диабетиға муптила болған балиларға көрситиливатқан ғәмхорлуқ даирисини кәңәйтиш, улар үчүн мәхсус дукан ечип, озуқ-түлүк мәһсулатлирини әрзәнлитилгән баһада сетивелишиға имканийәт яритиш мәсилилирини оттуриға қойди. Бу тәклипләр акция иштракчилири тәрипидин бир еғиздин қоллап-қувәтләнди. Қурманжан Ахметқалиевниң тәшәббуси билән қәнт диабети ағриғиға учриған вә башқиму ағриқлар билән ағрип, мүмкинчилиги чәкләнгән 13 балиға әмәлий ярдәм көрситилидиған болди. Ениғирақ ейтқанда, уларға «Көктал-Аришаң» санаторийисидә дәм елиш үчүн һәқсиз йолланмилар берилди. Буниңға Закир Кузиев, Мурат Аубәкиров, Болат Хусаинов, Марат Дауров қатарлиқ тиҗарәтчиләр һамийлиқ қилди. Акциядә шундақла тиҗарәтчи Серик Ақсубаев Чоң Чиған йезисида истиқамәт қилидиған, қәнт диабетиға учриған Бәхтишат Мәмәтәлиевқа компьютер соға қилди. Мошундақ ғәмхорлуқлар үчүн униң аниси Адиләм акция қатнашқучилириға өзиниң сәмимий миннәтдарлиғини билдүрди.

Нурәхмәт ӘХМӘТОВ.

Панфилов наһийәси.