• Җәмийәтлик тәшкилатларда
• 31 Мамыр, 2013

Йеңи рәис сайланди

Дүшәнбә күни Панфилов наһийәлик Мәдәнийәт өйидә наһийәлик Уйғур этномәдәнийәт мәркизиниң һесават-сайлам конференцияси болуп өтти. Униңда мәркәзниң вә униң йенидики тәптиш комиссиясиниң һесаватлири тиңшилип, тәшкилий мәсилә қаралди. Конференциядә мәркәз рәиси Реһимҗан Тохтахунов һесават доклад билән сөзгә чиқти. Докладта өткән вақит ичидә мәзкүр тәшкилат тәрипидин әмәлгә ашурулған ишлар һәққидә тәпсилий ейтилди. Шуниңдин кейин тәптиш комиссиясиниң рәиси Зәйтүнәм Василованиң һесавити тиңшалди. Конференциядә Пәнҗим йеза округи йенидики Ақсақаллар кеңишиниң рәиси, наһийәниң Пәхрий граждани Әхмәтҗан Надиров, Билал Назим намидики оттура мәктәпниң мудири, наһийәлик мәслиһәтниң депутати Шеринай Һасанова, Жамбул намидики оттура мәктәпниң муәллими, мәркәз йенидики Яшлар кеңишиниң әзаси Зулфия Тейипова музакирә сөзгә чиқип, мәркәзниң иш-паалийитигә қанаәтлинәрлик баһа бәрди. Конференциядә тәшкилий мәсилә қарилип, мәркәзниң йеңи рәислигигә Х.Һәмраев намидики оттура мәктәпниң мудири, мәркәз рәисиниң орунбасари Қәһриман Илахуновниң, мәркәз йенидики Яшлар кеңишиниң рәиси Сүлһи Мәшрәповниң вә «Ассад групп» логистикилиқ ширкитиниң рәһбири Дилшат Насировниң намзатлири көрситилди. Бирақ дәсләпки иккиси, объектив сәвәпләргә бола, өз намзатлирини еливетишни илтимас қилди. Нәтиҗидә конференция делегатлириниң йәкдиллиқ қоллап-қувәтлиши билән Дилшат Насиров Панфилов наһийәлик Уйғур этномәдәнийәт мәркизиниң рәиси болуп сайланди. Дилшат Һүсәйин оғли кейинки жилларда шәхсий тиҗарәт билән шуғуллинип кәлмәктә. Рәпиқиси Сүрийәм Һезимова билән «Ирадә» вә «Ирадә-Белиқ» егиликлирини тәшкил қилип, үлгә-ибрәт боларлиқ ишларни әмәлгә ашуруватиду. Буниңдин ташқири, нами кәң аммиға мәлум болған «Ирадә» нахша-уссул ансамбли мошу әр-аял тиҗарәтчиләрниң һамийлиғида паалийәт елип бармақта. Уларниң мәдәнийитимиз билән маарипимизниң һәқиқий җанкөйәрлири сүпитидә жүргүзүватқан ишлириму һәммигә мәлум. Шундақла хәйри-еһсанлиқ ишлириму аз әмәс. Бу әр-аялниң исимлири Яркәнт тәвәсидила әмәс, униң сиртидиму чоңқур һөрмәт-еһтирам билән тилға елиниду. Конференциядә ҖУЭМниң рәиси Шаһимәрдан Нурумов,  ҖУЭМниң пәхрий рәиси, Алмута шәһәрлик мәслиһәтниң депутати Әхмәтҗан Шардинов, Алмута вилайәтлик Уйғур этномәдәнийәт мәркизиниң рәиси Реһимҗан Тоқаев,  Қазақстан хәлқи Алмута вилайәтлик Ассамблеяси кативатиниң рәһбири Ғәбит Турсынбай, «Қазақ газеттері» җавапкәрлиги чәкләнгән йолдашлиғи Баш мудириниң мәслиһәтчиси, Қазақстанниң хизмәт көрсәткән әрбаби Йолдаш Азаматов, «Нур Отан» ХДП Алмута шәһәрлик шөбиси Сәясий кеңишиниң әзаси Асимҗан Злавдинов, наһийәлик Уйғур этномәдәнийәт мәркизи йенидики Ақсақаллар кеңишиниң рәиси Қурван Худайбәрдиев сөзгә чиқти. Улар Реһимҗан Тохтахуновниң жигирмә жилдин ошуқ ишини мәмнунийәт билән тилға елип, униң паалийитигә жуқури баһа бәрди вә Пәхрий ярлиқлар билән тәшәккүрнамиларни вә хатирә соғиларни тапшурди. Шуниң билән бирқатарда Дилшат Насировниң кәлгүси паалийитигә муваппәқийәт тилиди. Ахирида наһийә һакими Махаббат Бигелдиев сөзгә чиқип, мәркәзниң көпмилләтлик наһийә аһалисиниң өзара достлуғи билән инақлиғини техиму мустәһкәмләш йолида жүргүзгән үлгилик ишлирини миннәтдарлиқ билән тилға алған һалда буниңдин кейинму шундақ болуп қеливеришиға тиләкдашлиқ билдүрди. Шундақла һаким сабиқ рәискә көп жиллиқ әмгиги үчүн рәхмәт ейтип, үстигә чапан япти.

Нурәхмәт ӘХМӘТОВ. Панфилов наһийәси.

  Дилшат Насиров 1959-жили ШУАРниң Үрүмчи шәһиридә туғулған. Әмгәкчиқазақ наһийәсиниң Байсейит йезисидики И.Тайиров намидики оттура мәктәпни, андин Қазақ полетехника институтиниң металлургия факультетини тамамлап, кәспи бойичә Павлодар вилайитидики «Майқан» алтун канида, СССР «Госкоминтуристниң» «Қорғас» шөбисиниң мудири лавазимида ишлигән. 1990-жили «Қорғас» ҖЧЙни тәшкил қилип, тиҗарәт билән шуғулланди. 2005-жилдин буян «Ассад групп» логистикилиқ ширкитиниң рәһбири  Тәбрикләймиз Қазақстан хәлқи Ассамблеясиниң әзаси, Панфилов наһийәлик Уйғур этномәдәнийәт мәркизиниң сабиқ рәиси Реһимҗан Тохтахунов Қазақстан хәлқи Ассамблеясиниң «Бірлік» алтун медали билән мукапатланди.Бу мукапатни униңға Талдиқорған шәһиридә Алмута вилайитиниң һакими, Қазақстан хәлқи Алмута вилайәтлик Ассамблеясиниң рәиси Ансар Мусаханов тәнтәнилик шараитта тапшурди. Әйнә шу мунасивәт билән Реһимҗан Имир оғлини «Уйғур авази» гезитиниң оқурмәнлири намидин сәмимий тәбрикләп, келәчәк иш-паалийитигә муваппәқийәтләр тиләймиз.