• Йеңилиқлар
• 14 Маусым, 2013

Яшлар жигитбашлири бирләшмисиниң рәиси сайланди

Йеқинда Алмута шәһириниң Һөҗҗәт мәһәллисидики «Дидар» кафесида мәзкүр мәһәллидә 20 жил жигитбеши болуп ишләп, жут ичидики өмлүкни сақлашқа көп күч чиқарған Әхмәтҗан Музәппәровниң хатирисигә беғишланған яшлар мәшриви болуп өтти.Униңда яшлар өзлириниң тәшкилий мәсилилириниму муһакимә қилди.  Җүмлидин Алмута шәһәрлик Уйғур яшлири мәшривиниң беги Бурһандин Таҗидинов йеқинда өткән яшлар жигитбашлириниң баш қошушида наһийәләр бойичә яшлар жигитбашлири бирләшмисиниң рәислири бәкитилгәнлигини хәвәрлиди. Мәсилән, Алмута шәһириниң Алатав наһийәсидин — Дилмурат Кәнҗиев, Алмалы наһийәсидин — Рәһимҗан Иминов, Әвезов наһийәсидин — Руслан Чимбулатов, Бостандық наһийәсидин — Аббас Мәңсүров, Жетысу наһийәсидин — Қурванҗан Һасанов, Түрксиб наһийәсидин — Йолдаш Һәмраев  яшлар жигитбашлири бирләшмисиниң рәиси болуп сайланған. (Медев наһийәсидә техи сайлам өтмиди). Шуниңдин кейин Бурһандин Таҗидинов мәшрәпкә һәрбир наһийәдин 15 — 20дин вәкил кәлгәнлигидин пайдилинип, Алмута шәһәрлик Уйғур яшлири жигитбашлири бирләшмисиниң рәисини сайлаш мәсилисини күн тәртивигә қойди. Уни һәммә қоллап-қувәтләп, 7 наһийәдин 7 намзат көрситилди. Муһакимиләрдин кейин көпчиликкә «Дияр» ансамблиниң нахшичиси Рустәм Ниязов Алмута шәһәрлик Уйғур яшлири жигитбашлири бирләшмисиниң рәиси болуп сайланди. Рабик ҺЕЗИМОВ. Алмута шәһири.