• Йеңилиқлар
• 14 Маусым, 2013

Мәликәмниң утуғи

Кейинки вақитларда қара көзлиримизниң һәрхил пән олимпиадилириға, конкурсларға қатнишип, вилайәтлик, һәтта җумһурийәтлик байқашларда мукапатлиқ орунларни егиләп келиватқанлиғи  адәмни хошал қилиду.Җүмлидин Алмутидики 44-мәктәп-гимназияниң 11-синип оқуғучиси Мәликәм Мухтәрова Байқоңур вә Павлодар шәһәрлиридә өткән  ІХ «Дарын»  хәлиқара илмий лайиһиләр конкурсиға қатнишип, ІІІ орунни йеңивалди. Мәликәмниң илмий әмгиги «Каинат әхлити Йәр шарини паскинилаштуридиған мәнбәдур» дәп атилиду. Мавзудин көрүнүп турғинидәк, зерәк қиз наһайити мурәккәп, шуниң билән биллә интайин муһим мәсилини тәтқиқ қилишқа җүръәт қилған. У бу ишниң һөддисидин толуқ чиқишиға мәдәт бәргән биология пәниниң муәллими Г.Ахметова билән Абай намидики Қазақ миллий педагогика университетиниң доценти, кафедра башлиғи Г.Сабденалиевадин бәк миннәтдар. Мәликәм бу утуғи үчүн Биртуташ миллий тесттин бошитилғанлиғи һәққидә сертификат, Қазақстанниң һәрқандақ алий оқуш орниға чүшүш һоқуқини беридиған диплом-грант, шундақла «Үркер» алтун бәлгүсини елишқа муйәссәр болди. Биз бу илим саһасида чечәк атқан яш ғунчиға кәлгүсидә атақлиқ алимлар қатаридин көрүнүшигә тиләкдашлиқ билдүримиз. Мәһәмәтҗан ҺАПИЗОВ. Алмута шәһири.