• Йеңилиқлар
• 14 Маусым, 2013

Алдимизда миқияслиқ вәзипиләр туриду

Чаршәнбә күни Қазақстан Җумһурийитиниң Президенти йенидики Мәркизий коммуникацияләр хизмити мәркизидә өткән мәтбуат конференциясиниң асасий мавзуси җәмийитимиздики дөләт билим бериш сәясити тоғрилиқ болди. Мәтбат конференциясигә қатнашқан Билим вә пән министрлигиниң мәсъул кативи Әлия Ғалымова журналистларни министрлик тәрипидин әмәлгә ашурулуватқан ишлар тоғрилиқ хәвәрдар қилди. Мәсилән, униң тәкитлишичә, Дөләт рәһбириниң дохтурлар билән муәллимләрни баш-айиғи йоқ қәғәз толтуруштин техичә бошатмидиңлар, дегән тәнқитиниң нәтиҗиси сүпитидә әнди муәллимләр тапшуридиған һесаватларниң шәкли 467дин 166ғичә қисқарди. Шундақла мәтбуат конференциясидә муәллимләрниң билимини мукәммәлләштүрүш йөнилишидә әмәлгә ашурулуватқан ишлар тоғрилиқму сөз болди. Мәлум болушичә, өткән жили җумһурийәт бойичә 7884 педагог өз билимини мукәммәлләштүрүпту. Бийил йәнә 10 миң муәллим билимини мукәммәлләштүриду. Министрлик мәсъул кативиниң тәкитлишичә, кәспий билимини йетилдүрүш муәллимниң маашиғиму хелә тәсир көрситиду. Буниңдин кейин курсни тамамлиған педагог мәхсус клафикациялик емтиһан тапшуруп, униң нәтиҗисигә қарап, айлиқ маашиға 30, 70, һәтта 100 пайиз қошумчә һәқ алалайду. Мәсилән, һәптисигә 18 саатлиқ жүклимә билән ишләватқан алий дәриҗилик муәллим курста қолға кәлтүргән нәтиҗисигә мувапиқ оттура һесапта 122  286 тәңгә айлиқ алиду. Униңдин кейин Әлия Ғалымова билим мәһкимилирини мәбләғ билән тәминләш мәсилисидики йеңилиқлар билән ортақлашти. Униң тәкитлишичә, башланғуч, оттура вә умумий оттура билим беришни мәбләғ билән тәминләш җан бешиға, йәни оқуғучи саниға қарап һесаплиниду. Мундақ ейтқанда, мәктәпкә бөлүнидиған мәбләғ дөләт билим бериш тапшурмисини орунлаштуруш арқилиқ йешилиду.