• Йеңилиқлар
• 05 Шілде, 2013

Тилға һөрмәт – әлгә һөрмәт

Йеқинда «Бирлик» җәмийәтлик фонди «Ахыска» түрк этномәдәнийәт мәркизи билән һәмкарлиқта Қазақстан Җумһурийити Президентиниң йенидики яшлар сәясити бойичә кеңишиниң һәм Қазақстан хәлқи Ассамблеясиниң қоллап-қувәтлиши билән «Тилға һөрмәт — әлгә һөрмәт» мавзуси астида  интеллектуаллиқ-шоу уюштурди. Мәзкүр чарә-тәдбирниң мәхсити 18 — 25 яшқичә болған яшлар арисида дөләт тилини үгиниш, этносларара толерантлиқ билән җәмийәтлик келишимниң қазақстанлиқ үлгисини тәрғибат қилиш болуп һесаплиниду. Бүгүнки таңда дөләт тилиниң қоллиниш даирисини кәңәйтиш һаят тәливи. Шуңлашқа яшларниң дөләт тилиға болған қизиқиши күн санап өсүватиду. Мәзкүр паалийәткә қатнашқан онға йеқин һәрхил милләт вәкиллири пәқәт қазақ тилида сөзләпла қоймай, уни мукәммәл өзләштүргинигә көз йәткүзгән адил қазилар топи йәкүн чиқиришта хелә қийналғанлиғини ейтип өтүш орунлуқ.  Амма, һәрқандақ бәйгидә униң ғалиплириниң болуши тәбиий. Үч басқучтин сүрүнмәй өткән рус хәлқиниң вәкили Серохвостова Елена биринчи орунға егә болса, иккинчи орунға уйғур қизи, кәспи бойичә бухгалтер-ревизор Руқийәм Низам, 3-орунға Егор Жернов  мувапиқ дәп тепилип, ғалипларға Түркияни зиярәт қилиш үчүн йолланма берилди. Конкурс йәкүнидә барлиқ қатнашқучиларға «Бирлик» җәмийәтлик фонди вә «Ахыска» түрк этномәдәнийәт мәркизи тәрипидин баһалиқ соғилар тапшурулди. Уйғур яшлири арисида өткүзүлүватқан һәрхил чарә-тәдбирләрдә дайим көзгә чүшүп, көпкә үлгә болуватқан «Бирлик» җәмийәтлик фонди йенидики яшлар кеңишиниң рәиси Руқийәм Низамни бу утуғи билән қизғин тәбрикләп, келәчәктә йәниму зор муваппәқийәтләргә йетишигә тиләкдашлиқ билдүримиз. Мәликә НӘЗӘРОВА.