• Йеңилиқлар
• 11 Шілде, 2013

Яхши хошнидарчилиқ вә иттипақдашлиқ роһида

Қазақстан Президенти Нурсултан Назарбаев Россия Федерациясиниң Президенти Владимир Путин билән учрашти. Учришишта иккитәрәплимә мунасивәтләрни техиму тәрәққий әткүзүшниң, шундақла май ейида Астанада болуп өткән Алий Евразия ихтисадий кеңиши мәҗлисиниң йәкүнлири бойичә қолға кәлтүрүлгән келишимләрни әмәлгә ашурушниң асасий мәсилилири қаралди. Нурсултан Назарбаев Владимир Путинға сәпәр билән кәлгәнлиги үчүн миннәтдарлиқ билдүрди вә икки дөләт оттурисидики һәмкарлиқниң жуқури дәриҗигә егә болуватқанлиғини атап көрсәтти. — Дөләтлиримиз билән хәлиқлиримиз оттурисидики өзара мунасивәтләр җошқун тәрәққий етиватиду, буни алий дәриҗидики учришишларниң көпләп өткүзүлүп, турақлиқ пикир елишишниң орун еливатқанлиғи испатлимақта.  Ихтисадий вә сәясий мунасивәтләр наһайити чоңқур, Бажхана иттипақи, Бирпүтүн ихтисадий кәңлик вә қурулуватқан Евразия ихтисадий иттипақи даирисидики җәриянлар тәрәққий етиватиду. Бийил күздә Екатерингбургта Регионларара һәмкарлиқ форуми даирисидә учришиш өткүзүлүп, униңда мәмликәтләр оттурисидики яхши хошнидарчилиқ вә иттипақдашлиқ тоғрилиқ асаслиқ шәртнамиға тәйярланған өзгиришләр киргүзүлүши мүмкин. Мошуниң һәммиси дөләтлиримиз оттурисидики өзара һәрикәттә һечқандақ һәл қилинмайдиған проблемиларниң йоқ екәнлигини көрситиду. Сизниң биз Астананиң 15 жиллиғини нишанлаватқан күнләрдә мошу йәрдә болуватқанлиғиңизға хурсәнмән, — деди Қазақстан Президенти. Өз новитидә Владимир Путин Нурсултан Назарбаевни өтүп кәткән туғулған күни, шундақла Пайтәхт күни билән тәбрикләп, ишиға утуқ тилиди. — Сиз Қазақстан үчүн наһайити нурғун нәрсини әмәлгә ашурдиңиз вә йәниму көп ишларни қилидиғанлиғиңизға ишинимән. Пайтәхт күниму Сизниң күниңиз — чүнки бу Сизниң шәһириңиз. Мән Сизниң униңға өз пәрзәндиңиздәк җан дилиңиз билән иллиқ-сәмимий мунасивәт қилидиғанлиғиңизни билимән. Сөзсизки, мошундақ җошқун тәрәққий етиватқан шәһәрдә яшаш пурситигә егә болған қазақстанлиқлар, Астана турғунлири үчүн хошалмән. Иккитәрәплимә мунасивәтләргә кәлсәк, биз космос паалийитини қошуп һесаплиғанда, уларниң һәммисини муһакимә қиливатимиз. Әпсуски, бу һечким планлимиған вақиәләр йүз беридиған саһа. Моҗут мәсилиләр һәл қилиниду, биздә айрим бирләшкән иш программиси бар. Шундақла асаслиқ келишим вә интеграция мәсилилириму наһайити муһим һесаплиниду. Сиз, маһийәттә, бизниң Бажхана иттипақиниң асасини салған атиси, бу Сизниң идеяңиз вә биз уни изчил тәрәққий әткүзимиз. Биз һазир униң пайда бериватқанлиғини сезиватимиз вә у дуниявий ихтисаттики мурәккәп җәриянларда алаһидә әһмийәткә егә. Интеграциялик характердики мунасивәтләр биздиму өз әксини тепиватқан дуниявий егиликтики кәскин проблемиларни йеникләштүрүш имканийитини бериватиду, — деди Россия Федерациясиниң Президенти. Униңдин ташқири Президентлар, келәр жилға планлиниватқан коалиция әскәрлирини елип чиқиш нуқтәий нәзәридин, Авғанстандики вәзийәтни қошуп һесаплиғанда, муһим хәлиқара мәсилиләрни муһакимә қилди. Қазақстан Президенти Мисир вә Сириядики җәриянларниң башқа мәмликәтләр үчүн савақ болуватқанлиғини тәкитлиди. — Бу нәқ сәлбий мисал болуп, җәмийәткә униң билән меңишқа болмайду, — дәп тәкитлиди Нурсултан Назарбаев. Владимир Путинму Йеқин Шәриқтики вә Шималий Африкидики вақиәләргә тохталди. — Сирия гражданлар уруши чаңгилида қалди. Қанчилик паҗиәлик болмисун, һәр еһтималға қариғанда, Мисирму мошу йөнилиштә кетип бариду. Мисир хәлқиниң вәзийәтниң әйнә шундақ еһтимал сәлбий тәрәққий етишини баштин кәчүрмәслигини халиған болар едим, — деди Россия Федерациясиниң Президенти.