• Йеңилиқлар
• 15 Тамыз, 2013

Гезитхан рәхмәт ейтиду

Мошуниңдин бираз вақит илгири автобус бекәтлириниң биридә қол сумкамни унтуп қаптимән. Униң ичидә өзәмниң шәхсий гуванамәм, баламниң медицинилиқ тәкшүрүштин өткән һөҗҗәтлири вә 121 миң тәңгә пул бар еди. Буни мән өйгә кәлгәндин кейин бирақла билдим. У күни, немишкиду, мениң үчүн һаят тохтап қалғандәк билинди. Өзәмни қояр җай тапалмай, бәк қийналдим. Арилиқтин икки сааттәк вақит өтүп, янфонум җириңлап кәтти. Маңа телефон қилған натонуш бир аял сумкамни тепивалғанлиғини ейтти. Иккимиз илгәрки «Саяхат» автовокзали орунлашқан җайда учришишқа келиштуқ. Мән ичимдә «Бирси пулни еливелип, сумкамни ташлаветиптудә» дәп ойлидим. Шуниңғиму шүкри қилип йолға чиқтим. Һасирап-һөмүдәп келишкән җайға йетип кәлдим. Һелиқи аял мени дәрһал тепивалди. «Сизни гуванамиңиздики сүритиңиз арқилиқ издидим», деди у. У маңа сумкамни тапшурди. Ичидә һөҗҗәтлирим билән биллә пулму бар екән. Хошаллиғимдин униңға 10 миң тәңгә бәрмәкчи болдум. У қәтьий қарши болди. Йеқин аридики ашханиларниң биригә тәклип қилсам, Роза тутуватқанлиғини ейтти. Ахири иккимиз тонушупла хошлаштуқ. У яқ Уйғур наһийәсиниң Таштиқарису йезисида яшайдиған Гүлминәм Тохтаева екән. У маңа өзиниң телефон номерлирини берип, ағриватқан баламни Уйғур наһийәсидики аришаңға әкелишимни җекиди. Мән униңдин наһайити рази болдум. Һазирқи вақитта Гүлминәмдәк адаләтлик адәмләр наһайити кам учрайду. Иккимиз бир тонушупла қериндашлардәк болуп кәттуқ. Йеқинда униңға телефон қилип, қандақ гезит оқуйдиғанлиғини сорисам, у «Уйғур авази» өзиниң сөйүмлүк нәшири екәнлигини ейтти. Хошал болуп кәттим. Чүнки өзәм қазақ қизи болғачқа, шуни ениқ ейталаймәнки, ана тилида билим елип, өзиниң ана тилидики гезитни сөйүп оқуйдиған шәхсләрла әйнә шундақ Гүлминәмгә охшаш қәлби таза, нийити пак болиду. Мән Гүлминәмгә «Уйғур авази» гезити арқилиқ өзәмниң миннәтдарлиғимни изһар қилмақчимән. Аиләм намидин униңға мустәһкәм саламәтлик, аилисигә хатирҗәмлик тиләймән.

 Гүлнур АХМЕТОВА.

 Алмута шәһири.