• Йеңилиқлар
• 16 Қаңтар, 2012

Комиссия ишини аяқлаштурди

Һөкүмәт комиссияси өзиниң Жаңаөзен шәһиридики ишини тамамлиди. 10-январь күни Һөкүмәтниң мәҗлисидә нефтьчилар шәһирини әслигә кәлтүрүш мәсилилири новәттики қетим муһакимә қилинди. Һөкүмәт комиссиясиниң рәһбири — «Самруқ-Қазына» фондиниң рәиси Өмирзақ Шөкеев Премьер-Министр алдида әмәлгә ашурулған ишлар тоғрилиқ һесават бәрди. Униң сөзичә, шәһәрликләр һаяти толуқ назарәт астида болуватиду, уни тазилаш ишлири болса аяқлашти. Униңдин ташқири, шәһәрни вә униңға йеқин аһалилиқ пунктларни аватлаштуруш ишлири давамлишиватиду. Әслигә кәлтүрүш ишлири жүргүзүлүватиду. Мәлумки, аммивий тәртипсизликләр вақтида шәһәрдә 40тин ошуқ объект вәйран қилинған, көйдүрүлгән вә буланған еди. Әнди малийә мәсилисигә кәлсәк, бу йосунда комиссия аммивий тәртипсизликләр вақтида һалак болғанларниң аилилиригә бир миллион вә зәрдап чәккәнләргә 500 миң тәңгидин компенсация төләш тоғрилиқ қарар қобул қилди. Униңдин ташқири, Премьер-Министрниң тапшуруғи бойичә һазирниң өзидә бәш регионниң һәр бири Маңғыстав вилайити һакимийитиниң һесап-чотиға йүз миллион тәңгидин мәбләғ әвәтти. Умумән, Жаңаөзен шәһиридики аммивий тәртипсизликләр ақивәтлирини йоқитишқа Һөкүмәт резервидин 2 миллиард 849 миллион 204 миң тәңгә аҗритиш көздә тутулуватиду. Иштин бошитилған нефтьчиларни ишқа орунлаштуруш мәсилисигә кәлсәк, һазирқи пәйткә қәдәр 1622 әризә берилди, әризә бәргәнләрниң бесим көпчилиги (80 пайизи) «Өзенмунайгазниң» сабиқ хадимлири. Өз новитидә вилайәт һакими Бауыржан Мухаметжанов комиссия рәһбирини аһалини иш билән тәминләш мәсилисидә толуқтурди. Униң сөзичә, шәһәрни тәрәққий әткүзүшниң комплекслиқ планида Жаңаөзен аһалисини Индустриаллаштуруш хәритиси даирисидә вуҗутқа кәлтүрүлүватқан иш орунлириға орунлаштуруш имканийити бар. Умумән, Өмирзақ Шөкеевниң пикричә, Һөкүмәт комиссияси барлиқ ишларни хелә дәриҗидә нәтиҗидарлиқ вә өз вақтида әмәлгә ашурди.                                                                               Һәммисиниң саламәтлиги яхши Жаңаөзен шәһириниң мәркизий ағриқханисидин өткән жили декабрь ейиниң оттурисида орун алған тәртипсизликләр вақтида зәрдап чәккәнләрниң һәммиси чиқирилди. — Һазир шәһәрлик мәркизий ағриқханида 16-декабрьдики тәртипсизликләрдин зәрдап чәккәнләр йоқ. Җараһәтләнгән ахирқи икки бемар 4-январь күни чиқирилди, — деди журналистларға ағриқхана баш врачиниң давалаш ишлири бойичә орунбасари Раушан Жаппарова. Униң сөзичә, тәртипсизликләр йүз бәргән дәсләпки күнләрдә ағриқханиға 99 адәм (75игә оқ тәккән) йәткүзүлүпту.