• Йеңилиқлар
  • 23 Қаңтар, 2012

Ассамблея депутатларни сайлиди

Дүшәнбә күни пайтәхттики Течлиқ вә мәнивий разимәнлик сарийида Дөләт рәһбири, Қазақстан хәлқи Ассамблеясиниң рәиси Нурсултан Назарбаев Ассамблея тәрипидин сайлинидиған Парламент Мәҗлиси депутатлириниң новәттин ташқири сайлимида аваз бәрди вә ҚХАниң новәттин ташқири XVІІІ сессиясигә қатнашти. Сессиягә шундақла җумһурийәтлик вә регионаллиқ этномәдәнийәт бирләшмилириниң делегациялири, җәмийәт әрбаплири, илмий вә иҗадий зиялилар вәкиллири, хәлиқ ара байқиғучилар қатнашти. Сессия аваз бериш пунктини ечиш, Астана шәһәрлик сайлам комиссияси рәисиниң аваз бериш тәртивини чүшәндүрүши билән башланди. Андин кейин ҚХА әзалири өзлириниң конституциялик һоқуқини әмәлгә ашурди. Нурсултан Назарбаев әйнә шуниңға бағлиқ өткүзүлүватқан сессияниң муһим вақиәгә — Парламент Мәҗлисигә Ассамблеяниң 9 әзасини сайлашқа беғишлиниватқанлиғини тәкитлиди. Дунияда хәлиқниң һакимийәттә вакаләтлик қилишиниң мундақ механизминиң йоқ екәнлиги атап көрситилди. —    Бу Қазақстанниң демократик йеңилиғи, униңда мәмликәттә яшаватқан милләтләрниң вәкиллири алий қанун чиқириш оргиниға өз депутатлирини сайлалайду, — дәп тәкитлиди Дөләт рәһбири. Президент өткәнки сайламда ҚХАдин сайланған депутатларниң Парламент паалийитигә салмақлиқ һәссә қошқанлиғини атап өтти. Улар нурғун ишни әмәлгә ашурди. Депутатлар нурғунлиған қанунларниң қобул қилинишиға қатнашти, иҗраий һакимийәткә тәләпләрни қойди. Шундақ қилип, Ассамблея милләтләр ара вә конфессияләр ара разимәнликни тәминләш охшаш муһим вәзипини орунлап, өз ара һәрикәтни, достлуқни, турақлиқни күчәйтиш мәркизи болуп һесаплиниду. Тәкитләп өтимизки, әгәр турақлиқ тоғрилиқ гәп қилсақ, Қазақстан Кеңәш Иттипақиниң парчилинишини, Азиядики вә дуниядики малийә-ихтисадий боһранларни утуқлуқ баштин кәчүрүп, надир мустәһкәмликни намайиш қилди. Йеңи тәләп-синақларниму йеңиватиду. Мүмкин кимду-бири Жаңаөзендики тоқунуштин пайдилинишни, сәясий пай топлашни халиғанду, бирақ Дөләт рәһбириниң сөзичә, бу вақиәләр хәлиқни техиму бирләштүрди. —    Хәлиқ мәмликитимиздики хатирҗәмлик билән турақлиқни, өз ара мунасивәтлиримизни қәдир тутуш керәклигини чүшәнди, — деди Дөләт рәһбири. Мәҗлис вә мәслиһәтләр сайлиминиң йәкүнлири хәлиқниң Президент йолини қоллап-қувәтләватқанлиғиниң ярқин испати болди. Нурсултан Назарбаев сайлам кампаниясиниң алдин-ала йәкүнигә мувапиқ, «Нур Отан» партиясиниң ғалип чиққанлиғини тәкитлиди. Демәк, у һәқиқәтәнму вәтәндашлириниң арзу-үмүтлири билән яшаватқан, улар билән биллә хошал болуватқан һәм тәшвишлиниватқан хәлиқ партиясидур. Нурсултан Әбиш оғлиниң тәкитлишичә, қазақстанлиқлар «Нур Отан» партиясигә чәксиз вакаләтлик бәрди, мәмликитимиздики бирлик, турақлиқ үчүн, буниңдин кейинки тәрәққият, Президент тәрипидин бәлгүләнгән, тәклип қилинған программиларниң әмәлгә ашурулуши үчүн аваз бәрди. Биринчи новәттә, бу Сүръәтлик индустриал-инновациялик тәрәққият программиси, иш билән тәминләш, барлиқ аһалилиқ пунктларни ичидиған су билән тәминләш, турушлуқ өй-коммунал егилигини реконструкция қилиш, аграр секторни тәрәққий әткүзүш, «Тиҗарәт — 2020» программилиридур. Мошу вә барлиқ башқа тәшәббуслар қазақстанлиқларниң ишқа егә болушиға, уларниң турмушиниң болса, жилдин-жилға яхшилинишиға қаритилған. Дөләт рәһбири шундақла, бәлгүләнгән планларни әмәлгә ашурғанда һәр дайим Ассамблея әзалириға тайинип кәлгәнлигини тәкитлиди. Тәрәққиятниң йеңи басқучида у ҚХАни хәлиқ билән техиму қоюқ ишләшкә чақирди. Улуқ мәхсәтләрни әмәлгә ашуруш үчүн көп әмгәк қилиш керәк. Бу болупму яшларға мунасивәтликтур. Қазақстанда яшларниң өзини өзи көрситиши үчүн барлиқ шараит яритилған. Индустриал программилар арқилиқ йеңи жуқури квалификациялик вә жуқури һәқ төлинидиған иш орунлири вуҗутқа кәлтүрүлүватиду. Йеза егилигидә 54 мал бодаш мәйдани, 2300 фермер егилиги болған чарвичилиқ комплекси тәшкил қилинип, униңда он миңлиған йеңи иш орунлири ечилиду. —    Бирлик, турақлиқ, мәмликитимиздә яшаватқанларниң һәммисиниң тәң һоқуқлуғи — бу бизниң асасий вәзипимиз, — дәп тәкитлиди Президент. Дөләт рәһбири ҚХА әзалириға сайламға паал қатнашқанлиғи үчүн миннәтдарлиқ билдүрди вә Ассамблеядин сайланған депутатларни тәбриклиди. Астана шәһәрлик сайлам комиссияси елан қилған нәтиҗиләр бойичә Қазақстан хәлқи Ассамблеясидин тоққуз адәм Парламент Мәҗлисиниң депутати болуп сайланди. Сөз — сессия қатнашқучилириға Әхтирим ӘХМӘТОВА, ҖУММ йенидики Ханим-қизлар кеңишиниң рәиси: — Қазақстан хәлқи Ассамблеясиниң сессиясигә қатнишишниң өзи һәр қандақ адәм үчүн чоң бәхит вә амәт дәп билимән. Мән әйнә шундақ бәхиткә еришип, амәтлик болғанлиғим билән пәхирлинимән. Сессиядә Қазақстан хәлқи Ассамблеясидин Парламент Мәҗлисигә сайланған депутатларни Президент Нурсултан Назарбаев тәбрикләп болғандин кейин сессиягә рәислик қилғучи Ералы Тоғжанов саат 12.00да Мәркизий сайлам комиссиясиниң рәиси Қуандық Турғанқуловниң 15-январь күни өткән сайламниң алдин-ала нәтиҗилири  тоғрилиқ уттур эфир арқилиқ сөзгә чиқидиғанлиғини хәвәрлиди. Биз, сессия иштракчилири, залда олтирипла сәһнигә орнитилған йоған монитор арқилиқ Мәркизий сайлам комиссияси рәисиниң хәвирини тиңшидуқ. У «Нур Отан» Хәлиқ-демократик партияси сайлиғучиларниң 80 пайиздин ошуқ авазини жиғип ғалип чиққанлиғини ейтқанда залда гүлдүрлигән чаваклар садаси яңриди. Андин ҚХА әзалири намидин Ералы Тоғжанов Президентни партияниң утуғи билән сәмимий тәбриклиди. Шәхсән мән бу қетим болуп өткән сайлам елимиздики демократияниң ярқин бир көрүнүши болғанлиғи тоғрилиқ ениқ тәсәввурға егә болдум. Әнди Президентимиз Ассамблея минбиридин өткән жили Жаңаөзен шәһиридә йүз бәргән қалаймиқанчилиқлар тоғрилиқ ейтип, униңға өзиниң баһасини бәргәндә елимиздики сәясий турақлиқ билән җәмийәтлик разимәнликкә һеч қандақ күч тосалғу болалмайдиғанлиғиға йәнә бир қетим толуқ көз йәткүздим. Йәкүнләп ейтсам, болуп өткән сайламда хәлиқ келәчәк үчүн аваз бәргәнлиги, сайламда утуққа йәткән партияләр билән һәр хил дәриҗидики мәслиһәт депутатлириниң үмүт-мәхсити келәчигимизниң техиму парлақ болуши үчүн хизмәт қилишқа қаритилғанлиғи ениқ болди. Абдурешит  МӘХСҮТОВ, ҖУММ йенидики Жигит башлири кеңишиниң рәиси: — Мән Қазақстан хәлқи Ассамблеясиниң әзаси сүпитидә униң сессиясигә дәсләпки қетим қатнаштим вә җәмийитимиз һаятидики әң муһим сәясий вақиәләрниң бири болған Парламент Мәҗлисиниң депутатлиғиға ҚХАдин көрситилгән намзатларни сайлаш имканийитигә егә болдум. Тоққуз намзатниң арисида хәлқимизниң вәкили — җумһурийәтлик Уйғур мәдәнийәт мәркизиниң башқарма әзаси Мурат Әхмәдиевниңму бар екәнлиги шәхсән мениңда алаһидә пәхирлиниш һиссиятлирини пәйда қилди. Сайлам бюллетеньлирини алған Ассамблеяниң 335 әзасидин 303 адәм Мурат Абдрим оғлини яқлап аваз бәргәнлиги ениқланғанда, елимизниң алий қанун чиқириш оргинида хәлқимиз вәкилиму паалийәт елип баридиғанлиғи мәлум болди. Сессиядә нутуқ билән сөзгә чиққан Нурсултан Назарбаевниң «Пәқәт бизниң елимиздила җумһурийәт территориясидә яшаватқан милләтләр алий қанун чиқириш оргиниға өз депутатлирини сайлаш һоқуқиға егә» дәп ейтти. Дәрһәқиқәт, Қазақстан хәлқи Ассамблеяси охшаш надир институтниң дунияда тәңдиши йоқ болса керәк. Раст, мундақ институтлар башқа дөләтләрдиму моҗут. Лекин уларниң һеч қайсиси парламентлириға өз депутатлирини сайлаш бойичә конституциялик һоқуққа егә әмәс. Пәқәт Қазақстанниң Тунҗа Президенти — Милләт Лидери Нурсултан Әбиш оғлиниң дана миллий сәясити түпәйли аз санлиқ һесаплинидиған милләтләр елимиз Парламентиға өз вәкилини сайлаш мүмкинчилигигә егә. Бу мустәқил елимизда демократик җәриянларниң пәйдин-пәй қелиплишиватқанлиғиниң ярқин бир көрүнүши болса керәк. Қазақстан хәлқи Ассамбелясиниң Рәиси, Президент Нурсултан Назарбаевниң нутқини диққәт билән тиңшап, уни бир нәччә қетим гүлдүрлигән давамлиқ чаваклар билән алқишлидуқ. Өз новитидә Президент болуп өткән Парламент сайлимида ғалип чиққан «Нур Отан» ХДПниң хәлқимизниң турмуш дәриҗисини техиму көтириш йолида елип бериватқан көптәрәплимилик паалийитини сайлиғучиларниң бесим көпчилиги толуқ қоллап-қувәтләйдиғанлиғини алаһидә мәмнунийәт билән тилға алди. ТӘҺРИРАТТИН: жуқуридики мақалилар муәллиплири — Әхтирим Әхмәтова билән Абдурешит Мәхсүтовни Қазақстан хәлқи Ассамблеясиниң әзаси болуп сайлиниши мунасивити билән сәмимий тәбрикләп, иш-паалийитигә утуқ тиләймиз.

624 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы