• Йеңилиқлар
• 23 Қаңтар, 2012

Мандатлар тәхсим қилинди

15-январь күни Қазақстан Җумһурийити Парламенти Мәҗлиси вә барлиқ дәриҗидики мәслиһәтләр депутатлириниң сайлими өткүзүлди. Сешәнбә күни Мәркизий сайлам комиссияси бәшинчи қетим сайланған җумһурийәт Парламенти Мәҗлиси депутатлириниң новәттин ташқири сайлиминиң йәкүнини елан қилди вә партиявий тизимлар бойичә аваз бериш йәкүнигә мувапиқ депутатлиқ мандатларни тәхсим қилди. Мәлумки, җумһурийәт бойичә сайлиғучилар тизимиға 9 303 693 граждан киргүзүлүп, 7 018 927 адәм яки уларниң 75,4 пайизи аваз беришкә қатнашти. Аваз бериш беналиридин сирт йәрләрдә 178 385 қазақстанлиқ аваз бәрди. Статистикиға мувапиқ, умумән җумһурийәт бойичә «Нур Отан» Хәлиқ-демократик партиясини яқлап 5 621 436 адәм яки сайлиғучиларниң 80,99 пайизи аваз бәрди. Қазақстан Вәтәнпәрвәрләр партиясигә 57 732 аваз (0,83 пайиз) берилди. «Ақ жол» Қазақстан демократик партияси 518 405 яки 7,47 пайиз авазға егә болди. Умуммиллий социал-демократик партияси үчүн 116 534 аваз (1,68 пайиз), Қазақстан Коммунистик хәлиқ партияси үчүн 498 788 аваз (7,19 пайиз), «Ауыл» Қазақстан социал-демократик партияси үчүн 82 623 аваз (1,19 пайиз), «Әділет» Демократик партияси үчүн 45 702 аваз (0,66 пайиз) берилди. Партиявий тизимлар бойичә аваз бериш йәкүнигә мувапиқ, депутатлиқ мандатлар төвәндикичә тәхсим қилинди: «Нур Отан» — 83, «Ақ жол» — 8, ҚКХП — 7 мандат. Әслитип өтимизки, дүшәнбә күни Қазақстан хәлқи Ассамблеясидин бәшинчи қетим сайлинидиған Парламент Мәҗлиси депутатлириниң новәттин ташқири сайлими болуп өтти. Униңда сайлиғучилар тизимиға 390 граждан киргүзүлүп, улардин 335 адәм яки 85,9 пайизи аваз бәрди. Барлиғи болуп 9 намзат көрситилди вә улар Қазақстан Җумһурийити Парламенти Мәҗлисиниң депутати болуп сайланди.