• Футбол
• 25 Қараша, 2016

Кубокму «Астана» әнчисидә

Пайтәхт клуби мәмликәт чемпиони унванидин кейин Қазақстан Кубогиниму йеңивалди. Мәлумки, кейинки жилларда Қазақстан Кубоги үчүн финаллиқ учришиш турақлиқ мәмликәт пайтәхтидә өткүзүлүп келивататти. Бу қетим һәммини – һәм мутәхәссисләрни, һәм ишқивазларни һәйран қалдурған һалда, финаллиқ матчни Алмутида өткүзүш қарар қилинди. Буниңда, әлвәттә, һава райи шараитиму мәлум роль ойниди – қарар қобул қилинғанда Астанада қаттиқ соғ һөкүм сүргән еди. Раст, мәмликитимизниң әң чоң шәһириму бизни анчила хошал қилмиди – бу күни Алмута вә мәркизий стадионниң өзи сөзниң һәқиқий мәнасида қар астида қалди. Кимду-бири һәқиқәтәнму мундақ җавапкәрлик матчниң йепиқ «Астана-аренада» өткүзүлмигинигә ечинди. Бирақ матч һәрқандақ һава райи шараитида өтиду. Шуңлашқа Қазақстандики икки чоң команда – «Астана» вә «Қайрат» футболчилири оюнни җанландурушқа барлиқ күчи вә маһаритини сәрип қилди. Бирақ қанчә тиришсаңму, ошуқтин ашқан қарда яхши оюн көрситиш еғир вәзипә. Мундақ шараитта оюнчилар, болупму пайтәхт футболчилири, кимниң биринчи болуп поңзәк киргүзсә, шуниң ғалип чиқидиғанлиғини алдин-ала чүшинип, учришишниң бешидин тартипла рәқивиниң дәрвазисиға кәйни-кәйнидин бирнәччә һуҗумни әмәлгә ашурди. Раст, мәйдан егилириму бош кәлмиди. Әйнә шундақ һәр икки командиниң тохталсиз һуҗумлири астида өткән биринчи тайм һечқандақ нәтиҗә бәрмиди. Учришишниң иккинчи кисми башлинип, аридин икки минут өтүпла, «Астана» һуҗумчиси Жуниор Кабананга һесапни ечип, командисини алға чиқарди. Буниңдин кейин алмутилиқлар нәтиҗини тәңләштүрүшкә қанчә һәрикәт қилсиму, һесапни өзгәртәлмиди. Һәтта уларға стадион ишчилириниң қувлуғиму – улар иккинчи таймда жутдашлири һуҗуминиң нәтиҗидарлиқ болуши үчүн мәйданниң «Астана» командиси қисмини қардин тазилиған еди – һечқандақ пайда елип кәлмиди. «Қайрат» болса, Қазақстан Кубогини сәккизинчи қетим йеңип, уни мәңгүгә өзигә қалдуруш имканийитидин пайдилиналмиди. Шундақ қилип, елимиздә футбол мәвсүми рәсмий аяқлашти. Бирақ «Астана» Қазақстанға хәлиқара мәйданда вакаләтлик қилишни давамлаштуруватиду. Мәсилән, бүгүн улар өз мәйданида Европа лигиси даирисидә Кипрниң АПОЭЛ клубини қобул қилса, декабрьда Швейцариядә «Янг Бойз» командиси билән учришиду. Шөһрәт МӘСИМОВ.