• Уйғур жутлирида
• 22 Маусым, 2017

 «Алтунбулақниң» активистлири

Шәмшидин АЮПОВ, «Уйғур авази»/ Алмута шәһиридики уйғурлар зич орунлашқан Султанқорған жутиниң күн петиш тәрипидә «Алтунбулақ» дегән кичигирәк мәһәллә бар. Униң турғунлири миллий урпи-адәтлиримизни, диний етиқатимизни сақлиған һалда өзара өм, бир-бири билән қувалишип яшаватиду. Бу жутта миллий маарипимиз билән мәтбуатимизниң җанкөйәрлириму нурғун. Йеқинда биз мәзкүр мәһәллидә болуп, әйнә шундақ жут ғемида жүргән бир топ активистлар билән учраштуқ. Мәһәллиниң жигитбеши Юнус Әршидиновниң ейтишичә, жут турғунлириниң мундақ инақ-иттипақлиғиниң һули мәһәллә бәрпа болған дәсләпки жиллардила қелиплашқан. Жутниң һули селинған дәсләпки жиллардики еғирчилиқлар, кейинирәктә миң бир җапа-мәшәқәтләр билән турғузған өйлириниң һөҗҗәтлирини рәсмийләштүрүш җәрияни, кочиларни җөндәш ишлири, уларни әйнә шундақ һәмкарлиққа, иттипақлиққа үгәткән. Уйғурларда «Жутниң ишини десә, ичиватқан ешини ташлап туруп кетиду» дегән яхши ибарә бар. Бу ибарә Юнус акиниң намиға қаритилған десәк, ашуруп ейтқанлиқ болмайду. У қириқ жилдин бери жутниң һәләкчилигидә жүрсиму, «һерип қалдим» дегән сөздин жирақ.  Жут үчүн отқиму, суғиму киридиған инсан. 75 яшниң босуғисидин атлиғиниға қаримастин, утуқлуқ иш елип бериватиду. Турғунлар арисидики бирликни мустәһкәмләш, яшларни чоң әвлатниң мунасип избасарлиридин қилип тәрбийиләш, иҗтимаий-мәдәний мәсилиләрни  «Султанқорған» җәмийәтлик бирләшмиси билән һәмкарлиқта биртәрәп қилиш охшаш ишлар билән җиддий шуғуллинип кәлмәктә. «Уйғур авази» гезитиға муштири топлаш йолидиму мәхсәтчанлиқ билән иш елип бериватиду. – «Ялғуз атниң чеңи чиқмас...» дегәндәк, маңа һәр қәдәмдә қол-қанат болуп, пикир-мәслиһәтлирини берип келиватқан Патигүл Әршидинова, Хумахан Розиева, Ялқун Әһәтов, Тилахан Әршидинова вә башқиму «Алтунбулақ»  жутиниң милләтпәрвәр  активистлиридин  алаһидә миннәтдармән, – дәйду Юнус ака сөһбәтара. – Улар жут мәнпийити үчүн паалийәтчанлиқ көрситип келиватқан инсанлар. Шуни қошумчә ейтмақчимәнки, бийил мәһәллимиздә муштирилар санини көпәйттуқ. Алла буйриса, кәлгүсидә мәһәллимиздә гезитимизниң тарилишини һазирқидәк 70 нусха әмәс, бәлки 100гә йәткүзүшкә һәммимиз болуп күч чиқиримиз. «Уйғур авази» – һәрбир уйғурниң авази, һаятимизниң әйниги. Мениңчә, миллий гезитимизға йезилмайдиған уйғур болмаслиғи керәк. Гезитимизниң қәдир-қиммити шәхсән бизниң аилә үчүн бебаһа. Гезит — рәпиқәм Патигүл иккимизниң әң йеқин һәмрайи. Әнди маңа йеқиндин яр-йөләк болуп, паалийитимни һәр җәһәттин қоллап-қувәтләп келиватқан жуқурида исимлири аталған ярдәмчилиримму мәһәллимиз турғунлириниң «Уйғур  авази» гезитиға толуқ дегидәк йезилишини тәминләп келиватиду. «Алтунбулақ» мәһәллисидики жут активистлириниң тилға алса еғиз толтуруп ейтқидәк ишлири, жутниң бәрикитини тәминләватқан чарә-тәдбирлири аз әмәс. Биз бу мақалида уларниң әмәлгә ашуруватқан чоң-кичик соваплиқ ишлириға тәпсилий тохтилип кәтмидуқ. Ундақ болғини, гезитимиз сәһипилиридә улар тоғрилиқ буниңдин илгириму йезилған. Җәмләп ейтқанда, мәзкүр мәһәллиниң активистлири, һәқиқий виждани билән тәр төкүп, җамаәтчилик ишлирини йолға қоюп, миллий әнъәнилиримизни техиму риваҗландуруш йолида көп әмгәк қиливатиду. Умумән, Султанқорғанда бүгүнки күндә әмәлгә ашурулуватқан барлиқ изгү ишларда алтунбулақлиқларниңму мунасип һәссиси бар. СҮРӘТТӘ: «Алтунбулақ» мәһәллисидики гезитимизниң бир топ җанкөйәрлири. Мәшүр САСИҚОВ чүшәргән сүрәт.