• Йеңилиқлар
• 30 Қаңтар, 2012

Роһий һаятимизниң өлчими

 «Изгүлүк пәлсәпәси» намлиқ китап жутдишимиз Турсунмәһәммәт Гәраевниң қәлимигә мәнсүптур. Китапниң намидинла көрүнүп турғинидәк, инсанларни яхшилиққа дәвәт қилидиған бу әмгәктә изгүлүккә йетишниң йоллири баян қилиниду. Мәзкүр китап асасән илим-пән әһлигә молҗаланған болуп, униңда муәллипниң дунияниң ярилиш җәрияниға нисбәтән көз қариши, пәқәт яхшилиқ чәмбири даирисидә тәрәққият басқучлири бәлгүлинидиғанлиғи, зиминдики һәр қандақ өзгириш-вақиәләрниң садир болуши инсанийәтниң әҗри-пәйлигә вә қандақтур-бир тилсим қанунийәткә бағлиқ екәнлиги, униң яратқучи нәзәридин сирт қалмайдиғанлиғи тәсвирләнгән. Китапни оқуш җәриянида муәллипниң һәртәрәплимә мәлуматлиқ, алаһидә бир ихтидарға егә шәхс екәнлигигә көз йәткүзүш мүмкин. Илмий аталғуларниң орунлуқ ишлитилиши һәм чоңқур пәлсәпәвий ой-пикирләр бизниң әйнә шундақ хуласигә келишимизгә сәвәп болди. Бу китапни оқуп чиққан адәм аләмниң бизгә намәлум айрим сирлири билән тонушуп, һаятқа нисбәтән көз қаришини өзгәртидиғанлиғи сөзсиз. Мәзкүр китап нәширдин чиққандин кейин униңға қизиққучилар вә һәр хил пикир ейтқучилар болди. Уларниң көпчилиги илим адәмлири. Мәсилән, Қазақстанға әмгиги сиңгән кәшпиятчи, биология пәнлириниң доктори, профессор Виктор Инюшин мәзкүр китап тоғрилиқ: «...Сөзсизки, «Изгүлүк пәлсәпәси» китави өзгичә бир хусусийәткә егә ғәзнә. Бу китапта җәмийәт пүтүнлигини, инсанларниң роһий паклиғини сақлаш вә шу арқилиқ тәрәққиятниң жуқури пәллисигә еришишниң асасини селиш мәхсити ипадиләнгән. Т.Гәраев китавиниң һәр қурида дегидәк адәмләрниң роһий дунияси қанчилик сағламлашқансири, униң шунчилик бебаһа пәзиләтләргә егә болидиғанлиғи қәйт қилиниду. Китап илим-пән чоққисиға көтирилгән алимлар билән бир қатарда һәр хил саһа мутәхәссислири үчүнму әһмийәтликтур. Шундақла һаяттин өз орнини тепишқа интиливатқан студентлар вә башқиму яшлар үчүн интайин пайдилиқтур...» дәп язиду. Әнди тарих пәнлириниң доктори, профессор А.К.Муминов болса: «Изгүлүк пәлсәпәси» китави әмәлиятта заманивий илим-пән муәммалирини, пәлсәпә, медицина, филология вә башқиму асаслиқ пәнләрдин ташқири дин мәсилилириниму өз ичигә алған. «Изгүлүк пәлсәпәси» китавини алим-мутәхәссисләр арисида музакирә қилип, техиму чоңқур үгиниш лазим, дәп һесаплаймән» дегән пикирни изһар қилиду. Умумән, китап йоруққа чиққандин кейин өткән қисқа вақит ичидә у һәр хил саһа алимлириниң диққәт-етивариға елинди. Уларниң арисида Қазақстан Пәнләр академияси йенидики философия вә политология институтиниң бөлүм башлиғи, философия пәнлириниң доктори, профессор Сергей Колчигин, Қазақ миллий педагогика институтиниң проректори, философия пәнлириниң доктори, профессор Ақтолқын Күлсариева, философия пәнлириниң доктори, иҗтимаий философия кафедрисиниң башлиғи, профессор  Жақыпбек Алтаев, Әл-Фараби намидики қазақ миллий университетиниң профессори, химия пәнлириниң намзити Азылбек Қоқамбаев вә башқиму исимлири илим әһлигә кәң тонулған алимлар бар. Йеқинда Челәк йезисидики «Заман» кафесида әйнә шундақ әмгәк яратқан Турсунмәһәммәт Гәраевниң 50 жиллиқ тәвәллуди һәм униң қәлимигә мәнсүп «Изгүлүк пәлсәпәси» намлиқ китавиниң тонуштуруш мәрасими болуп өтти. Униңда биология пәнлириниң доктори, профессор Виктор Инюшин, филология пәнлириниң намзити Руслан Арзиев, сәясәтшунас Қәһриман Ғоҗамбәрдиев, хәлиқ ара инновациялик технологияләр университетиниң проректори, «Бейбітшілік әлемі» хәлиқ ара қазақ иҗадий бирләшмисиниң иҗраий мудири Турсунмәһәммәт Розиев вә башқилар китапқа нисбәтән иҗабий пикирлирини изһар қилип, униң муәллипигә иҗадий утуқлар тилиди. Тәвәллуд егисигә Виктор Инюшин ғәйри һадисиләрни тәкшүрәйдиған мәхсус әсвап соға қилса, Турсунмәһәммәт Розиев «Бейбітшілік әлемі» бирләшмисиниң символлуқ медали билән Пәхрий ярлиғини тапшурди.

Мәһәммәтҗан ҺАПИЗОВ.

Әмгәкчиқазақ наһийәси.