• Йеңилиқлар
• 19 Қараша, 2020

Чегарини бирликтә күзитимиз

Гөһәрбүви Исмайилҗанова,
«Уйғур авази»

Панфилов наһийәси — чегарилиқ наһийә. Хошна ХХҖ билән чегаридаш тәвә турғунлири әл бехәтәрлигини һошиярлиқ билән күзитишни өзлириниң муқәддәс борчи һесаплайду. Лекин қанчә еһтиятчан болмайли, бәрибир чегарини бузуп, у әлдин бу әлгә өтүш үчүн һәрикәт қиливатқанлар йоқ әмәс. Мана шундақ чегара бузғучиларни қолға чүшириштә чегаричиларға биринчиләрдин болуп тәвә турғунлири ярдәмгә келиду. Шундақ екән, йеқинда Панфилов наһийәлик һакимийәтниң мәҗлис залида өткән баш қошушта шундақ бир топ чегаричилар достлириға гуванамилар тапшурулди.
Дәсләп Панфилов наһийәсиниң һакими Талғат Өмирәлиев сөзгә чиқип, чегара хизмити тоғрилиқ вә уни һошиярлиқ билән кечә-күндүз күзитиватқан әл қоғдиған жигитләрниң тинимсиз хизмитини тилға алди. Шуниңдин кейин чегара башқармисиниң башлиғи Александр Печуркин Қазақстан Җумһурийити дөләт чегарисини сақлашни күчәйтиш мәхситидә наһийәдә чегаричиларға өз әрки билән ярдәм көрситидиған топниң қурулғанлиғини тәкитләп, униң әзалириға гуванамиларни тапшурди.
Тәкитләш керәкки, наһийә бойичә 172 адәм униң әзаси болди. Уларниң арисида һәрхил саһаларниң адәмлири бар.

Панфилов наһийәси.