• Йеңилиқлар
• 19 Қараша, 2020

Билим дәргаһлири җөндәштин өтти

«Тиҗарәтниң йол хәритиси – 2020» программиси даирисидә Әмгәкчиқазақ наһийәсидә 47 билим дәргаһидә җиддий вә еқимдики ремонт ишлири жүргүзүлүватиду. Бүгүнки күнгә қәдәр 420 орунлуқ Аймен вә 600 орунлуқ Жандосов намидики оттура мәктәплириниң ремонт ишлири тамамланди.
Наһийә һакими Қуанышбек Қашқимбаевниң «JETISÝ MEDIA» мәтбуат-конференциясидә бәргән әхбаритиға қариғанда, аталған программа бойичә тәйярланған 109 лайиһиниң тәңдин-толиси орунлинип, наһийәдә 80 билим дәргаһиниң ремонт ишлири аяқлашти.
– Наһийә бойичә «Тиҗарәтниң йол хәритиси – 2020» программисини әмәлгә ашуруш үчүн дөләт бюджетидин 8 миллиард 972 миллион тәңгә бөлүнгән. Униң ичидә 7,1 миллиард тәңгә наһийәлик бюджеттин, 1,8 миллиард тәңгә вилайәтлик бюджеттин бөлүнди. Мәбләғниң нурғун қисми билим дәргаһлири билән йол инфраструктурисиға сәрип қилинди. Аймен оттура мәктиви 437 миллион тәңгигә толуқ реконструкциядин өтсә, 68 миллион тәңгигә Жандосов намидики мәктәпниң чедири авуштурулди, – деди наһийә рәһбири.
Шуниму тәкитләп өтүш лазимки, наһийә даирисидики барлиқ дәриҗидики йоллар җөндәштин өтти, улар ноябрь ейиниң ахириғичә толуқ ечилидиған болиду.Әмгәкчиқазақ наһийәсидә әмәлгә ашурулуватқан чоң лайиһиләрниң бири – су системисиниң қурулуши 2022-жили тамамлиниши керәк. Һазир униң 60 пайизи орунланди.
Наһийә һакиминиң ейтишичә, наһийәдики әң чоң су системиси 40 чақиримни тәшкил қилиду. У Ишиктә шәһири вә униң әтрапидики сәккиз йезиниң 105 миң турғунини су билән тәминләйду. Бу ишқа 880 адәм җәлип қилинди.

Әмгәкчиқазақ наһийәси.