• Йеңилиқлар
• 19 Қараша, 2020

Мәдәнийәт өйи толуқ йеңилиниду

Рашидәм РӘҺМАНОВА,
«Уйғур авази»

Әмгәкчиқазақ наһийәсиниң мәркизи Ишиктә шәһиридики турғунларниң аммивий дәм алидиған орни – наһийәлик Мәдәнийәт өйи. Бу күнләрдә у дөләтлик «Тиҗарәтниң йол хәритиси — 2020» программиси бойичә реставрациядин өтүватиду.
Мәзкүр мәдәнийәт очиғиниң ремонт қилиниши үчүн Алмута вилайәтлик бюджетидин 572 миллион тәңгә бөлүнүп, һазирғичә молҗаланған ишниң 80 пайизи әмәлгә ашти, дәп хәвәрлиди Әмгәкчиқазақ наһийәсиниң һакими Қуанышбек Қашқимбаев йеқинда өткән «Jetisý Media» мәтбуат-конференциясидә.
Умумий мәйдани 3200 квадрат-метрни тәшкил қилидиған наһийәлик Мәдәнийәт өйиниң бенаси 1982-жили қәд көтирип, ахирқи 15 жил давамида ремонт қилинмиған. Мәдәнийәт өйидә 480 орунлуқ тамашибин зали вә 30ға йеқин бөлмиләр бар. Бена җиддий ремонттин өткәндин кейин бу йәрдин бирнәччә дөләт хизмәтлиригә идарә-кабинетлири берилидиған болиду. Җүмлидин наһийәлик яшлар ресурслиқ мәркизи, тил мәркизи, яшлар сәясити бөлүмлири вә башқилар шулар җүмлисидиндур.
– Лайиһә даирисидә мәдәний-аммивий чариләрни өткүзүш, турғунларни қолһүнәрвәнчилигигә җәлип қилиш қараштурулған. Шу мәхсәттә Мәдәнийәт өйиниң бенаси мәхсус йоруқлуқ вә тавуш җабдуқлири билән тәминлинидиған болиду. Наһийә бойичә «Тиҗарәтниң йол хәритиси – 2020» программисини әмәлгә ашуруш үчүн дөләт бюджетидин 8 миллиард 972 миллион тәңгә бөлүнгән. Униң 572 миллиард тәңгиси наһийәлик Мәдәнийәт өйини җиддий җөндәштин өткүзүш үчүн хәшлиниду. Тәвәдики муниципаллиқ инфрақурулумниң асасий бөлигиниму мәдәнийәт вә спорт орунлири тәшкил қилиду. Шуңлашқиму бу чариләр йеңи иш орунлирини ечишқа мүмкинчилик туғдурупла қалмай, аһалиниң бош вақтини үнүмлүк өткүзүши, уларниң һәрхил өмәкләргә қатнишиши билән қизиқарлиқ мәдәний чариләрни уюштуруши үчүн зәмин яритиду, – деди наһийә рәһбири Қуанышбек Қашқимбаев.
Тәкитләш лазимки, Мәдәнийәт өйиниң мәҗлисләр зали заманивий акустикилиқ система билән тәминлинип, җөндәш ишлирида пәқәт Қазақстанда ишләп чиқирилған қурулуш материаллири пайдиланди.
Әмгәкчиқазақ наһийәси қурулуш бөлүминиң башлиғи Әдилжан Смағуловниң ейтишичә, бенаниң ичидики қурулуш материаллириму толуқ авуштурулуп, бенаниң тамлири стандартларға бағлиқ температурини сақлайдиған материаллар билән қапланди.
– Бенаниң ички фасади йеңилинип, минераллиқ сугалған тамлар термоплиткилар билән қапланди. Шуңлашқиму әнди Мәдәнийәт өйиниң ичи хелила иссиқ болиду. «Тиҗарәтниң йол хәритиси – 2020» программиси бойичә қурулуш ишлириға наһийәлик иш билән тәминләш мәркизи арқилиқ 87 адәм җәлип қилинди. Молҗаланған ишларниң тәңдин-толиси тамамланди. Йеңи жил киргичә қурулуш ишлирини толуқ аяқлаштуруп, уни пайдилинишқа бериш ойимиз бар, – деди бөлүм башлиғи журналистларниң соаллириға җавап берип. 
Бүгүнки күнгә қәдәр наһийәлик Мәдәнийәт өйидә 26 иҗадий бирләшмә вә коллектив, бәш хәлиқ оркестри вә 56 ансамбли бар. Пат-йеқинда улар йеңиланған бөлмиләрдә паалийитини давамлаштуридиған болиду.