• Мәрасим
• 03 Желтоқсан, 2020

«Атилар йоли»

Мәшүр САСИҚОВ,
«Уйғур авази»

Йеқинда Талғир наһийәси Туздыбастав йезисида 1-декабрь — Тунҗа Президент күни һарписида жутниң баш жигитбеши Зәрват Баһавдиновниң тәшәббуси вә бир топ жут активистлириниң, җүмлидин Реһимҗан Тоқаев, Ташмәһәмәт Абдусәлимов вә Шерияздан Хоҗаевниң күч чиқириши билән «Атилар йоли» намлиқ мәрасим болуп өтти. Униңға асасән 80 яшлиқ вә униңдин жуқури яштики жут мөтивәрлири тәклип қилинди.
Мәрасим давамида ақсақаллар өзара муңдашқач, ушбу мәлидә аһалиниң бешини қошқан вә җамаәтчилик ишлирини дәсләпкиләрдин болуп қолға алған шәхсләрни әскә алди. Андин көпчилик арисидин бирқатар көпни көргән жут чоңлири сөзгә чиқип, Туздыбастав (илгәрки Калинин) йезисида җамаәтчилик ишлириниң тарихиға тохталди. Уларниң турғунларни бирлик-иттипақлиққа чақирип, қандақла вәзийәттә болмисун, бир аилиниң пәрзәнтлиридәк болушқа үндигәнлигини вә шу йолда һармай-талмай әмгәк қилғанлиғи пәхирлиниш илкидә тилға алди. Натиқлар әйнә шу инсанларниң әҗри түпәйли Туздыбастав йезисида һелиму достлуқ вә өмлүк моҗут екәнлигини тәкитлигәч, һазирдин етиварән яшлар арисида тоғра тәрғибат-тәшвиқат ишлирини жүргүзүш лазимлиғини ейтип өтти.
Һәқиқәтәнму сөз болуватқан йеза илгиридинла өзиниң илим-пәнгә иштияқ бағлиған, мәдәнийитимиз билән сәнъитимизни һөрмәтләйдиған, җамаәтчилик ишлирида жутниң отидин кирип, сүйидин чиқидиған мәрт-мәрданә оғланлири билән пәриқлиниду. Шу түпәйли бу жуттин талай есил, хәлқимизниң ғеми билән яшайдиған вә шундақла мустәқил елимиз Қазақстан Җумһурийтигә хизмәт қилған һәм қилидиған инсанлар йетилип чиққан. Улар билән пәқәт жутдашлирила әмәс, бәлки уйғур хәлқи һәқлиқ түрдә пәхирлиниду.
Мана бүгүнки мәрасимда шулар тоғрилиқму гәп болған һалда, жутниң келәчиги у йәрдә миллитимиз вәкиллиригә мунасивәтлик бираз пикир-тәклипләр ейтилди. Болупму йезидики уйғур синиплириға бала топлаш, ана тилимизда нәшир қилинидиған «Уйғур авази» гезитиға муштири мәвсүмидә паалийәтчанлиқ көрситиш охшаш мәсилиләр оттуриға қоюлди. Бәс-муназиригә толған, қизиқарлиқ, болупму йеши йәткән мөтивәрләргә өзара сирдишиш имканийити яритилған мәзкүр мәрасимниң жиғилған көпчиликтә чоңқур тәсират қалдурғанлиғи ениқ. Чүнки улар бу күни Туздыбастав йезисиниң җамаәтчилик ишлирини йолға салған, һели мәрһум қурдаш-тәңтушлириниң әмгигини һелиму баһалайдиғанларниң бар екәнлигигә қайил болса, жутниң бирлигини сақлашқа қарита ейтилған пикирләрниң җени бар еди. У болсиму, жутниң еғир-йенигини көтиришкә арилишип келиватқан яшларниң қатнишиватқанлиғи һәркимни хошал қилатти.
Мәрасим ахирида меһманлар өзлиригә мәйрәмлик кәйпият һәдийә қилған барлиқ шәхсләргә, шәхсән баш жигитбеши Зәрват Баһавдиновқа вә активистлар Асим Исқақов, Кәрим Мәмиров вә Өмәр Хошнәзәров кәби мәрт-мәрданә жигитләргә чәксиз миннәтдарлиғини билдүрди.