• Йеңилиқлар
• 10 Желтоқсан, 2020

Вакцинилаш вақти йеқинлишип қалди

Дөләт рәһбири Қасым-Жомарт Тоқаев Премьер-министр Асқар Маминни қобул қилди. Президентқа таҗсиман вирусқа қарши Қазақстан вакцинисини ишләп чиқишниң кетип бериши тоғрилиқ әхбарат берилди.
Премьер-министр Президентқа клиникилиқ синақларниң биринчи вә иккинчи басқучлириниң 29-ноябрьда аяқлашқанлиғини хәвәр қилди. Асқар Маминниң сөзичә, буниңда әкис тәсирләр тиркәлмигән вә вакцина жуқури нәтиҗидарлиғини көрсәткән. 25-декабрьдин тартип клиникилиқ синақларниң үчинчи басқучи даирисидә үч миң пидаийға әмләткә селиниду. Синақлар 2021-жили март ейиниң ахирида аяқлишиду.
Президентқа бийил декабрьда икки миллион доза көләмидә елимиз вакцинисиниң биринчи түркүмини ишләпчиқириш башлинидиғанлиғи тоғрилиқ әхбарат берилди.
Дөләт рәһбиригә униң Россия Президенти Владимир Путин билән болған келишимигә мувапиқ, бийил 22-декабрьдин етиварән Қазақстанда Россияниң «Спутник V» вакцинисини ишләпчиқиришниң башлинидиғанлиғи тоғрилиқму ейтилди. Мәмликәт аһалисини аммивий ихтиярий вакцинилашни 2021-жилниң бешидин башлаш планлиниватиду. Биринчи басқучта, врачларни, педагогларни, һәрбий қурулумлар хадимлирини қошуп һесаплиғанда, аһалиниң ағриқни жуқтурувелиш ховупи жуқури болған қатлимиға вакцина селиниду.
Қасым-Жомарт Тоқаев Асқар Маминға вакцина ишләпчиқириш бойичә тапшурмини чапсан орунлиғанлиғи үчүн миннәтдарлиқ билдүрди вә елимиз вакцинисиниң нәтиҗидарлиғини һәм аһалиниң униңға қол йәткүзүшини тәминләш үстидин алаһидә назарәтниң зөрүр екәнлигини тәкитлиди.