• Йеңилиқлар
• 10 Желтоқсан, 2020

Президент онлайн-конференциягә қатнашти

Қазақстан Президенти Қасым-Жомарт Тоқаев сүнъий әқил вә мәлуматларни тәһлил қилиш мәсилилиригә беғишланған Artificial Intelligence Journey онлайн-конференциядә сөзгә чиқти.
Қазақстан Президенти өз сөзидә дунияниң һазирниң өзидә сүнъий әқил, машинилиқ оқуш вә нейронлуқ тармақлар дәвридә яшаватқанлиғини, уларниң инсан паалийитиниң ихтисат, бехәтәрлик, медицина, сәясәт охшаш йөнилишлирини өз ичигә еливатқанлиғини тәкитлиди. Униң пикричә, пандемия вақтида бу өзгиришләрни аддий адәмләрму сәзди.
– Бу – бизни йеңи технологияләргә қәтъий вә чапсан елип кетип барған йеңи дуния. Униң қандақ болидиғанлиғи, әҗайипму яки қорқунучлуқму, кәлгүси әвлатқа қандақ келәчәкни қалдуридиғанлиғимиз бизниң умумий күч-қувитимизгә – инженерларниң, IT-мутәхәссисләрниң, ихтисатчиларниң, шу нәрсә наһайити муһимки, сәясәтчиләрниң күч-қувитигә бағлиқ, – дәп һесаплайду Қасым-Жомарт Тоқаев.
Дөләт рәһбири һазирниң өзидә сүнъий әқилниң ағриқни рәсим арқилиқ ениқлаш, тегишлик диагноз қоюш вә шуниң арқилиқ адәмләрниң һаятини сақлап қелиш имканийитини бериватқанлиғини тәкитлиди. Президент экспертларниң тәхминлирини кәлтүрди. Уларға бенаән сүнъий әқилни қоллиниш хәтәрлик инфекциялик ағриқларниң новәттики долқунини 18 ай балдур ениқлашқа имканийәт бериду. Бу болса, мундақ әһвалларға тәйяр болуш үчүн хелә нурғун вақит аҗритиду.
Қасым-Жомарт Тоқаев Қазақстанниң сүнъий әқил вә чоң тәхминләрни тәһлил қилиш технологиясини тәрәққиятниң асасий йөнилишлириниң бири сүпитидә бәлгүлигәнлигини алаһидә қәйт қилди.
Дөләт рәһбириниң тәкитлишичә, Қазақстанда нурғун мәлуматлар еқимини реал вақитта топлаш вә ишләшниң Data-Driven Government концепциясини, йеңи яндишишлирини җарий қилиш иши жүргүзүлүватиду.
Президент йеңи технологияләрни пайдилинишниң өзлүк мәхсәт әмәс, бәлки гражданлар турмушини һәм бизнес-әһвални яхшилаш усули екәнлигини тәкитлиди.
– Дөләт машина охшаш ишлиши керәк вә бу тоғра. Бирақ һәқиқий хәлиқ авазиға қулақ салидиған дөләт вә дөләт хизмәтчилири эмпатиягә, һәмдәртлик сезимиға егә болуши вә нурғун күчини гражданлар билән өзара һәрикәткә сәрип қилиши лазим, – дәп тәкитлиди Қасым-Жомарт Тоқаев.
Президент бирнәччә әсирләрдин кейин сүнъий әқил «әқиллик машинилар» өз лидерини, йәни «президентини» сайлашни «һәл қилидиған» тәрәққият дәриҗисигә йетиду, дәп пәрәз қилди. Бирақ буниңда у һазирчә сүнъий әқил дөләт рәһбәрлирини алмаштурулмайдиғанлиғини тәкитлиди.
Президент конференция қатнашқучилириниң диққитини сүнъий әқилни тәрәққий әткүзүш вә җарий қилиш вақтида һесапқа елиш керәк болидиған ховуп-хәтәрләргә җәлип қилди. Қасым-Жомарт Тоқаев сүнъий әқилни тоқунушларда, геосәясий қариму-қаршилиқларда «қурал» сүпитидә пайдилиниш еһтималини атап көрсәтти.
Дөләт рәһбири дунияниң сәясий рәһбәрлиригә Сүнъий әқил технологиялирини инсанға зиян йәткүзүп вә униң һоқуқлирини бузуп қолланмаслиқ тоғрилиқ меморандум қобул қилиш мүмкинчилигини қарап чиқишни тәклип қилди.
– Бу хилдики сәлбий тәсиргә йол қоймаслиқ чарилирини вуҗутқа кәлтүрүш бизниң вәзипимиз болуп һесаплиниду. Бирақ, қанчилик ғәлити аңланмисун, йеңи дәвир утуғи биз йеңи технологияләргә қошидиған адәмгәрчилик дәриҗисигә бағлиқ болиду. Машинилар билән роботларниң тәпәккүр қилиш җәриянлири пәқәт конструктив йөнилиштә тәрәққий етиши керәк, – дәп ишиниду Қасым-Жомарт Тоқаев.
Қазақстан Президенти сөзини хуласиләп, сүнъий әқилниң тоғра пайдилинилғанда, һәммимизгә хелә баравәр вә хелә уйғун йүксилиш имканийитини беридиған қурал екәнлигини тәкитлиди.
Тохсән мәмликәттин 28 миң қатнашқучи тиркәлгән Artificial Intelligence Journey онлайн-конференцияси бийил дуниядики әң чоң конференция болди.
«Master event Сүнъий әқил: келәчәккә җавапкәрлик мунасивәт» мавзусида өткән умумий муназиригә Дөләт рәһбири билән бирқатарда Россия президенти России Владимир Путин қатнашти.