• Йеңилиқлар
• 04 Ақпан, 2021

Гуванамисиз вә техпаспортсиз

1-февраль күни Қазақстан Президенти Қасым-Жомарт Тоқаев “Қазақстан Җумһурийитиниң йол қатнаш мәсилилири бойичә бәзибир қанун һөҗҗәтлиригә өзгиришләрни вә қошумчиларни киргүзүш тоғрилиқ” қанунни имзалиди. Бирақ, һөҗҗәт техи күчкә киргини йоқ.
Қанунда ейтилишичә, қазақстанлиқ автомобиль жүргүзгүчиләр машина жүргүзүш гуванамисисиз вә униң техпаспортисиз йол қатналайду. Улар йол полицияси хадимлириға кимлигини (шәхсий гуванамә) көрсәтсә йетәрлик. Лекин мәзкүр өзгиришләр барлиқ адәмләр үчүн күчкә егә әмәс. Атап ейтқанда, чәт әл гражданлири илгәрки петичә автомобиль жүргүзүш гуванамисини вә техпаспортни өзи билән елип жүрүши тегиш. Шуни тәкитләймизки, һөҗҗәт дәсләпки қетим елан қилинип, он күн өткәндин кейин күчкә кириду. Мошуниңға бағлиқ қазақстанлиқ автоишқивазларға һазирчә һаҗәт барлиқ һөҗҗәтни өзи билән елип жүрүшкә тоғра келиду.
Мәзкүр йеңилиққа Қазақстан Автотиҗарити Иттипақиниң экспертлири изаһ бәрди:
“Мәзкүр өзгириш Қазақстанниң барлиқ автоишқивазлири тәрипидин иҗабий қобул қилинди. Бу мәмликәт дөләт органлирини аммивий рәқәмләштүрүш дәвридә наһайити муһим. Шундақла бу гражданларниң һаятини йеникләштүрүшкә имканийәт бериду. Шуниң билән бир вақитта барлиқ автоишқивазларниң қулиғиға алтун сирға, машина жүргүзүш гуванамисини нери қилиштин илгири униң қәрәли түгәйдиған вақтини йәнә бир қетим тәкшүрүп көрүңлар. Униму онлайн-режимида йеңилашқа болиду, дәп тәкитләйду тәшкилатниң вице-президенти Анар Макашева.
Шуни әскә селип өтүмизки, қанун лайиһиси җумһурийитимиз Президенти Қасым-Жомарт Тоқаев жүргүзгүчиләрдә автомобиль жүргүзүш гуванамиси вә техпаспортниң йоқлуғи үчүн уларни мәмурий җазаға тартишни йоқ қилиш тапшурмисини бәргәндин кейин муһакимә қилинишқа башлиған. Буниңдин бираз илгири қанун Қазақстан Җумһурийити парламенти Мәҗлисидә биринчи қарашта мақулланған еди.