• Йеңилиқлар
• 10 Ақпан, 2021

Хәлиқара форум болуп өтти

Йеқинда Алмутида 2017-жилдин тартип өткүзүлүватқан Digital Almaty форуми болуп өтти.
«Рәқәмлик йеңилаш: йеңи реаллиққа интилиш» мавзусида өткән форумниң умумий сессиясигә Қазақстан Премьер-министри Асқар Мамин, шундақла Әрмәнстан, Беларусь, Қирғизстан, Россия һөкүмәтлириниң рәһбәрлири – Никол Пашинян, Роман Головченко, Улуқбек Марипов, Михаил Мишустин, шундақла 2020-жили декабрьда ЕАИИда байқиғучи мәмликәт болған Өзбәкстан Премьер-министри Абдулла Арипов вә Евразия ихтисадий комиссияси коллегиясиниң рәиси Михаил Мясникович қатнашти.
Форум қатнашқучилириға Қазақстан Президенти Қасым-Жомарт Тоқаев видеомураҗиәт қилди. Дөләт рәһбири «форумниң Қазақстанда әстин көтирилип қалған офлайн-тәртиптә өтүватқан биринчи хәлиқара чарә-тәдбир болуватқанлиғини» тәкитлиди.
Қасым-Жомарт Тоқаев ЕАИИ әллириниң һөкүмәт башлиқлириға мураҗиәт қилип, интеграциялик тәшәббуслар нәтиҗидарлиғиниң көп җәһәттин миллий әхбарат системилириниң мувапиқ келишигә һәм рәқәмлик әхбаратниң Евразия ихтисадий иттипақи әллири вә уларниң хошнилири оттурисида үзлүксиз өтүш имканийитигә бағлиқ екәнлигини тәкитлиди.
– Амма интеграциялик җәриянлар бизниң ихтисадий иттипақимиз даирисидә қошумчә тәрәққиятқа муһтаҗ болуватиду. Бу мәсилидә һөкүмәтләр билән комиссияләрниң уйғун ишлиши муһимдур, – дәп тәкитлиди Президент.
Дөләт рәһбири пәқәт рәқәмләштүрүшниң әвзәлликлиригила әмәс, бәлки ховуплириғиму тохтилип өтти.
– Биз санаәтни рәқәмләштүрүшниң нурғун ишчи күчиниң бошитилишиға елип келидиғанлиғини чүшинимиз, бу иҗтимаий әһмийәткә егә мурәккәп мәсилә вә униң йешими һазирчә тепилмиди. Амма йеңи технологияләрниң инсанийәтни һаятий кәңликтин мәһрум қилмай, бәлки йеңи надир имканийәтләрни ачидиғанлиғиға ишинимән, – деди Президент.
Қасым-Жомарт Тоқаев өз мураҗиитидә шундақла йеңи технологияләр вә сүнъий интеллект саһасида мәктәп оқуғучилири билән студентлар үчүн дөләтләрара билим тәшәббуслирини вуҗутқа кәлтүрүш имканийитини қараштурушни тәклип қилди. 
– Қазақстан аммивий рәқәмләштүрүшни вә мәлуматлар алмаштурушни йолға селишни өзиниң иттипақта рәислик қилишиниң әвзәллиги сүпитидә бәлгүлиди. Биз бу мәсилини актив илгирилитишни нийәт қиливатимиз. Иттипаққа әза барлиқ әлләрниң үнүмлүк һәмкарлишишиға үмүт қилимиз, –дәп хуласилиди Қазақстан Президенти.
Өз новитидә форумниң умумий мәҗлисидә сөзгә чиққан Қазақстан Премьер-министри Асқар Мамин пандемия шараитида Қазақстан ихтисадиниң жуқури турақлиқлиқ дәриҗисини көрсәткәнлигини, буниң көп җәһәттин рәқәмләштүрүш қарарлириниң дөләт вә хусусий секторниң барлиқ саһалиридин орун елишиниң өскәнлиги билән шәртләнгәнлигини тәкитлиди.
Форумда шундақла Әрмәнстан, Беларусь, Қирғизстан, Россия, Өзбәкстан һөкүмәтлириниң рәһбәрлири – Никол Пашинян, Роман Головченко, Улуқбек Марипов, Михаил Мишустин, Абдулла Арипов, Google вице-президенти Винт Серф сөзгә чиқти. Шундақла Дуниявий ихтисадий форумниң президенти Берге Бренде видеомураҗиәт йоллиди.
Digital Almaty форуми даирисидә униңға қатнашқучилар Қазақстанниң дөләт хизмитини көрситиш саһалиридики рәқәмлик лайиһилириниң көргәзмиси билән тонушти.