• Йеңилиқлар
• 10 Ақпан, 2012

Һәссимизни қошушимиз лазим

Қазақстан мустәқил дөләт болуп шәкилләнгәндин бери униңға келәчәкни пәмләшни билидиған салаһийәтлик сәясәтчи Нурсултан Әбиш оғли Назарбаев рәһбәрлик қиливатиду. Өткән һәптидә әйнә шу Президентимизниң Қазақстан хәлқигә йоллиған Мәктүбини сөйүмлүк гезитимиз «Уйғур авазидин» оқудум вә өзәмниң наһайити рази болғанлиғимни ейтқум келиду. Мәктүптә елимизниң тәрәққиятини толуқ испатлайдиған фактлар кәлтүрүлүп, йеңи вәзипиләр қоюлиду. Болупму аһали саламәтлигини сақлаш, билим бериш сүпитини яхшилаш, яшларниң келәчиги охшаш муһим иҗтимаий мәсилиләр көтирилип, ениқ пикир-тәклипләр ейтилиду. Президентимизниң дана ички вә сиртқи сәясити түпәйли Қазақстан пүткүл дуния тониған мәмликәткә айлинипла қалмай, өзигә хас алаһидиликләр билән башқиларға үлгә-ибрәт болушқиму башлиди. Мәсилән, мән Қазақстан хәлқи Ассамблеясиниң елимизда истиқамәт қиливатқан барлиқ милләтләрниң бешини қошуп, уларни достлуққа, инақлиққа дәвәт қиливатқан көптәрәплимилик паалийитини дайим диққәт билән күзитимән. Ассамблеяни дунияниң барлиқ дөләтлири үчүн милләтләр ара разимәнлик, турақлиқ вә изчил тәрәққият үлгиси, дәп ейтсақ, мубалиғә әмәс. Дөләт рәһбири бу қетимқи Мәктүбидиму хәлиқләр достлуғи билән милләтләр ара разимәнлик вә униң әһмийити тоғрилиқ алаһидә тәкитләп өтти. Буниңға бизниң һәр биримиз өз һәссимизни қошушимиз лазимдур.

Баһадур СӘЛИМОВ,

Җәнубий Қазақстан вилайәтлик Уйғур этномәдәнийәт мәркизиниң рәиси.