• Қазақстан тәуелсіздігіне 30 жыл
• 14 Желтоқсан, 2021

Дәсләпки лауреатлар ениқланди

Мухтәрҗан ҖУМАРОВ,
«Уйғур авази»

Елимиздә демократик җәмийәткә мувапиқ медиакәңликниң шәкиллинишигә зәмин яритип, журналистика саһасини риваҗландуруш һәм шу арқилиқ аммивий әхбарат васитилири хадимлириниң инавитини көтирип, уларниң әмгигини мунасип баһалаш мәхситидә барлиққа кәлгән Қазақстан Журналистика академиясиниң қурулғиниға бийил жигирмә жил болди. Олжас Сүлейменов, Мурат Әвезов охшаш башқиму көплигән жирик дөләт вә җәмийәт әрбаплири әза болған мәзкүр академия паалийитини башлиған дәсләпки күнләрдин башлапла әйнә шу йөнилиштә изчил изгү ишларни әмәлгә ашуруп кәлмәктә. Мәсилән, өткән жиллар ичидә академия тәрипидин «Алтын­ жұлдыз», «Алтын самұрық» вә Галина Күзембаева намидики «Аққу» мукапатлириниң тәсис қилинип, әң мунасип дәп саналған бирқатар аммивий әхбарат васитилири билән айрим шәхсләргә тапшурулғанлиғи шуниңға мисал болса керәк.
Әнди мошу жилниң өзидила академия әзалири тәрипидин икки чоң мукапатниң тәсис қилинғанлиғиға алаһидә тохталмай мүмкин әмәс. Уларниң бири – май ейида 85 яшқа толған бүйүк замандишимиз Олжас Сүлейменов намидики мукапат. Уни 28-июнь – Аммивий әхбарат васитилири хадимлири күни һарписида шаир өз қоли билән мунасип шәхсләргә тапшурди. Иккинчиси – Қазақстан Җумһурийитиниң хизмәт көрсәткән әрбаби, көрнәклик публицист һәм язғучи, мәрһум Йолдаш Азаматов намидики мукапат. 
Мәлумки, Йолдаш Азаматовниң исми уйғур җамаәтчилигигә яхши тонуш. Аңлиқ һаятини миллий мәтбуатимизниң тәрәққиятиға беғишлиған әдип, чарәк әсир давамида җумһурийәтлик «Уйғур авази» (илгәрки «Коммунизм туғи») гезитиниң баш муһәррири болди. Шу җәриянда у уйғур журналистлириниң бирнәччә әвладиниң тәрбийилинип чиқишиға салмақлиқ үлүшини қошти. Билимликлиги, пәм-параситиниң үстүнлүги түпәйли хәлқимиз тәғдиригә мунасивәтлик айрим җиддий мәсилиләрниң һәл қилинишидиму асаслиқ роль ойниди. 
Мәрһумниң язғучи сүпитидә қалдурған мирасиму аз әмәс. Буниңдин башқа Йолдаш Азаматовниң көпмилләтлик елимиздә турақлиқ билән милләтләрара разимәнликни сақлаш вә мустәһкәмләш йолида әмәлгә ашурған ишлириму интайин нурғун. Әдипниң Қазақстан хәлқи Ассамблеяси қурулған күндин башлап униң  давамлиқ униң әзаси болғанлиғи әйнә шуниңға купайә. 
Өткән җүмә күни болуп өткән Йолдаш Азаматов намидики мукапатни тапшуруш мәрасимида ҚҖ Журналистика академиясиниң  президенти Сағымбай Қозыбаев биринчи новәттә әйнә шулар тоғрилиқ әтраплиқ ейтип өтти. У шундақла мәзкүр мукапатни тәсис қилиш тоғрилиқ тәшәббусни йәкдиллиқ билән қоллап-қувәтлигән вә униң рояпқа чиқишиға мунасип үлүшини қошқан ҚХА Алмута шәһәрлик Җәмийәтлик разимәнлик кеңишиниң рәиси Әхмәтҗан Шардинов билән атақлиқ коллекционер, бирқатар нәзмий вә нәсрий әмгәкләрниң муәллипи Азат Һекимбәккә алаһидә миннәтдарлиқ билдүрди. Андин Йолдаш Азаматов намидики мукапатниң дәсләпки лауреатлирини елан қилип, уларниң көпмилләтлик елимиздики хәлиқләр достлуғиниң мустәһкәмлинишигә мунасип үлүшини қошуп келиватқанлиғини тилға алди. 
Шундақ қилип,  «Уйғур авази» гезити баш муһәрририниң биринчи орунбасари Иврайим Баратов, «Alataу Aqparat» ҖЧЙниң баш мудири Төлемис Кулмухамедов вә «Exclusive.kz» журналиниң баш муһәррири Қарлығаш Еженова Йолдаш Азаматовниң симаси чүширилгән алтун медаль вә  диплом билән тәғдирләнди. 
Тәнтәнә давамида иллиқ тиләклирини изһар қилған натиқлар мәрһум һәққидики хатирилири билән ортақлишип, униң исмини әбәдийләштүрүш мәхситидә қолға елинған мәзкүр башланминиң буниңдин кейинму давамлишидиғанлиғиға ишәнчә билдүрди.