• Дин вә җәмийәт
• 16 Маусым, 2022

Достлуқта — йеңи мечит

Башқа җайлардикигә охшашла Әмгәкчиқазақ наһийәсиниң Достлуқ йезисидиму «Дин — әпийүн» дәп тәрғип қилинған жилларниң өзидә, диний етиқатини йоқатмай, униңға садиқ болуп қалғанлар аз әмәс еди. Әнди елимиз мустәқиллик елип, динға болған көзқараш өзгәргәндин кейин, уларниң диний етиқатиниң техиму күчәйгәнлиги өз-өзидин чүшинишлик, әлвәттә. Достлуқ йезисида мечит селиш истигиму әйнә шу чағларда шәкилләнгән еди. Йеқинда йезида қәд көтәргән йеңи мечит бенасиниң ечилиш мәрасими болуп өтти. Униңға йезиниң чоң-кичик аһалиси, жирақ-йеқиндин тәклип қилинған меһманлар қатнашти. 

Шәмшидин АЮПОВ,
«Уйғур авази»

Достлуқ йезисиниң мәркизий кочилириниң бириниң бойида қәд көтәргән йеңи Достлуқ мечити бирдин көзгә чүшиду. Һашамәтлик дәргаһниң ичиму, сиртиму мәптункар. Көргән адәмниң зоқи келип, әҗайип тәсиратқа бөлиниду. Мечитниң ечилиш мәрасимиға қатнашқанлар дәл шундақ һиссиятни баштин кәчүрди. Заман тәливигә лайиқ қәд көтәргән йеңи мечит һойлисиму көркәм безәлгән. Мечитниң ечилиш тәнтәнисигә жирақ-йеқиндин кәлгән адәмләрниң санида чәк болмиди. Җамаәт җәм болғандин кейин қуръан-тилавәт қилинди. Андин мечит селишқа көп күч чиқарған баш һамий Марлан Сыдықовниң үстигә чапан кийгүзүлүп, ат һәдийә қилинди. 
Дәсләпки тәбрик сөзгә чиққан «Аmanat» партияси Әмгәкчиқазақ наһийәлик шөбисиниң кативи Қуат Байғожаев йеңи мечит бенасиниң пайдилинишқа берилиши мунасивити билән жут әһлини тәбрикләп, мәзкүр ибадәт өйини салдурған шәхсләргә сәмимий миннәтдарлиғини  билдүрди.
Мечитниң ечилиш мәрасимида изгү-тиләклирини изһар қилғучилар қатарида ҖУЭМ рәиси, ҚХА Кеңишиниң әзаси Шаһимәрдан Нурумовму болди. Әмгәкчиқазақ наһийәлик Уйғур этномәдәнийәт мәркизи рәисиниң орунбасари Нурҗамал Һасанова бир топ җәмийәтлик ишларниң активистлириға пәхрий ярлиқларни тапшурса, Челәк регионлуқ Ханим-қизлар кеңишиниң рәиси Гөһәрбүви Идрисова, жигитбашлири Иврайимҗан Шакиров, Нурмәһәмәт Данахунов, Мәсимҗан Мәхсүмоғли, миллий мәдәнийитимизниң җанкөйәри Камаләт Қасимова, Қарийота йезисиниң жигитбеши Мунардин Һосманов мечитқа гиләм соға қилди. 
Шуниңдин кейин сөз новитини алған Алмута вилайити регионлуқ имамлар вәкили Қуаныш Наржанов, Әмгәкчиқазақ наһийәсиниң баш имами Сапархан Төреқулов, Достлуқ йезиси Ақсақаллар кеңишиниң әзалири Жаңабай Оразов, Һашим Садиров, Достлуқ йезисиниң жигитбеши Рәпиқҗан Әмәтов вә башқилар ислам дининиң өзгичиликлири билән тәрбийәвий әһмийитиниң чоңқурлуғиға алаһидә тохтилип, мечит һулини тиклигән жутдишиға вә җамаәтчиликкә өзлириниң сәмимий миннәтдарлиғини изһар қилди. 
Мечитниң ечилиш мәрасимида Жарылқасын Жақсылықов баш имам болуп тайинланди. 
Мошу йәрдә шуниму алаһидә тәкитләш лазимки, Достлуқ йезиси Ақсақаллар кеңишиниң рәиси Алимҗан Илиев, жигитбеши Рәпиқҗан Әмәтов вә униң ярдәмчилири Зунунбәк Сәйдуллаев, Абдрим Җәлилов, Әхмәтҗан Султанов, мечитқомидин Асимҗан Илиев, йезилиқ Уйғур мәдәнийәт мәркизиниң рәиси Халбүви Дуганова вә Ризвангүл Һебуллаева, Зәйнәпбүви Тоқымова, Мунаргүл Гайитова кәби җәмийәтлик ишларниң активиситлири мечит қурулуши қолға елинған күндин башлап ишниң бешида болуп, өзлириниң халисанә ярдимини көрсәтти. 
Ахирида сөз новитини алған Марлан Сыдықов мечитниң селинишиға жутдашлириниң ярдими зор болғанлиғини тәкитләп, ишниң бешида болған шәхсләргә миннәтдарлиғини билдүрди. Гүлдүрлигән алқишлар садаси астида мечитниң рәмзлик лентиси қийилип, ақромаллиқ анилар чачқисини чачқандин кейин, жиғилған җамаәт муқәддәс дәргаһниң босуғисидин атлиди. Андин көпчиликкә дәстихан йейилип, әрвалар роһиға атап нәзир берилди.

Дәрһәқиқәт, мәмликитимиз Президенти Қасым-Жомарт Тоқаевниң «Йеңи Қазақстан: йеңилаш вә йеңилиниш йоли» Мәктүби елан қилинғандин буян елимиздә йеңи бир ойғиниш пәйда болуп, көплигән изгү ишлар әмәлгә ешиватиду. Болупму, «Туған жер» программиси даирисидә тилға аларлиқ өзгиришләр йүз бәрмәктә. Бу, әлвәттә, яхшилиқниң нишани. Амма ахирқи вақитларда кишини хәп дегүзидиған әһвалларму йүз бериватиду. Динни чүмпәрдә қиливалған айрим диний еқимлар вә уларниң тәркивигә киривалған бәзи кишиләр кәң амминиң аң-сәвийәсини оғилап, уларни тоғра йолдин адаштурушқа интилмақта. Демәкчи болғинимиз, йеза-мәһәллиләрдики имам, моллилиримиз әйнә шу һәрикәтләрниң алдини елип, мечитларға қарап бәт буриған яшлиримизни Алла таалаға чин етиқат қилишқа, ислам қаидилиригә әмәл қилидиған, иманлиқ вә диянәтлик инсанлардин болушқа дәвәт қилса, нур үстигә нур болар еди.

Әмгәкчиқазақ наһийәси.