• Йеңилиқлар
• 10 Ақпан, 2012

Министрлик алдиға бир қатар вәзипиләр қоюлди

Йеқинда Мәдәнийәт вә әхбарат министрлиги коллегиясиниң 2011-жилда әмәлгә ашурулған ишниң йәкүнлиригә вә Дөләт рәһбириниң «Иҗтимаий-ихтисадий йеңилиниш — Қазақстан тәрәққиятиниң асасий йөнилиши» намлиқ Мәктүбини әмәлгә ашуруш даирисидики вәзипиләргә беғишланған кәңәйтилгән мәҗлиси болуп өтти. Униң ишиға Қазақстан Җумһурийитиниң дөләт кативи Мухтар Қул-Мухаммед, Қазақстан Җумһурийити Парламентиниң депутатлири, Президент Мәмурийитиниң, Премьер-Министр Идарисиниң вәкиллири, мәдәнийәт мәһкимилири вә аммивий әхбарат васитилириниң, һөкүмәтлик әмәс тәшкилатларниң рәһбәрлири қатнашти. Мәҗлистә мәдәнийәт вә әхбарат министри Дархан Мыңбай идариниң 2011-жилдики паалийитиниң йәкүнлири вә 2012-жилдики вәзипиләр тоғрилиқ асасий доклад билән сөзгә чиқти. Коллегия қатнашқучилири «Мәдәний мирас» миллий стратегиялик лайиһиниң новәттики басқучиниң аяқлашқанлиғини тәкитлиди. 73 тарих вә мәдәнийәт ядикарлиғи толуқ әслигә кәлтүрүлди, 30дин ошуқ илмий-әмәлий вә 40 археологиялик тәтқиқат жүргүзүлди. Чәт әллик лайиһиләрму әмәлгә ашурулди. Мәсилән, Дәмәшқтә Султан Бейбарс мәқбәрисини реставрация қилиш аяқлашти, бийил Әл-Фараби тарихий-мәдәний мәркизидики вә мәқбәрисидики ишларни тамамлаш көздә тутулуватиду. Өткән жили «Қазақстан батырлық жырлары» надир лайиһиси әмәлгә ашурулди. «Қазақфильм» киностудиясидә мәмликитимизниң мәдәний мираси тоғрилиқ 20дин ошуқ һөҗҗәтлик фильм чүширилди. Униңдин ташқири, «Мәдени мұра — Культурное наследие» әхбарат портали йеңилинип, униңда надир археология, тарих вә мәдәнийәт ядикарлиқлири өзлириниң географиялик координатлири бойичә мәхсус хәритигә орунлаштурулди. Кейинки жилларда елимизниң киностудияси толуқ йеңиланди. Һазир у илғар техника билән җабдуқланған вә әң яхши иҗадий кадрлар билән тәминләнгән толуқ мәзмунлуқ кино ишләп чиқириш комплекси. Һәр жили түрлүк жанр вә һәҗимдики йүздин ошуқ картина чиқириливатиду. Нәтиҗидә елимиз лентилириниң киноарийәттики үлүшиму өсти. Кейинки үч жилда Қазақстанда ишләп чиқирилған 102 картина 158 фестивальға қатнишип, дунияниң 50 мәмликитидә көрситилди. Ахирқи жилдила 5 картинимиз 9 мәхсус мукапатқа сазавәр болди. Театр сәнъитидиму мәлум утуқлар қолға кәлтүрүлди: һәр жили җумһурийәтниң иҗадий коллективлири миңдин ошуқ спектакльни көрсәтсә, уларниң 40қа йеқини йеңидин сәһниләштүрүлгән әсәрләрдур. Өткән 2011-жил Тилларни тәрәққий әткүзүш вә қоллиниш бойичә 2011 — 2012-жилларға бәлгүләнгән дөләт программисини әмәлгә ашурушниң биринчи жили болди. Униң даирисидә дөләт тилини оқутуш үлгилирини мукәммәлләштүрүш, уни өзләштүрүш дәриҗисини баһалаш системисини җарий қилиш ишлири жүргүзүлди. Икки йүздин ошуқ мәтбуат мәһсулати түрлири тәйярланди вә чиқирилди. Қиммәт баһалиқ лексикографиялик әмгәк — 15 томлуқ «Қазақ әдеби тілінің сөздігі» изаһлиқ луғити, балилар үчүн «Әлем балалар әдебиетінің інжу-маржандары» намлиқ китаплар түркүми, 25 томлуқ «Әлемдік классика» классикилиқ әдәбият түркүмидики китаплар, аудикитаплар, инновациялик оқуш-методикилиқ программилар әйнә шулар җүмлисидиндур. Министрликниң паал қатнишиши билән 2006 — 2011-жилларға бәлгүләнгән Гражданлиқ җәмийәтни тәрәққий әткүзүш концепцияси әмәлгә ашурулди. Нәтиҗидә һөкүмәтлик әмәс тәшкилатларни мәмликәт тәрәққиятиниң муһим мәсилилири бойичә қанун лайиһилирини ишләп чиқишқа, программиларни әмәлгә ашурушқа, җәмийәтлик тиңшашларни өткүзүшкә җәлип қилиш мүмкин болди. Пәқәт кейинки жилила һөкүмәтлик әмәс тәшкилатларниң җәмийәт һаятиниң түрлүк саһалиридики иҗтимаий әһмийәткә егә 200дин ошуқ лайиһиси әмәлгә ашурулди. Һазир Қазақстанда 2,5 миңдин ошуқ аммивий әхбарат васитиси бар, уларниң 84 пайизи (2 301) дөләтлик әмәс вә 16 пайизи (439) дөләтлик әхбарат васитилири. Миллий рәқәмлик спутник тармиғини чиқириш чоң муваппәқийәт болди, бу аһалиниң елимиз телевидениесидин кәң пайдилинишиға имканийәт яратти. Йеңи саһалиқ каналларни вуҗутқа кәлтүрүш иши жүргүзүлди. Мәсилән, 2011-жили 1-сентябрьдин тартип «Қазақстан» миллий телеканили толуқ дөләт тилиға көчирилди. 2012-жили «Билим» («Знание») вә «Новости -24» телеканаллирини ечиш планлиниватиду. Интернетта Bag.kz сайт-агрегатори ечилип, униңдин 40қа йеқин қазақ тиллиқ гезит вә журналларниң интернет-ресурслири, 30ға йеқин әхбарат ресурси, 13 телеканал вә 10 радиостанция орун алди. «Қазмедиа орталығы» телерадиокомплексиниң ечилиши өткән жилдики муһим вақиә болди. «Телерадио аңлитиш тоғрилиқ» Қанун қобул қилинди. Нәшрият паалийити саһасида өткән жили умумий тиражи 2 миллионға йеқин нусхини тәшкил қилған 467 түрлүк иҗтимаий әһмийәткә егә әдәбият нәшир қилинди. 2011-жили Миллий архив фонди йеңи һөҗҗәтләр билән толуқтурулди. Архивлар хизмитидин 200 миң қазақстанлиқ вә чәт әллик граждан пайдиланди. Коллегия мәҗлисидә К.Байсеитова намидики Миллий опера вә балет театриниң баш мудири Төлеубек Әлпиев, Н.Сац намидики Балилар вә өсмүрләр театриниң мудири Надежда Горобец, Җумһурийәтлик мәркизий мирасгаһниң мудири Нурсан Әлимбай, Ш.Айманов намидики «Қазақфильм» акционерлиқ җәмийитиниң президенти Ермек Аманшаев, «Республиканская ТРК «Казахстан» акционерлиқ җәмийитиниң президенти Нуржан Мухамеджанова, Парламент Мәҗлисиниң депутати Меруерт Қазбекова вә Ш.Шаяхметов намидики Җумһурийәтлик дөләт тилини чапсан үгитиш мәркизиниң мудири Сәуле Иманбердиева әмәлгә ашурулған вә алдики ишлар тоғрилиқ докладлар билән сөзгә чиқти. Мәҗлисниң ахирида Қазақстан Җумһурийитиниң дөләт кативи Мухтар Қул-Мухаммед министрлик алдиға бир қатар вәзипиләрни қойди.