• Сәнъәт
• 07 Наурыз, 2023

Сәнъитимиз — миллий байлиғимиз

Йеқинда Ғулҗа йоли бойидики һашамәтлик «Han Tau» ресторанида миллий мәдәнийитимиз билән маарипимизниң җанкөйәри, көплигән хәйрихаһлиқ паалийәтлири билән тонулған оғланларниң бири, меценат Мәхсәтҗан Қаһаровниң тәшәббуси, Талғир наһийәлик һакимийәт һәм наһийәлик Уйғур этномәдәнийәт мәркизи вә Туздыбастав йезисиниң жут активистлириниң қоллап-қувәтлишидә «Sannat progreess» сәнъәткарларниң уюштуруши билән «Сәнъәт кечилиги» болуп өтти. Униңға сәнъәткә қизиққан вә миллий сәнъитимизниң риваҗлинишиға паал қатнишиватқан чоң-кичикниң һәммиси қатнашти.

Мәшүр САСИҚОВ,
«Уйғур авази»

Шуңлашқа бу күни ушбу адәттики театр яки башқа заллардики концерт программилиридин алаһидә пәриқлинидиған кечиликкә 500дин ошуқ меһманлар жиғилди. Нағра-сүрнәй садалириниң аләмни чаң кәлтүрүп челиниватқанлиғи бу йәрдә чоқум чоң бир мәрасимидин далаләт берип туратти. Мәйрәмгә хуш кәйпият беғишлиған күнниң нурида бирнәччә уссулчилар топлири кәң мәйданда концертқа ахирқи тәйярлиқлири билән бәнт. Топ-топи билән келиватқан меһманларниң айиғи үзиләр әмәс. Саһипханлар қолини көксигә қоюп, уларниниң һәрбиригә илтипат билдүрүп, күтүвалди. 
Шундақ қилип, тәшәббускар Мәхсәтҗан Қаһаровниң арзуси түпәйли реҗиләнгән, йәни «меһманларниң кәң дәстихан әтрапида назу-немәтләрдин дәм тартқач, миллий сәнъитимиздин бәһирләнсә», дегән мәхсити әмәлгә ашмақта. Әлвәттә, өйүңгә үч-төрт адәм кәлсә, уларни узитишниңму өзи бираз аваричилиқ. Әнди наһайити көп меһманлар топиға мулазимәт қилиш, әлвәттә, уларға сәл еғир кәлди. Бирақ, мундақ ишларда хелила тәҗрибигә егә Талғир наһийәсиниң жут активистлири бәлни мәккәм бағлиған һалда, уларниң көңлидин чиқишқа тиришти. Һәрким өз орниға җайлашқандин кейин икки айдин бу ян кечәю-күндүз тәйярлиқлар көрүлгән сәнъәт кечилиги рәсмий башланди.
Көңүлгә арамбәхш дәмлирини һәдийә қилидиған йеқимлиқ саз-нәғмиләрдин ташқири, һәвәскар вә кәспий дәриҗидики уссулчиларниң әвришим уссуллири көпчиликниң кәйпиятини бирдин көтәрди. Болупму сәнъәтчиләрниң көпчилиги яшлардин тәркип тапқан болуп, уларниң миллий сәнъитимиздә өчмәс изларни қалдурған бүйүк сәнъәткарларниң изини бесип келиватқанлиғини байқавелиш тәс әмәс еди. Бу йәрдә өз һүнирини намайиш қилған һәрқандақ талант егисиниң исим-җисмини аташ әсла мүмкин әмәс. Болупму бирини яхши, йәнә бирини яман дейишкә әсла тилиң бармайду. Әң муһими, бу сәнъәт кечилигидә уларни һәртәрәплимә қоллап-қувәтләп, сәнъитимизни техиму риваҗлинишиға шу яшлиримизға мошундақ шараит яратқан милләтпәрвәр инсанларға апирин ейтиш купайә болса керәк.
Бу күни шундақла Мәхсәтҗан Қаһаровниң сәпдашлири, йәни авған урушиниң ветеранлири билән биллә Талғир наһийәлик ички сәясәт вә тилларни тәрәққий әткүзүш вә мәдәнийәт билән спорт бөлүминиң башлиғи Фарида Бегенбаева, Қазақстан хәлқи Ассамблеяси йенидики Анилар кеңишиниң рәиси Айтжамал Нурбатырова вә наһийәдә паалийәт елип бериватқан бирқатар этномәдәнийәт мәркәзлириниң рәислири иштрак қилди. Улар новәт билән сөзгә чиқип, мошундақ кәң даиридә уюштурулуватқан мәдәний чарә-тәдбирниң әһмийитигә алаһидә жуқури баһа бәрди. Әнди авған урушиниң ветеранлири болса, бирқатар пешқәдәм сәнъәткарларни «Ана жүрегі» медали билән мукапатлиса, Бесағаш йезисиниң активистлири Мәхсәтҗан Қаһаровқа изгү тиләклирини ейтип, униңға Пәхрий ярлиқ тапшурди.
Қисқиси, сәнъәтсөйәр көплигән тамашибинниң бешини қошқан концерт программисиниң рәсмий қисми аяқлаштидә, новәт нахша-саз билән уссулға берилди. Бу күни һәтта тәшәббускар қолиға равапни алған һалда, «Турнилар» нахшисини орунлап бәрди. Андин бу сәнъәт кечилигидә Алмута шәһиридики А.Розибақиев намидики 153-мәктәп-гимназияниң оқуғучилиридин тәркип тапқан оркестрниң 60 әзаси (сүрәттә) «Билим ишқида» вә «Сеғиндим» нахшилирини иҗра қилғинида, барлиқ тамашибинлар орунлиридин туруп, гүлдүрлигән алқишлири билән қарши алди. Ишәшлик ейтишқа болидуки, бу өсмүрләрниң өзлириниң таланти билән барчини қайил қилғанлиғи ениқ. Буни концерттин кейин уларниң иҗрасидики нахшиларниң Интернетқа селинған шу видеосини аз вақит ичидила миңлиған адәм қариғанлиғидин ениқ байқавелишқа болиду.
Хулләс, миллий сәнъитимизни қоллап-қувәтләш вә уни заманивий йеңи шәкилгә чүшириш мәхситидә уюштурулған кечилик көпчиликниң көңлидин чиқти, дәп ейтишқа асас бар. Һә, бу хәлқим-миллитим дегән әзимәтләрниң әҗри һесавиға әмәлгә ашти. Азду-тола камчилиқларға көз жумуп, хәлқимизниң миллий қәдрийәтлирини тәрәққий әткүзүш йолида аянмай тәр төкүватқан инсанларға һәмдәм болуш – һәрбиримизниң пәрзи һәм қәрзи.