• Йеңилиқлар
• 10 Ақпан, 2012

Н.Назарбаев Германиядә болди

Президент Нурсултан Назарбаев Қазақстан Җумһурийити вә Германия Федератив Җумһурийити оттурисида дипломатик мунасивәтләрниң орнитилғанлиғиға 20 жил толуши һарписида мошу мәмликәттә рәсмий сәпәрдә болуп, Берлин Евразия клубини ечиш мәрасимиға қатнашти. Мәрасим Германия ташқи сәясәт кеңишидә өткүзүлүп, у йәрдә Дөләт рәһбири ГФҖниң сәясәтчилири, тиҗарәт саһасиниң вәкиллири  вә дипломатлири алдида доклад билән сөзгә чиқти. Нурсултан Назарбаев өз сөзидә Қазақстан билән Германия оттурисидики һәмкарлиқниң җошқун тәрәққий етиватқанлиғини тәкитлиди. Достлуқ вә ишәнчә асасида сәясий, ихтисадий вә мәдәний-гуманитарлиқ диалог сақлиниватиду. Президент Берлин Евразия клуби ечилишиниң униң евразиялик тоғрилиқ идеялиригә мас келидиғанлиғини вә Европа һәм Мәркизий Азия оттурисидики һәмкарлиқниң нәтиҗидарлиқ йоллирини издәшкә қаритилғанлиғини алаһидә тәкитләп өтти. Қазақстан Җумһурийити Президентиниң доклади учришиш қатнашқучилириниң җанлиқ муназирисини пәйда қилди. Мәсилән, Германияниң сабиқ вице-канцлери вә ташқи ишлар министри Ганс-Дитрих Геншер Қазақстан Президентиниң заманивий дөләт қуруштики чоң ролини алаһидә тәкитлиди. У Қазақстан вә ГФҖ, шундақла Европа Иттипақи оттурисидики иҗтимаий-сәясий мәсилиләрниң кәң даирисини муһакимә қилиш үчүн диалог мәйдани сүпитидә қурулуватқан Берлин Евразия клубиниң пәқәт икки мәмликәтниң өз ара йеқинлишиши үчүн йеңи имканийәтләрни яритипла қоймай, бәлки җумһурийәтниң хәлиқ ара мәйдандики аброй-инавитиниң өсүшигә ярдәм қилидиғанлиғиға ишәнчә билдүрди. Униңдин ташқири сәпәр давамида Қазақстан Президенти ГФҖниң федерал президенти Кристиан Вульфф, ГФҖниң федерал канцлери Ангела Меркель, ГФҖ ташқи ишлар министри Гидо Вестервелле вә башқиму рәсмий шәхсләр билән учрашти. Мәзкүр учришишлар вақтида Президент Қазақстанниң Европа Иттипақиниң Мәркизий Азия үчүн стратегиясиниң әмәлгә ашурулушини алқишлайдиғанлиғи тоғрилиқ ейтти. Нурсултан Назарбаев Германия Қазақстан ЕБҺТқа рәислик қилғанда, уни қоллап-қувәтлигәнлиги вә консультативлиқ ярдәм көрсәткәнлиги үчүн миннәтдарлиқ билдүрди. Шундақла Авғанстандики вәзийәтни тәртипкә кәлтүрүш, терроризмға, экстремизмға қарши күришиш, ядро қуралини тарқатмаслиқ, БМТни ислаһат қилиш, шундақла Қазақстанниң Европа Иттипақи билән һәмкарлишиши охшаш хәлиқ ара һәмкарлиқниң муһим мәсилилири бойичә пикир елишти. Музакириләр йәкүни бойичә бир қатар һөкүмәтләр ара вә идариләр ара һөҗҗәтләр имзаланди. Униңдин ташқири, делегация тәркивигә киргән тиҗарәт саһасиниң вәкиллири баһаси 4 миллиард евродин жуқури 50тин ошуқ бирләшкән коммерциялик һөҗҗәтләрни имзалиди. Экспертларниң пикричә, мәзкүр сәпәр иккитәрәплимә сәясий, ихтисадий вә мәдәний, гуманитарлиқ һәмкарлиқни техиму тәрәққий әткүзүшкә җиддий иҗабий тәсир йәткүзиду.