• Әхбаратлар еқими
• 11 Қаңтар, 2024

Әмгигигә апирин ейтимиз

Һәрқандақ билим очиғи камаләтлик шаһадәтнамә берип, һаят йолиға атландурған шагиртлириниң егилигән кәспи, йәткән утуқлири, җәмийәткә пайдилиқ шәхс болуп йетилиши, өз хәлқигә, елигә хизмәт қилиши, алий инсаний хисләтлири билән пәхирлиниду.
Ана тилида билим елип, Қазақстанниң абройлуқ алий оқуш орунлирида оқуватқан һәм бүгүнки күндә елимизниң һәрхил саһалирида ишләватқан оғул-қизлиримиз бар. Шу җүмлидин Түгмән уйғур оттура мәктивидин учум болған учумкарларниң ичидин ахирқи 20 — 25 жил ичидә муәллим, оқутқучи, дохтур, һәрбий хадим, сәнъәткар, инженер кәспини егиләп, елимизниң иҗтимаий-мәдәний тәрәққиятиға мунасип төһпә қошуватқан уйғур пәрзәнтлири көпләп санилиду. 
Бүгүнки күндә мәктәп оқуғучилири өз һаятини гаджетларсиз көз алдиға кәлтүрәлмәйду. Статистика бойичә 90 пайиз балиларниң өйидә компьютер бар, 80 пайизи болса, күндиликтә Интернет торлириға кириду. Муәллимләрниң бесим көпчилигиму вақтини үнүмлүк пайдилинип, дәрисләрдә рәқәмлик технологияләрни ишләтмәктә. Рәқәмлик муәллим, әлвәттә, қиммәт, йеңи виртуаллиқ шлем, үскиниләрни пайдиланмайду. Бу йәрдә гәп, технологияниң баһасида әмәс, бәлки муәллимниң әйнә шу заманивий техникилар билән ишләш қабилийити тоғрисида болуватиду. Оқуғучилар, әлвәттә, йеңи заманниң йеңичә қуралланған рәқәмлик педагогни яхши қобул қилиду. Шуниң үчүн билим бериштә рәқәмлик технологияләрни пайдиланған дурус. Әкси әһвалда балиларниң билим елишқа дегән қизиқиши төвәнләп кетиши мүмкин.
Оқуғучилар билиминиң сүпитини яхшилаш пәқәт муәллимләргила әмәс, шундақла көп җәһәттин ата-аниларғиму мунасивәтлик екәнлигини һәммимиз яхши билимиз. Буни яхши чүшәнгән мәктәп коллективи ата-анилар биләнму қоюқ мунасивәт бағлап келиватиду. Нурғунлиған ишларни Ата-анилар комитети билән бирликтә әмәлгә ашуруватиду. Педагогларму өзлиригә қоюлуватқан тәләпләрни чүшәнгән һалда бар билими билән күч-қувитини бир мәхсәткә – яш әвлатқа чоңқур билим, аңлиқ тәрбийә беришкә сәпәрвәр қиливатиду. Һалавити аз, җапаси тола, еғир, мәшәқәтлик, амма шәрәплик ишни җанпидалиқ билән атқуруватқан инсанларниң әмгигигә апирин ейтип, уларға техиму чоң утуқлар тиләймиз.
Хуласиләп ейтқанда, мәзкүр билим орниниң кәлгүсидә миллитимиз шәнини қоғдашқа қадир, сүпәтлик билимгә егә мутәхәссисләрни тәрбийиләп, йетилдүридиған дәргаһқа айлинидиғанлиғиға ишәнчимиз камил.

Сабрина ГУЛАХУНОВА,
Түгмән уйғур оттура мәктивиниң 8-синип оқуғучиси