• Әхбаратлар еқими
• 11 Қаңтар, 2024

Өтмүшимиз биләнла яшимайли

Дөләт рәһбири Қасым-Жомарт Тоқаевниң «Еgemen Qazaqstan» гезитида бесилған көләмлик сөһбитини оқуп, елимизниң һазирқи әһвали билән келәчиги тоғрилиқ көп мәлуматқа егә болдуқ.
Елимиз Президенти көпчиликниң ойида жүргән пикирләргә өз мәвқәсини билдүрүп, бирқатар мәсилиләр тоғрилиқ көзқаришини очуқ йәткүзгән. Униң ичидә Январь вақиәси, қош һакимийәт вә кона система тоғрисидики елип-қачти гәп-сөзләргә чекит қойиду. Президент қуруқ сөздин қутулуп, әл болуп, бүгүнимиз билән әтики күнүмизгә биләк түрүп ишләйдиған вақитниң аллиқачан йәткәнлигини қәйт қилған.
«Бизниң илгири ким болғанлиғимиздин һазир ким екәнлигимиз, әң муһими, келәчәктә ким болидиғинимиз һәммидин әһмийәтлик» дәп тәкитлигәч, «Биз өткән күнимиз билән өмүр сүрмишимиз керәк. Әксичә, келәчигимизни парлақ қилишқа интилип, милләтниң улуқлуғини ениқ ишимиз, әмәлиятимиз билән дәлиллишимиз тегиш», дәп әл келәчиги үчүн муһим мәсилиләргә тохтилип, елимиздә әмгәксөйгүчлүк билән бәрпакарлиқ мунасип баһалиниши, билимгә интилиш билән йеңилинишқа йүзлиниш тәнтәнә қазиниши керәклигини ениқ тәкитләп өтти. Президент мошу сөзләр арқилиқ елимиз келәчигиниң яшларниң қолида екәнлигини йәткүзди. Мустәқил мәмликәтниң түврүги — билимлик әвлат десәк, йеңи дәвирниң күн тәртивидә турған муһим вә асасий мәсилә — билим бериш, илим-пәнни риваҗландуруш.
Сөһбәттә мәнавият мавзусиму нәзәрдин сирт қалмапту. Дөләт рәһбириниң мону сөзлиригә нәзәр ағдуруп көрәйличу: «Дуниятонушимизға ят мәдәнийәтләргә әгишиштин, ялған вәтәнпәрвәрликтин, сахта садақәтликтин сақлинишимиз керәк. Хәлқимизниң бойидики камчилиқларға көз жумуп қаримай, униңдин қутулушимиз һаҗәт. Мошуниң һәммиси күн санап өзгириватқан бүгүнки еғир заманда һаят кәчүрүватқан Қазақстанниң келәчиги үчүн бәк әһмийәтлик».
Президентниң һәртәрәплимә мавзуларни өз ичигә алған ушбу сөһбити җәмийәткә тариған асаси йоқ һәрхил елип-қачти гәп-сөзләрни пичақ кәскәндәк кесип, әл-жутниң кәлгүсигә дегән үмүт-ишәнчисини көрситип һәм бәлгүләп бәрди. Муһими, елимизниң бирлигигә сәлбий тәсирини йәткүзидиған һәрхил «ундақ болған екән, мундақ қилинмақчи екән» дегәнгә охшаш миш-мишларға қурулған Январь қайғуси билән қош һакимийәт мавзусидики тузи йоқ сөзләргә толуқ хатимә берилди. 
Президент ейтқинидәк, биз көчкә әгишидиған әмәс, шу көчни башлайдиған мәмликәтләрниң қатарида болушимиз тегиш. Яхшидин үгинип, ямандин жиркинишни билишимиз лазим. Миллий қәдрийәтләр дегәндә, адиллиқ билән ғәмхорлуқ кәби изгү хисләтләрни бойиға мүҗәссәмләндүргәнни адил инсан дәймиз. Адаләтлик Қазақстанни адил инсанлар қуриду. Демәк, адил инсан дегинимиз — адил язғучи, адил алим, адил устаз, адил шагирт.

Әхмәтҗан ҺАШИРИ, 
Қазақстанниң хәлиқ язғучиси