• Әхбаратлар еқими
• 18 Қаңтар, 2024

Мәргәнниң қаза болғиниға 80 жил толди

14-январь күни 2-Прибалтика фронти 22-армияниң 54-айрим атқучлар бригадисиниң мәргини, ефрейтор вә Кеңәш Иттипақиниң Қәһримани Әлия Молдағулованиң қәһриманларчә қаза болғиниға 80 жил толди. У Кеңәш армиясидә икки жил хизмәт қилип, 18 йешида җәңдә қаза болди.

Насирахун РОЗАХУНОВ,
«Uiğur avazi» 

Әлия Молдағулова 1925-жили 25-оғузда Ақтөбә вилайити Хобди наһийәсигә қарашлиқ Булақ йезисида туғулған. Балилиқ дәвридила ата-анилиридин айрилған.
1942-жили 1-оғузда Әлия Молдағулова фронтқа әвәтиш илтимаси билән һәрбий комиссариатқа әризә бәргән. 1942-жили 21-көнәктә фронтқа атлинишиға бағлиқ техникумдин рәсмий түрдә чиқирилди.
1943-жилниң чиллә ейида Әлия бирнәччә курсдаш достлири билән биллә 54-атқучлар бригадисиға мәргән сүпитидә әвәтилди. Уруш давамида Әлия немис армиясиниң 78 солдат вә офицерини уҗуқтурған.
1944-жилниң қәһритан ейиниң бешида Ленинград-Новгород операцияси давамида 54-атқучлар бригадиси Псков вилайитидики Новосокольники шәһиригә келидудә, дүшмәнниң мудапиәсини бузуп өтүп, шәһәрниң шималиға чиқиду. Мәргән Әлия Молдағулова хизмәт қилған 4-батальонниң бригада қисимлири Насва станциясиниң төмүрйолиға чиқиду. Бу йәрдә улар дүшмәнниң қаттиқ қаршилиғиға учрайду. Әлия мошу күни үч мәртә дүшмәнниң һуҗумини қайтурушқа қатнишиду.
Әйнә шундақ шиддәтлик җәңләрниң биридә минаниң партлишидин қолидин җараһәтләнгән Әлия дүшмән солдатлири билән йәкму-йәк күрәшкә қатнишиду. Немис солдатлири билән траншеядә йүз бәргән җәңдә Әлия иккинчи җараһәтни алиду. Қәһриман қиз немис офицерини өлтүрүп үлгириду, әпсус, алған еғир җараһәттин өзиму көз жумиду.
Шу чағда хәвәр қилинишичә, Әлия Молдағулова Новосокольник наһийәсиниң Монакова йезисида дәпин қилиниду.
1944-жилниң 4-сәпәрдә Әлия Нурмухамбетқизи Молдағуловаға Кеңәш Иттипақиниң Қәһримани унвани берилиду. У шундақла Ленин ордени биләнму мукапатланған.