• Әхбаратлар еқими
• 18 Қаңтар, 2024

Йеңи мәктәп ишигини ачти

Һазир оттура билим бериш системисидики проблемиларниң бири – мәктәпләрдики орун тапчиллиғи. Бүгүнки тапта елимиздә 225 миң оқуғучиға орун йетишмәйдекән. Җиддий чарә қобул қилинмиса, 2025-жилға қәдәр орун тапчиллиғи 1 миллионға йетиши еһтимал. Шуңа Дөләт рәһбири Қасым-Жомарт Тоқаев һөкүмәткә 2025-жилғичә, кам дегәндә, миң мәктәп селиш тоғрилиқ тапшурмини жүклиди. Президентимизниң тапшурмисиға бенаән, Уйғур наһийәсиниң мәркизи Чонҗа йезисида йеңи мәктәп селинип, пайдилинишқа берилди. 

Сабирәм ӘНВӘРОВА,
«Uiğur avazi»

Ж.Қудайбергенов намидики йеңи мәктәпниң ечилиш мәрасимиға Алмута вилайитиниң һакими Марат Султанғазиев, вилайәтниң пәхрий гражданлири, пешқәдәм устазлар билән ата-анилар қатнашти. Тәбрик сөзләрдин илгири риясәтчиләр кона мәктәп тарихиға қисқичә тохтилип өтти. Бүгүнки күндә йеңи бенаға көчирилгән билим дәргаһи 1968-жили «Чонҗа қазақ оттура мәктиви» болуп ечилип, 1993-жилдин башлап Ж.Қудайбергеновниң намида атилип келиватиду. 
– Мошу мәктәптә талантлиқ, билимлик балилиримиз көпәйсун. Учумкарлар қабилийәтлик мутәхәссис болуп, Қазақстанимизға адил хизмәт қилсун. Шу сәвәплик, билим сапасини көтириш биз үчүн интайин муһим. Биз вилайәт бойичә 53 йеңи мәктәп селип, үч жилда үч сменилиқ мәктәп мәсилисини һәл қилишни реҗигә қойдуқ, – деди ечилиш мәрасимида дәсләп сөзгә чиқип, көпчиликни ушбу тарихий күн билән тәбриклигән вилайәт һакими Марат Султанғазиев. 
Кейинки сөз мәзкүр мәктәпниң қурулуш ишлирини жүргүзгән «Нұр Шапағат Құрылыс» ҖЧЙ мудириниң орунбасари Дәурен Ақтамовқа берилди. У устазлар билән оқуғучиларни қизғин тәбрикләп, йеңи бенаниң ачқучини мәктәп мудири Бибигүл Абдиловаға тәнтәнилик рәвиштә тапшуруп бәрди. Андин вилайәт һакими Марат Султанғазиев билән вилайәтниң Пәхрий граждини Ызғарбек Бектурсынов йеңи мәктәпниң лентисини қийди. 
 Чачқиси чечилип, лентиси қийилғандин кейин, вилайәттин кәлгән меһманлар, наһийә рәһбәрлиги вә жут турғунлири болуп, йеңи мәктәпниң босуғичидин атлап, заманивий билим дәргаһини зиярәт қилди. Әң илғар җабдуқлар билән җабдуқланған һашамәтлик мәктәпниң ичиму, сиртиму әҗайип. Жирақтин көзгә чүшидиған ушбу йеңи билим дәргаһи әсли 900 балиға реҗиләнгән екән. Һазирқи вақитта бу йәрдә 850 оқуғучи билим алмақта. Уларға сүпәтлик билим бериштә алий билимлик йүз муәллим хизмәт қиливатиду. 

ИЛАВӘ: мәктәпниң ечилиш мәрасимидин кейин вилайәт һакими Марат Елеусизоғли Чонҗиға селиниватқан спорт комплексида болуп, җавапкәр шәхсләргә қурулуши тохтап қалған мәркәздики камчилиқларни түзитишни җекиди. Андин наһийә һакими Бота Елеусизова билән бирликтә Баһар йезисиға қәдәм тәшрип қилип, наһийәдики бирдин-бир ветеран Алим Кебировниң өйидә болуп, йүз яшқа толған мөтивәрни тәбрикләп, чапан йепип, һөрмәт көрсәтти.