• Әхбаратлар еқими
• 18 Қаңтар, 2024

Тәрәққият таразиси – билимидә

Президентимиз Қасым-Жомарт Тоқаевниң ахирқи бәргән сөһбитини мәмнунийәт билән оқуп чиқтим. Сөһбәтниң намидин чиқип турғинидәкла, биз илғар пикирлик милләт сүпитидә пәқәт алға интилишимиз керәк. Шу җүмлидин Дөләт рәһбири бизни алға йетиләйдиған мәхсәт-вәзипиләрниму ениқ көрситип берипту.
Ахирқи жилларда елимиздики билим саһасида көплигән өзгиришләр йүз бәргини раст. Қоюлуватқан тәләпләргә яриша, устазларға дегән һөрмәтму өсти. Һөрмәтла әмәс, заманға лайиқ маашимизниңму жилдин-жилға көпийип келиватқанлиғи хурсән қилиду. Тәрәққиятниң таразиси – яшларниң билими билән өлчиниду десәк, Президентимизниң тапшурмиси билән йеңи мәктәпләр селинип, яш әвлатниң сүпәтлик билим елишиға һәртәрәплимә шараит яритилмақта. Шәхсән өзәм хизмәт қиливатқан А.Розибақиев намидики 153-мәктәп-гимназиясини мисалға алмақчимән. Буниңдин бир жил илгири устаз сүпитидә дәсләпки паалийитимни дәл мошу мәктәптин башлиғинимға һеч өкүнмәймән. Сәвәви, мәктәптики мүмкинчиликләр мениң заманивий устаз сүпитидә изчил алға интилишимға түрткә болмақта. 
Бүгүндә мәктивимизниң барлиқ синиплири әң ахирқи үлгидики интерактивлиқ тахтилар билән толуқ җабдуқланған. Буниңдин башқа китапхана, мәҗлисләр зали һәм психологларниң кабинетиму йеңи технологияләр билән толуқланди. Умумән, мәктәпниң маддий-техникилиқ базиси көргән кишини қизиқтурмай қоймайду. Шуниңға лайиқ муәллимләргә қойилидиған тәләпму жуқури. Ахирқи бир-икки айниң ичидә мәктивимиз устазлири БИС технологияси вә IB программиси бойичә курсларни пүтәрди. Инглиз тили пәниниң муәллими ретидә IB программиси бойичә координаторлиқ қилиш вәзиписи маңа жүкләнди. Һазирқи күндә кәсипдашлиримиз билән һәмкарлиқта һәр икки программа үстидин зич бағлиништа иш елип бериватимиз. Мана бу алға интилишниң әмәлий ипадиси әмәсму?!
Өткән оқуш жили билән бийилқи жилни мисалға алғанниң өзидә, мәктивимизгә мәхсус тәҗрибә алмишиш мәхситидә, Моңғолия, Қирғизстан, Гагаузия қатарлиқ әлләрдин кәлгән вәкилләр коллективимизға, шу җүмлидин Қазақстандики билим бериш системисиға жуқури баһа берип кетишти. Улар болупму өзгә тиллиқ мәктәпләрни ечип, азсанлиқ милләтләрниң сақлинип қелишиға зәмин яритиватқан қазақ елиниң кәңқосақлиғиға толиму сөйүнди. 
Бизгә мошундақ мүмкинчиликләрни яритип бериватқан дөлитимизгә дегән миннәтдарлиғимиз чәксиз! Мән өз ана тилимда билим алдим, мана әнди анатиллиқ мәктивимдә устаз болуп хизмәт қиливатимән. Президентимизниң сөһбитини оқуп чиқиш җәриянида, барчә милләткә тәң һоқуқ бәргән дөлитимизниң тез алға илгириләп, карванбеши мәмликәтләрниң биригә айлиниши үчүн ениқ реҗиләр қурулғанлиғиға көз йәткүздүм. Алдики вақитта мәнму шу реҗиләрниң орунлишиға өз үлүшүмни қошуп, елимиз үчүн адил әмгәк қилидиған вәтәнпәрвәр, билимлик вә қабилийәтлик яшларни тәрбийиләшкә бар күч-қувитимни салимән. 
                            Гүлназ АБЛЕТИПОВА, 
А.Розибақиев намидики 153-мәктәп-гимназияниң инглиз тили пәниниң муәллими
Алмута шәһири