• Әхбаратлар еқими
• 18 Қаңтар, 2024

Барикалла, уйғур қериндашлар!

Өткән һәптидә исми көпчиликкә тонулған көрнәклик журналист, Қазақстанниң хизмәт көрсәткән әрбаби Қайнар Олжай өзиниң Facebookтики сәһиписидә бизниң гезитимиз муштирилири саниниң көпийишигә мунасивәтлик пикрини қалдурған екән. Төвәндә шуни гезитимиз арқилиқ оқурмәнлиримизгә йәткүзүшни мувапиқ көрдуқ.
Йеқинда «Уйғур авази» гезити муштирилири саниниң 20 миңдин ашқанлиғи һәққидә әхбаратни оқуп қалдим. Шу мәһәл бир күн илгири йеза почтисиға барғиним ядимға чүшти. 
Астанадики бир мәһкимә сәл илгири ватсап билән әвәткән һөҗҗәтниң түп-нусхусини сориған еди. Аэропортқа берип, алликимләргә тәлмүргәндин көрә, уни қануний йол билән почта арқилиқ әвәтишни тоғра көрдүм. Мошу вақиә алдида Айбар Олжаев вә йәнә бир мухбирниң «Қазпошта» акционерлиқ җәмийитиниң Алмута вилайитигә қарашлиқ чәт йәргә орунлашқан бөлүмчисидики өзгиришни, әйнә шу өзгиришләрни әмәлгә ашурған почта рәһбирини махтап язғинини оқуп, күлгән едуқ. «Һәққини төлигәндин кейин немишкә махтимасқа» дегән едуқ бәндичиликкә селинип. Бекарға күлгән екәнмиз. Мону почтиниң бенасиму җөндилипту. Сиртила әмәс, ичиму яхши. Адәм нурғун. Үч деризидә хизмәт көрситиливатиду. Новәткә турдуқ. Бизгә охшаш хәт селиватқан, хәт вә тәбрикләрни еливатқан, ахча авдуруватқан, несийәлирини йепиватқан хәлиқ. 
 Почта хизмитиниң керәк екәнлигини әндила көргәндәк қарап олтираттуқ, бир ақсақал кирип кәлди. Новәт алди. Ахири у киши бир деризигә, биз йәнә бир деризигә кәлдуқ. Қолидики ахчисиға қарап, ичимдә «несийәсини төлигили кәлгән болса керәк» дәп ойлидим. Амма у «Йеңи жилниң гезити кәлдиму?» дәп қалди. «Техи кәлмиди» дәп җавап бәрди почтичи қиз. «Қайси гезитқа йезилдиңиз?» дәп соридуқ ақсақалдин. «Уйғур авазиға» деди у. Андин Қазақстандики ялғуз уйғур гезитиға һечким мәҗбурлап язмисиму, хәлиқниң йезиливатқанлиғини ейтти. Шуниңдин кейин һәрбир өйгә апиридиған почта хадимлириниң маашини көтиришниң керәклигини қошуп қойди. Буни келәчәктә «Қазпоштиниң» йеңи рәһбәрлири қолға алар. Биз болсақ, өзини «Сәдирдин» дәп тонуштурған жутдишимизға бу гезитни «Коммунизм туғи» вақтидин билидиғанлиғимизни, «Уйғур авази» дәп өзгәртип, уни узақ жиллар башқурған Йолдаш Азаматовни яхши билидиғанлиғимизни ейттуқ. 
 Мошундақ җанкөйәрлири 20 миңға йәткән нәширни тәбрикләймиз. «Қазпошта» болса, өз гезитини күткән оқурмәнлирини күткүзүп қоймисекән дәп тилидуқ.