• Әхбаратлар еқими
• 25 Қаңтар, 2024

Көрмигәнләр арманда...

Әдәбият вә сәнъәт – милләтниң әйниги һәм келәчиги. Уни сақлапла қалмай, кәлгүси әвлатқа беҗирим һаләттә йәткүзүш – муқәддәс борчимиз. Хошал қилидиғини, кейинки вақитларда Қ.Ғоҗамияров намидики җумһурийәтлик дөләт академиялик Уйғур музыкилиқ-комедия теат­риниң репертуарида хелә йеңилиқлар орун алмақта.
Йеңи жил һарписида биз, бир топ мәшрәп әһли, Уйғур театрида «Тәбәссүм» программисини тамашә қилдуқ. Мәзкүр йеңижиллиқ сәнъәт кечилигини көрүп, вақитниң қандақ өтүп кәткәнлигиниму туймай қаптимиз. Театр коллективиға апирин ейтқач, үстүн кәйпият илкидә өйгә қайттуқ. Аридин бираз вақит өтүп, биз, достлар, «Аршин-мал-алан» қоюлумини тамашә қилип, бәк һөзүрләндуқ. Яш сәнъәткар Муһидин Варисовниң талант-қабилийитигә қайил болуп, атақлиқ артист, күлкә маһири, мәрһум Махмут Дәраевниң орнини басидиған избасариниң йетилип чиқиватқанлиғиға хуш болуштуқ.
Йеқинда сөйүмлүк театримизда болуп өткән «Мәшрәпкә мәрһәмәт» сәнъәт кечилигигиму бардуқ. Театр коллективи мәзкүр кәчкә иҗадий яндишип, яхши тәйярлиқ көрүпту. «Рухсарә» вә «Нава» ансамбльлириниң, шундақла бир топ драма артистлириниң қатнишиши билән өткән ушбу кәчтин һөзүрлинип қайттуқ. Сәнъәткарларниң кийимлири өзлиригә бәк яришимлиқ болуп, сәһнини техиму гөзәлликкә бөлиди. Қисқиси, пүткүл диққитимиз сәһнидә болуп, вақитниң қандақ өтүп кәткәнлигини байқимай қаптимиз. Артистларниң иҗрасидики рольлар вә уларниң ейтқан нахшилири, уссулчиларниң әвришим уссуллири көпчиликкә арамбәхш дәмләрни һәдийә қилди. 
Тамашибин қәлбидә чоңқур тәсират қалдурған ушбу сәнъәт кечилигиниң сценарий муәллипи Гүлбаһар Насироваға вә уни бабиға йәткүзүп сәһниләштүргән режиссер Әзиз Искәндәровқа ейтар алқишимиз чәксиз. Мошу йәрдә шуниму алаһидә тәкитләш лазимки, Уйғур театриниң қол йәткүзүватқан ушбу утуқлирида, әлвәттә, театр мудири Дилмурат Баһаровниңму роли чоң, дәп ойлаймиз.
Йеңилинишқа йүз­линиватқан Уйғур театриниң иҗадий коллективиға миннәтдарлиғимизни изһар қилғач, келәчәктә йеңи әсәрләрниң сәһнигә чиқишиға тиләкдашмиз вә тамашибининиң көп болушини истәймиз.

И.БУРҺАНДИНОВ,
Т.НИЯЗОВ,
Б.ИЛАХУНОВ,
А.ҚӘМИРДИНОВ,
А.ИМӘРОВ.