• Әхбаратлар еқими
• 25 Қаңтар, 2024

Мисраларға қачиланған жүрәк нидаси

Азнат ТАЛИПОВ, 
«Uiğur avazi»

 Жүрәк нидасини мисраларға қачилиған сөз зәргари, шаирә Патигүл Мәхсәтованиң «Жүрәк соқуп турғанда» дәп атилидиған шеирлар топлими шеирийәт мухлислири билән үз көрүшти. 
Китапниң дәсләпки сәһиписидә шаирә балилиқни кинәйду, киндик қени төкүлгән, қумлуғиниң тәпти кәтмигән ана жутни, ата-ана билән өткән беғубар күнләрни күйләйду: 
Яшисамму ана жут, сәндин жирақ, 
Өмүр кемәм бағланған өзәң – қирғақ.
Йол көрситип мәшъәлдәк йоруп турар, 
Ата-анам бир чағлар яққан чирақ...
Мәшһур қәләм саһиблириниң бири Абдуқадир Җалалдинниң хәлиқ арисида тарқалған «Жүриги барларниңла жүриги ағрийду» дегән чоңқур мәналиқ ибариси бар. Шаирниң жүриги әлниң, хәлиқниң ғәм-тәшвишидин хали болуши һәргиз мүмкин әмәс. Шуңлашқа әл муңини, һаятниң тәңсизлигини йәлкисидә көтирип өтүшниң өзи – шаирларға әта қилинған муқәддәс дәрт. 
Кетәлмәй, кечәлмәй шеирни ташлап,
Яшаймән бәзән шат, бәзән көз яшлап.
Арминим, ахирқи дәқиқиғичә, 
Яшисам шаирлиқ дәрдин һапашлап.
«Шеирлирим – дәртлирим тартқан» дәп турмуш қайнамлирида чиниққан қәләм саһиби шаирлиқ дәрттин һәргиз баш тартмайду.
Болсиму бәк еғир шаирлиқ дәрди,
Бу дәртни қудрәтлик бир Алла бәрди.
Қәлбимни чүшәнгән хәлқим бар екән,
Йоқимас һечқачан шеирим қәдри.
Йезилмиған, язалмиған шеирлириниң алдида җавапкәрлигини һис қилған қәләм егисиниң жүриги пүтүнсүрүк бир хәлиққә тән жүрәкниң садасиға айлинип, үмүт беғишлайду. Нәқ шу үмүт-арман жүрәкниң соқушини тохтатмайду. 
Җаһанға чечилип тенигән арман,
Мисраға тизилар кәткичә дәрман.
Әй, жүрәк, сениңдин өтүнүп қалай
Арманға йәткичә соқуп тур аман.
Шаирәниң сияси қуримиған рубаийлири билән лирикилиқ поэмисиму мәзкүр топламдин орун алған. Хуласә сөзни шаирәниң жүрәк соқушини тиңшап, пикир ейтидиған китапханниң әнчисигә қалдуримиз.