• Әхбаратлар еқими
• 25 Қаңтар, 2024

Муәллим болуш бәрпакарлиқни тәләп қилиду

Йолдаш МОЛОТОВ,
«Uiğur avazi»

Мәлумки, муәллим әмгиги – шәрәплик. Бу кәсипниң егилири дайим иҗадий издиништә болуши шәрт. Шундақла мәзкүр мутәхәссәслик чоң җавапкәрликни тәләп қилиду. Чүнки балилар қәлбигә мәрипәт уруғини чечиш үчүн униң өзиниң билими алий дәриҗидә болуши лазим. Мана мошундақ тәләпләргә мувапиқ болған, жуқури җавапкәрликни һис қилған адәмла һәқиқий рәвиштә муәллим болалайду, һөрмәт қазиналайду. Әйнә шундақ устазларниң бири – Алмута шәһиридики 29-мәктәпниң инглиз тили пәни муәллими Гүлчеһрәм Йүсүповадур.
— Мениң пикримчә, педагогниң асасий кәспий сүпәтлири – әмгәксөйгүчлүк, ишләмчанлиқ вә җавапкәрликтин ибарәт болуши шәрт, – дәйду Гүлчеһрәм Туйғунқизи. – Шундақла алдиңға мәхсәт қоюш, шу мәхсәткә йетишниң дурус йоллирини таллаш. Педагогниң йәнә бир кәспий алаһидилиги – гуманизм. Йәни, яш әвлатқа дуниядики әң чоң қәдрийәт, байлиқ сүпитидә қараш һәм мошу көзқаришиңни өзәңниң иш-һәрикитиниң, мунасивитиң билән намайиш қилиш. Қедимий грек философи Сократ «Сот, дохтур вә муәллим болуш – Яратқучидин» дегән екән. Йәни бу мошу кәсип егилири инсанниң тәғдиригә, һаятиға чоң тәсир қилиду дегәнликни билдүриду. 
 Гүлчеһрәм Йүсүпова Уйғур наһийәси, Чарин йезисидики М.Һәмраев намидики оттура мәктәпни, кейин Аблайхан намидики Қазақ дуния тиллири вә хәлиқара мунасивәтләр университетини тамамлиған. Инглиз тили пәниниң муәллими мутәхәссислигини егиләп, өзиниң әмгәк паалийитини Алмутидики 15-лингвистикилиқ гимназиядә башлайду. У мошу билим дәргаһида 20 жил әмгәк қилди. Гимназия мудириниң тәрбийә вә билим ишлири бойичә орунбасари болди. Гүлчеһрәмниң шагиртлири инглиз тилидин наһийәлик, җумһурийәтлик конкурсларда дайим мукапатлиқ орунларни егиләп турди. Униң рәһбәрлигидә оқуғучилар «Comelot» мәктәп театрида инглиз тилида спектакльларни сәһниләштүрүп, шәһәрдики иҗадий конкурсларғиму иштрак қилди. Оқуғучилар Шекспирниң «Лир падиша», Б.Шоуниң «Булбул вә қизилгүл», «Өз дөлитиниң сехиргәри» спектакльлирини сәһниләштүрди. Тәкитләш лазимки, 15-лингвистикилиқ гимназия дәсләпкиләрдин болуп, пилотлиқ режимда Қазақстанда җарий қилинған йеңиланған мәктәп программисини киргүзүштә елимиздики 30 мәктәпниң қатарида болди. Гүлчеһрәм Туйғунқизи йеңиланған дәрисликләрниң муәллипләр билән беваситә ишләп, уларни тәҗрибидин өткүзүш ишлириға паал қатнашти.
— Һазир һәрқандақ дөләтниң тәрәққиятини илғар маарип системисисиз көз алдимизға кәлтүрүш тәс, — дәйду талантлиқ педагог. — Тәрәққият билим беришниң йеңи стратегиялирини тәләп қилмақта. Елимиздә мошу саһаға алаһидә көңүл бөлүнүватиду. 2019-жили «Педагог мәртивиси тоғрилиқ» қанун қобул қилинди. Муәлимләр ишидики қәғәзвазлиқ азайди, маашлар өсти. Шундақла педагогларға болған тәләпләрму күчәйди. Һазир биз билим бериш җәриянида заманивий технологияләрни вә васитиләрни кәң қоллиниватимиз. Шундақ васитиләрниң бири – электронлуқ дәрисликләр. Бу дәрисликләр һәҗими җәһәттин кичик, йәни һәммә пәнләр бирла планшетқа җәмләнгән. Иккинчидин –  қолайлиқ: балилар еғир сумкиларни көтәрмәйду. Әң муһими, балиларниң оқушқа болған қизиқиши ашиду. Мениң пикримчә, муәллимниң йәнә бир муһим вәзиписи – балиларға кәсип таллашни үгитиш. Чүнки бала өзиниң салаһийитигә, билимигә лайиқ мутәхәссислик таллашни билсә, һаятта өз орнини тапиду. Кейинки жилларда оқуғучилирим арисида муәллим болушни халайдиғанлар сани өсти. Мән улардин «Немишкә бу кәсипни таллидиңлар?» дәп сорисам, «Билимимни башқиларға үгитишни халаймән», «Балилар билән ишләшни яхши көримән», «Муәлим болуш – бу һөрмәт» дегән җавапларни алдим. Демәк, бизниң кәспимизниң мәртивиси һечқачан чүшмәйду.
 Әлвәттә, Гүлчеһрәм һаятта бәхитлик ана. Йолдиши Марс иккиси үч пәрзәнт тепип, қатарға қошмақта. Чоң қизи Гүлзадәм С.Асфендияров намидики медицина университетини тамамлап, һазир Астана медицина университетида магистратурида билим еливатиду. Оғли Диасму С.Асфендияров намидики медицина университитида билим алмақта. Камилла болса, мәктәптә оқумақта, у келәчәктә дизайнер болушни арман қилиду.