• Әхбаратлар еқими
• 25 Қаңтар, 2024

Мәркәзниң йеңи рәиси тонуштурулди

Рашидәм РӘҺМАНОВА,
«Uiğur avazi»

 Өткән чаршәнбә күни Ишиктә шәһириниң Т.Молдағалиев намидики наһийәлик Мәдәнийәт өйидә Әмгәкчиқазақ наһийәлик Уйғур этномәдәнийәт мәркизиниң жиғини өтүп, униңда мәзкүр мәркәзгә йеңидин тайинланған рәис тонуштурулди. 
Жиғинға җумһурийәтлик Уйғур этномәдәнийәт мәркизиниң рәиси, Қазақстан хәлқи Ассамблеяси Кеңишиниң әзаси Долқунтай Абдухелил, Қазақстан Җумһурийити Президенти йенидики Миллий қурултайниң вә ҚХА кеңишиниң әзаси, ҖУЭМниң Пәхрий рәиси Шаһимәрдан Нурумов, Алмута вилайәтлик Уйғур этномәдәнийәт мәркизиниң рәиси Әркин Җүмәев вә наһийә йезилириниң жигитбашлири, мәркәз­ниң йезилардики шөбилириниң рәислири, ханим-қизлар вә ақсақаллар кеңәшлириниң вәкиллири, җамаәтчилик ишлириниң активистлири қатнашти.
– Җумһурийәтлик Уйғур этномәдәнийәт мәркизиниң 24 шөбиси рәсмий тиркилип, ройхәттин өткән. Мәркәз шундақла  6 жәмийәтлик тәшкилат вә оттуздин ошуқ мәһкимә-идарә билән меморандум асасида һәмкарлиқта паалийәт елип бериватиду, – деди өз сөзидә Долқунтай Абдухелил. — ҖУЭМниң Низамнамиси бойичә мәркәз рәһбәрлиги наһийәләрдики шөбилириниң рәислирини тайинлашқа һоқуқлуқ. Өзәңлар билисиләрки, 9 жилға йеқин вақиттин бери Сулайман ака Мәхсүтов Әмгәкчиқазақ наһийәлик Уйғур этномәдәнийәт мәркизиниң рәиси сүпитидә нурғунлиған ишларни әмәлгә ашурди. Кейинки бир-икки жилдин бери, саламәтлигигә бола, вәзиписидин бошитишни илтимас қиливатиду. Әлвәттә, бизгә акимизниң илтимасиға қулақ селишқа тоғра келиватиду, – деди Долқунтай Абдухелил көпчиликкә Әмгәкчиқазақ наһийәлик Уйғур этномәдәнийәт мәркизиниң йеңи рәиси Ялқунҗан Садиқовни тонуштуруп. 
ҖУЭМ рәиси Сулайман Мәхсүтовқа җәмийәтлик ишлардики паалийәтчанлиғи үчүн миннәтдарлиқ бүлдүрүп, униңға мәркәзниң Тәшәккүрнамиси билән «Ғәмхор» медалини тапшурди. Шундақла үстигә чапан йепип, униңға мустәһкәм саламәтлик вә узақ өмүр тилиди. Әскә салсақ, Сулайман Мәхсүтов 2015-жилниң октябрь ейидин башлап та мошу күнгичә Әмгәкчиқазақ наһийәлик Уйғур этномәдәнийәт мәркизигә рәислик қилип кәлди.
Шуниңдин кейин сөз новитини алған Шаһимәрдан Нурумов билән Әркин Җүмәев узун жиллиқ мевилик әмгиги үчүн Сулайман Шәмшидиноғлиға тәшәккүр изһар қилип, йеңи рәис Ялқунҗан Садиқовниң ишиға утуқлар тилиди. 
Жиғин давамида Ишиктә шәһири Ақсақаллар кеңишиниң рәиси Мәһәмәтҗан Султанияров, Әмгәкчиқазақ наһийәлик Уйғур этномәдәнийәт мәркизи Қаратуруқ йезисидики шөбисиниң рәиси Гүлинур Бақиева, наһийәлик Уйғур этномәдәнийәт мәркизиниң Челәк региони бойичә иҗраий мудири Мурат Ибрагимов, тарихчи Қасим Мәсими вә башқилар мәркәз паалийитини рәтләш вә җанлашдуруш тоғрилиқ өз пикирлирини оттура салди. Шундақла Әмгәкчиқазақ наһийәлик Уйғур этномәдәнийәт мәркизи рәисиниң орунбасарлири Нурбүви Насирова вә Нурҗамал Һасанова хәлиқ алдидики өзигә жүкләнгән җиддий вәзипини аброй билән атқурған Сулайман Мәхсүтовқа һөрмәт билдүрүп, наһийә җамаәтчилиги намидин хатирә соғилирини тапшурди.
Ахирида Ялқунҗан Садиқов сөз елип, көпчилик тәрипидин өзигә билдүрүлгән ишәнчини ақлаш үчүн бар күч-җигәрини салидиғанлиғини йәткүзди. 
Әмгәкчиқазақ наһийәлик Уйғур мәдәнийәт мәркизиниң рәислигигә тайинланған Ялқунҗан Абдрахманоғли әсли Уйғур наһийәсиниң Чонҗа йезисидин. Оттура мәктәпни тамамлиғандин кейин Алмута энергетикилиқ техникумида, Ташкәнт автомобиль йоллири институтида, Ихтисат вә һоқуқ академиясидә, Абай намидики Қазақ педагогика университетида, Җәнубий Қазақстан педагогика университетида тәһсил көргән. Һәрхил жилларда Уйғур наһийәсидә электр тармақлири мәһкимисиниң инженери, Яшлар мәркизиниң мудири, уюшқан җинайәткә қарши күрәш бойичә җәмийәтлик кеңәш рәиси, Әмгәкчиқазақ наһийәсидә ички ишлар башқармисиниң чоң инспектори, оператив башқуруш мәркизиниң башлиғи, Көктөбә оттура мәктивидә башланғуч һәрбий тәйярлиқ пәниниң муәллими болуп ишлиди. 2015-жилдин бери Ишиктә шәһиридики тәнтәрбийә вә сағламлаштуруш комплексиниң бөлүм башлиғи хизмитини атқуруп кәлмәктә. Шундақла у Алмута вилайәтлик Күрәш федерациясиниң президенти. Бокс бойичә спорт маһири, каратэ-до бойичә қара бәлбағ саһиби. Истипадики полковник. Аилиси вә икки пәрзәнди бар. 
***
Жиғиндин кейин җумһурийәтлик Уйғур этномәдәнийәт мәркизиниң рәиси, Қазақстан хәлқи Ассамблеяси кеңишиниң әзаси Долқунтай Абдухелил, Қазақстан Җумһурийити Президенти йенидики Миллий қурултайниң вә Қазақстан хәлқи Ассамблеяси Кеңишиниң әзаси, ҖУЭМниң Пәхрий рәиси Шаһимәрдан Нурумов, Алмута вилайәтлик Уйғур этномәдәнийәт мәркизиниң рәиси Әркин Җүмәев, Әмгәкчиқазақ наһийәлик Уйғур этномәдәнийәт мәркизиниң рәиси Ялқунҗан Садиқов вә мәркәзниң Пәхрий рәиси Сулайман Мәхсүтовларни Әмгәкчиқазақ наһийәси һакиминиң вәзиписини атқурғучи Ертай Нурмаханов қобул қилди.
Сулайман Мәхсүтов һакимға меһманларни тонуштуруп өткәндин кейин Ертай Султанәлиоғли Қазақстанниң барлиқ саһалардики қол йәткүзгән утуқлириға, Әмгәкчиқазақ наһийәсидә атқурулуватқан ишларға қисқичә тохтилип, 50тин ошуқ этнос вәкиллири яшайдиған тәвәдики милләтләрара достлуқ вә қериндашлиқ тоғрисида иллиқ пикирлири билән бөлүшти. 
Андин Долқунтай Абдухелил вә Шаһимәрдан Нурумов җумһурийәтлик Уйғур этномәдәнийәт мәркизиниң паалийити һәққидә ейтип өтти. Шундақла мәркәзниң вә Қазақстанда уйғур тилида нәшир қилинидиған бирдин-бир рәсмий «Уйғур авази» гезитиниң Қазақстан Җумһурийитиниң Президенти Қасым-Жомарт Тоқаевниң дана сәяситини, көпмилләтлик мустәқил мәмликитимизниң пүтүнлүги билән турақлиқлиғини, елимиздики милләтләрара инақлиқ билән разимәнликни, дөлитимизниң иҗтимаий-ихтисадий тәрәққиятини тәрғибат қилиштики ролиға тохталди. 
Ертай Нурмаханов наһийәниң иҗтимаий-ихтисадий, мәдәний тәрәққиятини риваҗландурушқа тәвәдики уйғурларниңму мунасип төһпә қошуп келиватқанлиғини вә келәчәктиму шундақ болидиғанлиғиға ишинидиғанлиғини алаһидә қәйт қилди.
Учришишта көпмилләтлик елимиздики турақлиқни риваҗландуруп, сақлашта һәрбир этносниң орни вә роли һәққидә яхши пикирлар оттуриға қоюлди. 

Алмута вилайити, 
Әмгәкчиқазақ наһийәси