• Әхбаратлар еқими
• 01 Ақпан, 2024

Җавапкәрликкә тартилди

Насирахун РОЗАХУНОВ,
“Uiğur avazi”

Алмута шәһириниң прокуратуриси йәр тәврәшкә бағлиқ ялған әхбаратларни тарқатқанлиғи үчүн җавапкәрликкә җәлип қилишниң дәсләпки фактлири һәққидә хәвәр қилди.
Шәһәр прокуратурисиниң тәкитлишичә, йүз бәргән йәр тәврәш вақтида һәрхил иҗтимаий тармақларда вә мессенджер чатларда тәбиий һалакәтниң ақивәтлири тоғрилиқ алдин-ала ялған әхбаратларни тарқитиш әһваллири орун алди. Өз новитидә, бу ялған әхбаратлар гражданлар арисида паракәндилик пәйда қилди вә җәмийәттә һәрхил пикирләрни туғдурди.
“Һазирқи күндә мәзкүр һәрикәтләрни әмәлгә ашуруш фактлири бойичә 1995 вә 2006-жиллири туғулған икки шәхс ениқланди. Бу шәхсләр Қазақстан Җумһурийити мәмурий һоқуқ бузуш тоғрилиқ кодексиниң 456-2-маддисиниң 3-қисми бойичә мәмурий җавапкәрликкә тартилди. Уларға 10 айлиқ һесап көрсәткүч мөлчәридә җәриман селинди”, дейилиду хәвәрдә.
Идаридикиләрниң тәкитлишичә, һазирқи күндиму мәзкүр йөнилиш бойичә ишлар жүргүзүлүватиду.
Шуни тәкитләш керәкки, асассиз ялған әхбарат тарқитиш җәмийәтлик тәртипни бузуш ховупини пәйда қилиду, шундақла Қазақстан Җумһурийитиниң қануниға бағлиқ мәмурий җаза көздә тутулған. Җумһурийәт җинаий ишлар кодексида “алдин-ала ялған әхбарат тарқитишқа тегишлик җаза қоллиниш тоғрилиқ” 274-мадда бар. Униңға бағлиқ җәриман вә түзитиш ишлири көздә тутулған. Атап ейтқанда, қанунни бузған адәмгә миң айлиқ һесап көрсәткүчтә җәриман селиниши яки 400 саатқа түзитиш ишлириға җәлип қилиниши яки бир жилға әркинлиги чәклиниши мүмкин.