• Әхбаратлар еқими
• 01 Ақпан, 2024

Йәр тәврәш вә униң ақивәтлири

Насирахун РОЗАХУНОВ,
“Uiğur avazi”

Елимиздики Пәвқуладдә вәзийәтләр министри Сырым Шарипханов Алмутида йүз бәргән йәр тәврәшкә бағлиқ идариниң жай-жайлардики бөлүнмилириниң паалийитини тәнқит астиға алди.    
“Пәвқуладдә вәзийәтләр министри генерал-майор Сырым Шарипханов идариниң аппаратлиқ кеңәшмисидә министрликниң сейсмикилиқ һадисиләргә тәйярлиқ көрүш вә иш елип бериш бойичә структурилиқ вә территориал бөлүнмилириниң ишидики камчилиқлар һәм хаталиқларға бағлиқ тәнқидий пикир ейтти. У шундақла бөлүнмиләрниң мәзкүр йөнилиштики бепәрвалиғиға вә иштики җавапкәрсизлигигә алаһидә тохталди”, – дәп хәвәрләйду мәзкүр министрликниң мәтбуат хизмити.
Министр гражданларни хәвәрләндүрүш, уларға әхбарат бериш вә тәйярлиқтин өткүзүш бойичә системилиқ чариләрни көрүшниң муһимлиғини атап көрсәтти. У аһалиниң йәр тәврәш вақтида қилидиған һәрикәтлирини чүшәндүрүш бойичә ишни күчәйтишни тапшурди. 

“Гражданларни өткүзүлидиған сейсмологиялиқ мәшиқләргә җәлип қилишниң йеңи чарилири ишләп чиқип, уни вә қоллиниш керәк. Агаһландуруш вә оқутуш сүпәтлик һәм мәхсәтчанлиқ болуши лазим”, – дәп қошумчә қилди у.
Сырым Шарипханов сейсмикилиқ байқашлар миллий илмий мәркизиниң базисида Миллий ядролуқ мәркизи, Қазақ баш мемарчилиқ-қурулуш академияси вә пән вә алий билим бериш министрлиги хадимлириниң қатнишиши билән сейсмикилиқ һадисиләрни тәхмин қилиш бойичә идариләрара комиссия қурушни тапшурди. 
Жуқуридики тапшурмиларниң орунлиниши қаттиқ назарәт астиға елинди.