• Әхбаратлар еқими
• 01 Ақпан, 2024

Меһриван жүрәкләрниң сахавәтлик ишлири

Рашидәм РӘҺМАНОВА,
«Uiğur avazi»

 Йеқинда Челәк йезисида мүмкинчилиги чәкләнгән балиларға атап хәйрихаһлиқ чарә-тәдбир өтти. 100дин ошуқ бала вә уларниң ата-анилири қатнашқан акцияни Мәсимҗан Һәмраев уюштурди. Әсли, у өрткә қарши күрәш хизмитидә жүргүзгүчи болуп ишләйду. Бирнәччә жилдин бери хәйрихаһлиқ ишлар билән шуғуллинип кәлмәктә. Мәсимҗанниң әтрапида өзигә охшаш башқиниң дәрдигә бепәрвалиқ билән қаралмайдиған яшларму тепилди. У Равиль вә Санийәм Аюповлар билән бирлишип, муһтаҗ инсанларниң еғир әһвалини иҗтимаий торлар арқилиқ көпчиликкә йәткүзиду. Көптин чүшкән мәбләққә турмуш-шараити төвән, мүмкинчилиги чәкләнгән әзаси бар аилиләргә озуқ-түлүк, кийим-кечәк вә башқиму керәк-ярақни йәткүзүп бериватиду. Қисқиси, жүригидә оти бар адәмләр билән муһтаҗлар арисида алтун көрүк болмақта. 
Мәсимҗан, Равиль вә Санийәм бултудин бери яркәнтлик Әсқәрҗан Садиров вә униң «Жылу жүрек» хәйрихаһлиқ фонди билән қоюқ алақидә болуп, бирмунчә яхши ишларни әмәлгә ашурди. Мәсилән, өткән жили улар 50 адәмгә дәстихан йейип, көңли йерим инсанларниң кәйпиятини көтәргән еди. Бу қетим хәйрихаһлиқ акцияси иштракчилириниң сани 200дин ашти. 
Шундақла изгү нийәтлик адәмләрни қоллиғучилар саниму өсти, дегән сөз. Мәсимҗанниң ейтишичә, уларниң арисида аддий адәмләр нурғун. Улар әҗдатлиримизниң «Тама-тама, көл болур» дегинидәк, Мәсимҗан, Равиль вә Санийәм һесап-чотиға қолидин кәлгиничә пул ташлап, муһтаҗларға ярдәм бериватиду. Шуниң билән 200 адәмгә йейилған бәрикәтлик дәстихан әтрапиға җайлашқан меһманлар үчүн концерт қоюлуп, соғилар тапшурулди. Мүмкинчилиги чәкләнгән балилар арисидин шеир оқуп, нахша ейтип, көпчиликниң алқишиға сазавәр болғанларму болди. Улар қошумчә соғиларға еришти, әлвәттә. 
Хәйрихаһлиқ акциягә қатнашқан Челәк йеза округиниң һакими Сәкен Абдихалиев «Жылу жүрек» хәйрихаһлиқ фонди вә униң әтрапидики мәрт-мәрданә жигит һәм қизларниң қиливатқан соваплиқ ишлири билән өзлиридин кичик инилири вә сиңиллириға, йәни Йеңи Қазақстанниң келәчигигә бебаһа үлгә һәм савақ көрситиватқанлиғини атап, саватлиқ, иманлиқ вә инсаплиқ яшларниң көпийишини тилиди. Өзлиригә ғәмхорлуқ көрсәткән балилар билән уларниң ата-анилири уюштурғучиларға чәксиз миннәтдарлиғини изһар қилип, көтирәңгү кәйпият илкидә өйлиригә тарқашти.

Алмута вилайити,
Әмгәкчиқазақ наһийәси