• Әхбаратлар еқими
• 01 Ақпан, 2024

«Милләтләрара разимәнлик: һәрхиллиқтики бирлик»

Өткән һәптидә Алмута шәһәрлик «Достлуқ өйидә» Бостандық наһийәлик Уйғур этномәдәнийәт мәркизиниң уюштуруши билән «Милләтләрара разимәнлик: һәрхиллиқтики бирлик» мавзусида «дүгләк үстәл» болуп өтти. Униңға мәзкүр мәркәзниң рәиси, «Туран дунияси» түркий хәлиқләр мәдәнийити җәмийәтлик фондиниң мудири Карлин Мәхпиров модераторлиқ қилди.

Шәмшидин АЮПОВ, 
«Uiğur avazi»

«Дүгләк үстәлгә» Қазақстан хәлқи Ассамблеяси йенидики яшлар қанитиниң әзалири, яшлар җәмийәтлик тәшкилатлириниң рәһбәрлири, этномәдәнийәт мәркәзлириниң активистлири, шундақла яшлар ресурслиқ мәркәзлириниң рәислири, җәнубий пайтәхттики «СМУ-15», «Көктем», «Орбита», «Алмагүл», «Атакент», «Энергетик» микрорайонлириниң жигитбашлири қатнашти.
Баш қошуш җәриянида сөз новитини алған натиқлар дөләт яшлар программисини әмәлгә ашуруш вә имиджини көтириш, уларни Адаләтлик Қазақстан қуруш җәрияниға паал арилишишқа дәвәт қилиш, шундақла Вәтәнгә, ана тилиға болған муһәббитини ойғитиш, мәнивий қәдрийәтләр билән миллий әнъәниләрни тәрғип қилиш мәсилилиригә әтраплиқ тохталди. Шуниң билән биллә «дүгләк үстәл» иштракчилири өзлириниң утуққа йетиш йоллирини ейтип, иш-тәҗрибилири билән бөлүшти.
Баш қошуш давамида Қазақстан Уйғур яшлири бирлигиниң рәиси, Қазақстан хәлқи Ассамблеясиниң әзаси Рустәм Хәйриев яшлар қанитиниң бүгүнки күнгә қәдәр атқурған ишлири билән келәчәк реҗилири тоғрилиқ һесават бәрди. Андин натиқ җәмийәтлик ишларда паалийәтчанлиқ көрситип келиватқан бирқатар яшларға Тәшәккүрнамә тапшурди. Шуниңдин кейин сөз новитини алған Алмута шәһәрлик Уйғур этномәдәнийәт мәркизи йенидики Яшлар кеңишиниң рәиси Коммунар Исламияров, ҖУЭМ йенидики Яшлар мәшривиниң рәиси Руфат Аблизов, «Азия бүгүн» гезитиниң мухбири, шаир Қолдаш Шәмшидинов, «Digital юрт» лайиһисиниң асасчиси, бизнес-тренер Саид Мәхсүмов вә башқилар сөзгә чиқип, қариливатқан мәсилиләр әтрапида өз ой-пикирлири билән ортақлашти.
«Дүгләк үстәл» ахирида униң иштракчилири билән меһманлар «Алмагүл» микрорайони Яшлар кеңишиниң рәиси Дияр Разиевни Алмута шәһири Бостандық наһийәлик Уйғур этномәдәнийәт мәркизи йенидики Яшлар кеңишиниң йеңидин сайланған рәиси сүпитидә тәбрикләп, иллиқ ләвзилирини билдүрди.