Әхбаратлар еқими
01 Ақпан, 2024

Пәвқуладдә вәзийәтләр министрлигиниң қазақстанлиқларға мураҗиити

Министрликниң тәкитлишичә, һазирқи күндә вәзийәт турақлиқ. Идарә гражданларға хатирҗәмликни сақлашни вә паракәндиликкә берилмәсликни мәслиһәт қилиду.

Насирахун РОЗАХУНОВ,
“Uiğur avazi”

Қазақстан Җумһурийити Пәвқуладдә вәзийәтләр министрлигиниң сейсмологиялик байқашлар вә тәтқиқатлар миллий илмий мәркизи 2024-жилниң 23-қәһританидин тартип Қазақстан территориясидә 1900дин ошуқ йәрасти силкинишиниң тиркәлгәнлигини хәвәр қилиду. Уларниң он бири сезиләрлик болған.
Сейсмикилиқ активлиқ Хитай вә Қирғизстан чегарисида йүз бәргән күчлүк йәр тәврәштин кейин байқалған. Униң долқуни әтраптики дөләтләрниң, шу җүмлидин Қазақстанниң территориясигә тарқиған.
Министрликниң чүшәндүрүшичә, адәттә, мошундақ күчлүк йәр тәврәштин кейин анчә сезилмәйдиған ушшақ йәр тәврәшләр йүз берип туриду. Һазирқи күндә мошу байқалмақта.
Мәзкүр җәриянниң қанчилик вақит давамлишиши – көплигән амилларға бағлиқ. Бу йәр тәврәш мәркизи орунлашқан регионниң сейсмикилиқ әһвалиға, тописиға бағлиқ болушиму мүмкин. Пәйдин-пәй сейсмикилиқ активлиқниң өчүши байқилип, өз қелипиға чүшиду.
Пәвқуладдә вәзийәтләр министрлигиниң еғир вәзийәтләрни башқуруш мәркизиниң базисида җумһурийәтлик оператив штаб ишиниң давамлишиватқанлиғи хәвәр қилиниду. Һаят кәчүрүшни тәминләш, транспорт вә ишләп чиқиш объектлири адәттики әһвалда паалийәт елип бериватиду. Вәзийәт турақлиқ.
Қазақстанлиқларға хатирҗәмликни сақлаш вә паракәндиликкә берилмәслик мәслиһәт қилинди. Әң муһими, йәр тәвригәндики бехәтәрлик чарилирини әстә сақлаң.
Мабада йәр тәвригәндә өйниң жуқарқи қәвәтлиридә болсиңиз – йәр тәврәш тохтиғичә шу йәрдин қозғалмаң. Шундақла алдин-ала өйгә кириш ишигини ечип қоюп, униңдики бехәтәрлигирәк җайни егиләң: ишикниң арилиғи, чоң тамниң булуңлири. Деризидин вә еғир буюмлар һәм җиһазлардин нери болуң. Шундақла үстәлниң астиға яки ванниниң ичигә йошурунушқа болиду.
Йәр тәврәш вақтида лифттин вә пәләмпәйдин пайдилиниш мәнъий қилиниду. Йәр тәврәшниң тохтишини күтүп, пәқәт шуниңдин кейинла талаға чиқишқа болиду.
Талада беналардин, электр қувити линиялиридин, билбордлардин нери, очуқ мәйданда туруш керәк.
Шундақла һәрбир өйдә алдин-ала пәвқуладдә әһвалларда керәк болидиған (дора-дәрмәк, һаҗәт нәрсиләр, озуқ-түлүк, һөҗҗәтләр, фонарик, иссиқ кийим-кечәк) буюмлар селинған чемодан болуши керәк.
Шуни әскә салимизки, 23-қәһритан күни кечиси Алмута шәһириниң аһалиси күчлүк йәр тәврәшни һис қилди. Хәвәр қилинишичә, йәр тәврәш күчи бәш баллни тәшкил қилди.