• Әхбаратлар еқими
• 01 Ақпан, 2024

Миллий қурултай паалийитиниң йөнилишлири ениқланди

Мәлумки, Президет Қасым-Жомарт Тоқаев ««Egemen Qazaqstan» гезитиға бәргән сөһбитидә Миллий қурултайниң җәмийитимиздики роли һәққидә тохтилип, униң новәттики олтириши әтиязда өтидиғанлиғини, қурултайни мәзмун җәһәттин кәңәйтиш, күн тәртивидики мәсилиләрни толуқтурушниң әһмийитини алаһидә тәкитлиди. Һазир Миллий қурултайниң новәттики жиғиниға җиддий тәйярлиқлар жүргүзүлүватиду. 

Йолдаш МОЛОТОВ, 
«Uiğur avazi»
 
Өткән һәптидә Астана шәһиридә Миллий қурултайниң иш секциялириниң олтириши өтти. Олтиришта дәсләп сөз алған Миллий қурултай Рәисиниң орунбасари – Дөләт мәслиһәтчиси Ерлан Қарин өткән қурултайда Дөләт рәһбири көтәргән тәшәббусларниң әмәлгә ешиш җәрияниға тәпсилий тохталди. Җүмлидин Президентниң Шәрқий Қазақстан вилайитидә һәм Абай вилайитидә йеңи наһийәләрни әслигә кәлтүрүшкә вә қурушқа, регионлуқ рәмзләрни рәтләшкә, шундақла «Һәзрәт Султан» тарихий-мәдәний қоруқ-мирасгаһиға «Миллий» мәртивисини беришкә, «Балилар китапханиси» лайиһисигә мунасивәтлик тәшәббуслириниң әмәлгә ашурулғанлиғини алаһидә қәйт қилди. Шундақла Миллий қурултайниң күн тәртивидики мәсилиләр бойичә пикирләр муһакимә қилинидиғанлиғини ейтти. Андин қурултай әзалири төрт секция бойичә, йәни «Азаматтық қоғам», «Білім және ғылым», «Әлеуметтік-экономикалық даму», «Мәдениет. Өнер. Руханият» секциялири бойичә ишлиди. 
 Миллий қурултай вә ҚХА кеңишиниң әзаси Шаһимәрдан Нурумов «Мәдениет. Өнер. Руханият» секциясигә қатнишип, өзиниң ениқ пикир-тәклиплирини оттуриға салди. У әйнә шу пикирлири һәққидә бизгә тәпсилий ейтип бәргән еди.
— Бийил әтиязда Атырав шәһиридә Миллий қурултайниң новәттики, үчинчи олтириши өтиду, — дәйду Шаһимәрдан Үсәйиноғли. – Тәкитләш лазимки, елимиз чоң вә җавапкәр трансформация басқучи – милләтниң йеңи сүпитини қелиплаштуруш басқучида туриду. Җәмийитимиздә чоң өзгиришләр йүз бәрмәктә. Президент җарий қилған сәясий вә ихтисадий-иҗтимаий ислаһатларни әмәлгә ашуруш сүръәтлик давамлашмақта. Бу турғудин қариғанда, Президент Миллий қурултайниң паалийитигә алаһидә әһмийәт бәрмәктә. Дөләт рәһбири Миллий қурултайға җәмийәтлик диалогниң бирпүтүн институционаллиқ моделини қелиплаштурушни, умуммиллий қәдрийәтләр, мәнавият, бирлик, йеңи иҗтимаий этика, йеңиланған менталитет тәшәббуслирини әмәлгә ашуруш вәзиписини қойди. Мана һазир тәйярлиқ ишлири жүргүзүлүватиду. Мән бу қетим «Мәдениет. Өнер. Руханият» секциясидә ишлидим. Секция ишиға Мәдәнийәт вә әхбарат министри Аида Балаева модераторлуқ қилди. Бу йәрдә мәдәнийәт вә сәнъәт әрбаплири, шаир-язғучилар өзлириниң пикирлирини оттуриға салди. Шәхсән өзәм, қазақстанлиқ вәтәнпәрвәрлик мавзусида тәклиплиримни ейттим. Бу йөнилиштә Қазақстан хәлқи Ассамблеясиниң паалийити муһим роль ойнаватиду. Миллий мәдәнийәт мәркәзлириниң, җүмлидин ҖУЭМниң әмәлгә ашуруватқан ишлири һәққидә тохталдим. Һазир дунияда қелиплашқан әһвал турғусидин қариғанда, яшларни вәтәнпәрвәрлик роһта тәрбийиләшниң әһмийити техиму ашмақта. Бәхтимизгә яриша, елимиз мустәқиллик алған 30 жилдин ошуқ вақит ичидә биздә һечқандақ тоқунуш-зиддийәтләр болмиди. Дөлитимизниң дана ички вә ташқи сәясити түпәйли биз мошундақ иҗил-инақ яшап келиватимиз. Амма, хәлиқара вәзийәткә нәзәр ташлисақ, течлиқ һаятқа һечким капаләтлик берәлмәйду. Шуңлашқа биз, умумий вәтинимиз – Қазақстанниң мустәқиллигигә ховуп-хәтәр пәйда болса, барлиғимиз, бирпүтүн милләт болуп шуниңға қарши турушимиз лазим. Мениң ишәнчим камилки, мустәқиллигимизгә ховуп пәйда болса, барлиқ қазақстанлиқлар өмлүшүп, бирликтә һәрқандақ дүшмәнгә тақабил туриду. Биз яшлиримизни әйнә шундақ роһта тәрбийилишимиз һаҗәт. Мошу йөнилиштики ишларни иҗадий әсәрләр арқилиқму әмәлгә ашурушқа болиду. Мана йеңи жуқурида шаир-язғучилар өзлириниң пикирлирини ейтип өтти. Мениң оюмчә, кейинки жилларда иҗаткарлар әсәрлиридә милләтләр арисидики достлуқ, қериндашлиқ мавзулири йоқниң орнида. Буму муһим мәсилә.
 Мана өткән һәптидә Алмутида йәр тәврәш йүз бәрди. Җәнубий пайтәхтниң сейсмикилиқ ховупи бар регионда орунлашқанлиғини һәммимиз билимиз. Амма, шуниңға қаримай, кейинки жилларда шәһәрдә назарәтсиз қурулуш кәң қанат яйди. Йеңи имарәтләрниң сүпити, уларниң инфрақурулуминиң йоқлуғи һәққидә нурғун ейтилди. Бирақ техила нәтиҗә йоқ. Шуңлашқа «Шәһәр қурулуши тоғрилиқ» қанун лайиһисини тәйярлаш вә қобул қилишниң вақти аллиқачан кәлди. Бу мәсилиму җиддий туриду. Умумән, мошундақ муһим мәсилиләр бойичә өз пикир-тәклиплирини оттуриға салдим.
 Қошумчә қилсақ, Дөләт мәслиһәтчиси Ерлан Қарин мәзкүр олтиришта чүшкән тәклипләрниң һәммиси етиварға елинип, Миллий қурултай олтиришида муһакимә қилинидиғанлиғини тәкитлиди.