• Әхбаратлар еқими
• 08 Ақпан, 2024

Һәқсиз дукан

«Ялғуз дәрәқ орман болалмас» дегәндәк, көп билән қилинған иш тез көзгә көрүниду. Җүмлидин йеқинда Кәтмән жутидики җанкөйәримиз Меһирдин ака Җәлилов билән параңлишип қалдуқ. Течлиқ-аманлиқ сорашқандин кейин у жутиниң турмуш-тирикчилигигә тохталғач, Кәтмәнгә йеңи мечит селинғанлиғини тилға алди. Мечитни жутниң ғемидә жүргән қоли очуқ, қәлби сехи жутдашлиридин бири өз хираҗитигә селип берипту. 

Сабирәм ӘНВӘРОВА, 
«Uiğur avazi» 

– Йезимизниң һөснигә һөсүн қошқан мечитимиз шундақ әҗайип селинди. Йеңи мечитниң босуғисидин атлиған хәлиқниң хошаллиғида чәк йоқ. Муқәддәс дәргаһниң бой көтириши жутумизниң бәрикитини ашуруп, бирлигини техиму мустәһкәмлиди десәм, хаталашмаймән. Мечитни салған «Оң қолуң бәргәнни, сол қолуң билмисун» дәйдиған инсан. Шуңа исмини атимайла, бир еғиздин барчә кәтмәнликләрниң рәхмитини йоллиғиним тоғра болар, – деди Меһирдин ака. 
Йеңи мечитниң селишиниши йезидики изгү ишларниң башланмиси болған охшайду. Кейинки йеңилиқ бизниму техиму һәйран қалдурди. Бирлиги ярашқан кәтмәнликләр бир яқидин баш, бир йәңдин қол чиқирип «Һәқсиз» дукан ечипту. Қандақ дәмсиз? Бу дукан яхшилиқ қилишқа хумар жут турғунлири, тиҗарәтчиләр тәрипидин озуқ-түлүк, кийим-кечәк қатарлиқ керәк-ярақ билән толтурулуп туридекән. 

– Бу изгү ишқа Кәтмәндин жирақта жүргән жутдашлиримизму ат селишиватиду. Дукинимизниң сиртидики «Керигиңиз болса елиң, артуғи болса бериң!» дегән сөз жутқа кирип-чиққан һәрқандақ адәмниң қизиқишини ойғитидиғанлиғи җәзмән. Сиртиға йезилғинидәк, дуканға халиған адәм кирип, керигини һәқсиз елип кәтсә болиду. Артуғи болса, қалдурса техиму яхши. Һәтта, өзгә жутниң турғунлири үчүнму һәрдәм ишигимиз очуқ, – деди Меһирдин ака. 
Һавадин башқиси пулға сетиливатқан бу заманда «һәқсиз» дегән сөзгә ишиниш қийин, әлвәттә. Әмәлиятта, өзгичә бу дуканниң өзгә дуканлардин қәдир-қиммити, баһаси жуқури десәк, мубалиғә болмас. Чүнки бу дукандики нәрсиләр үчүн турғунлар пул әмәс, совап алиду, әмәсму. Муһтаҗларға ярдәм көрситип, бир-биригә һәмдәм болуватқан кәтмәнликләрниң бу башланмиси башқа жутларғиму үлгә болса, нур үстигә нур болаттекән дегән ойға кәлдуқ...