• Әхбаратлар еқими
• 08 Ақпан, 2024

Белоруссиядин кәлгән хуш хәвәр!

Бәхтишат СОПИЕВ,
«Uiğur avazi»

Әву бир жили иҗтимаий тордики: «Валерий Ходҗаев Белоруссия саламәтлик сақлаш министриниң биринчи орунбасари болуп тайинланди» дегән учурға көзүм чүшти. «Ходҗаев» дегән фамилия иссиқла көрүнди. Чүнки у бизчә, «Ғоҗаев» болуши керәк. Кейин бу кишиниң тәрҗимиһалиға қизиқип қалдим. «Туғулған йери: Алмута вилайити, Уйғур наһийәсиниң Долата йезиси. Миллити — уйғур» дәп йезилипту. Хаталашмаптимән.
 Долатидики Ғоҗаевларни тепиш қийинға чүшмиди. Йезида Васил вә Қасимҗан исимлиқ икки Ғоҗаев бар екән. 
 – Биз анимиз Майимхандин үч оғул, икки қиз туғулдуқ, – дәп сөзини башлиди Қасимҗан ака. – Асим, Васил, мән вә икки қиз: Саһирәм билән Патәм. 
–    Белоруссиядә туққанлириңиз барму? – соридим ақсақалдин. 
 – Бар. У яқта акам Асимниң Володя вә Валерий исимлиқ икки оғли туриду. Чоңи һәрбий врач, кичигиму мәзкүр саһаниң йетәкчи мутәхәссислириниң бири. Йеқинда кичигини «замминистр» бопту» дәп аңлидуқ. 2009-жили ака-укилар Долатиға келип, бизни йоқлап кәтти. Улар бу йәрдин кәткәндә 9 вә 7 яшта еди. Әллик жилдин кейин келип, өзлири туғулған йезиниң сай-дөңлири билән тағлирини унтумиғиниға һәйран қалдуқ. Улар Петр вә Александр исимлиқ балилирини әгәштүрүп кәпту. Мана шуниңдин кейин мунасивитимиз техиму қоюқлашти. Улар бизгә пат-пат салам йоллап туриду.
 – Мени у балиларниң қандақларчә долатилиқ болуп қалғини қизиқтуруватиду, – дедим Қасимҗан акиға.
 — Бу мундақ болди. Акам әсли 1928-жили туғулған. Амма, немишкиду, униң һөжжитигә «1924-жилниң» дәп йезилип кетипту. 1941-жили Улуқ Вәтән уруши башлинип, уни урушқа елип кетиду. У Белоруссиядә урушқа қатнишиду. Шу йәрдә «Шура» исимлиқ һәмширә қиз билән тонушуп, чиқишип қалиду. Уруш түгигәндин кейин уни Долатиға елип келип, иккиси өйлиниду. Икки бала тапқандин кейин «тетя Шура», биз уни шундақ ататтуқ, әтималим, биз тәрәпләргә төзмисә керәк. Ахири акам уни икки балиси билән Белоруссиягә апирип  ата-анисиниң қолиға тапшуруветиду. Кейин у бу яққа қайтип келип, аилә қуруп, икки қиз тапиду. У 1995-жили һаяттин өтти. Васил акам 2011-жили көз жумди...
Бу вақиәни маңа буниңдин он жил илгири Қасимҗан ака сөзләп берип, шу жили Володя билән Валерий Долатиға кәлгәндин кейин, бу сөһбитимизни давамлаштурушни реҗилигән едуқ. Амма ундақ учришишниң пурсити задила болмиди. Қасимҗан ака 2020-жили вапат болди. 2023-жили Белоруссиядин Ғожаевларниң аилисигә «тетя Шураниң» 103 яшқа кирип қайтиш болғанлиғи тоғрилиқ хәвәр кәлди...
***
Йеқинда Белоруссиядики Ғоҗаевлардин Долатидики дадисиниң қериндашлириға хуш хәвәр кәлди. Бу қетимқи учурниң орни бөләк. Униңда Валерий Ғоҗаевниң оғли, медицина пәнлириниң намзити, доцент Александр Ғоҗаевниң (сүрәттә) утуқлири һәққидә йезилипту. 
Александр 1980-жили Витебск вилайитиниң Лепель шәһиридә туғулған. У 2004-жили Белоруссия дөләт медицина университетини, 2008-2012-жиллири алий оқуш орнидин кейин медицина академиясини тамамлап, «әмәлий давалаш иши», «психотерапевт», вә «саламәтлик сақлаш ишлирини уюштуруш» мутәхәсислилирини егиләйду. Шундақла саһаға мунасивәтлик көплигән лавазимлиқ хизмәтләрни атқуриду. 2021-2024-жиллири Белоруссиядики әң чоң Жумһурийәтлик психикилиқ саламәтлик сақлаш илмий-әмәлий мәркизиниң директори болуп ишләйду. Йеқинда у Белоруссияниң Саламәтлик сақлаш министри болуп тайинлинипту. 
       Һазир бу йеңилиқ иҗтимаий торларда қериндашлиримиз арисида қизғин муһакимә қилиниватиду. Мабада, белоруссиялик Ғоҗаевлар Долатиға келип қалса, бу мақалиниң ахирини чоқум чиқиримиз.