• Әхбаратлар еқими
• 08 Ақпан, 2024

Ясминаниң утуғи

Рашидәм РӘҺМАНОВА,
«Uiğur avazi»

Ясмина Турғанҗанова – Исмайил Тайиров намидики оттура мәктәпниң 10-«А» синипида билим алиду. Қазақстанниң келәчиги – дөләт тилида екәнлигини яхши чүшинидиған у қазақ тилини һәртәрәплимә үгинип кәлмәктә. Ясминаниң бойидики қабилийити билән қизиқишини ениқлап, уни риваҗландурушта униң қазақ тили вә әдәбияти пәни бойичә муәллими Гүлзарә Камалованиң қошқан төһписи зор. У тиришчан қизға 7-синиптин тартип дәрис бериду. Шуниңдин бери оқуғучисиға қазақ әдәбиятини көпирәк оқуп, тонулған ақынларниң шеирлирини ядқа елишқа мәслиһәт берип һәм һәрхил мусабиқиләргә қатнаштуруватиду. Чүнки устази мошу йосундики чарә-тәдбирләр балиниң қабилийити һәм талантини техиму риваҗландуруш үчүн интайин муһим екәнлигини билиду. 
Қабилийәтлик қиз Абай Қунанбаев вә башқиму шаирларниң шеирлирини ядқа елиш һәм ипадилик оқуш бойичә мусабиқиләргә қатнишип, муәллиминиң үмүтини ақлап, мукапатлиқ орунлардин көрүнүпму үлгәрди. Җүмлидин булту күздә Ясмина ҚҖ Президенти Сарийиниң китапханиси уюштурған, 400дин ошуқ мәктәп оқуғучиси вә колледж һәм университетларниң студентлири қатнашқан VII «Абай оқулары» мусабиқисидә мукапатлиқ ІІІ орунға еришти. 17-октябрьда Астанадики Оқуғучилар сарийида өткән мукапатлаш рәсимигә қизчақ муәллими Гүлзарә Камалова билән қатнишип, мукапини елип, яхши тәсиратлар билән йезиға қайтип кәлди. 
Бу қетим Ясмина «ÒRKENIETI» Миллий инновациялик илмий-тәтқиқат мәркизи тәрипидин уюштурулған «Тәуелсіздік дарыны» байқишиға қатнашти. Байқаш шәрти бойичә мәркәзниң сайтиға Ясминаниң мошу күнгичә қол йәткүзгән утуқлири һәққидә толуқ мәлумат (диплом, сертификат, алаһидә үлгидики аттестат в.б.), устазлири, синипдашлири билән чүшкән фотосүрәтлири әвәтилди. Андин у 10 тапшурмидин «Қазақ тілі – байлығым» мавзусини таллавелип, эссе йезип, мәхсус сайтқа салди. Шундақ қилип, у 6 — 11-синип оқуғучилири арисида топ йерип, І дәриҗилик диплом, сертификат вә «Тәуелсіздік дарыны» бәлгүси билән тәғдирләнди. 

СҮРӘТТӘ: Қазақстан Җумһурийити Парламенти Мәҗлисиниң депутати Жарқынбек Амантайулы Ясмина Турғанҗановани мукапатлаватқан пәйти.

Алмута вилайити,
Әмгәкчиқазақ наһийәси